Saveriu Paoli
Natu in San Martinu di Letia in lu 1886 è mortu in lu listessu locu in lu 1941.
Cofundatore cù Ghjacumu Santu Versini di a celebra tantu ch'efimeru rivista cursista A Cispra in lu 1914.
Ferma oghje cunnisciuta sta rivista pulitica è literaria per via di u so motu famosu : « A Corsica ùn hè micca un dipartimentu francese, hè una nazione vinta chì hà da rinasce ». Per i so respunsevuli, a literatura era un arnese da fà l’unità di a patria corsa : « Anu più fattu Racine è Corneille per l’unità francese chè tutta a sterpa di Capet ».
Durante a Prima Guerra Mundiale, hè fattu prigiuneru da i tedeschi. In prigiò, hà scrittu a parte a più importante di i so testi dialettali, chì compie i versi di u so racoltu: "Poëmes Villageois" è quelli ch'ellu avia publicatu in la so rivista sottu à u nome di "Solitudes".