Chjesa San Ghjuvà di Bastia

A chjesa San Ghjuvanni di Bastia, chjamata dinù San Ghjuvà hè una chjesa cattolica situata in Bastia. Hè a chjesa di u quartieru di u Vechju Portu, chjamatu Terra Vechja.

A facciata di San Ghjuvà, nant'à u Vechju Portu

San Ghjuvà vista da a piazza di u Mercà

Hè a chjesa a più grande di Corsica. A facciata hè di stile baroccu.

Lucalizazione

A chjesa si trova in u dipartimentu di Corsica Suprana, in a cità di Bastia. Hè stata custruita in u quartiere di Terra Vechja, trà a Piazza di u Mercà è u Vechju Portu.

Storicu

À l'epica ghjenuvese, a cità di Bastia hè spartuta in duie parochje : a cità alta, Terra Nova, dipende di a chjesa di Santa Maria. A cità bassa, Terra Vechja, dipenda di a chjesa di San Ghjuvanni.

A chjesa San Ghjuvanni di Bastia hè stata custruita trà u 1636 è u 1666, nantu à u situ d'una vechja chjesa. L'edifiziu hè statu classificatu cum'è munumentu storicu in u 2000 .

I campanili sò stati custruiti assai più tardi a custruzzione di a chjesa, à u seculu XIX. Quellu di mancu hè statu fattu in u 1810, da un muradore sguizzeru, Tomaso Quadri. Quellu di manca hè statu fattu da l'architettu bastiacciu Paul-Augustin Viale, in u 1864. Hà pigliatu cum'è mudellu a chjesa di a Trinità di i Monti, in Roma.

Si pò vede a chjesa di San Ghjuvà cù un solu campanile in una pittura di Frédéric Bourgeois de Mercey, Vue du port de Bastia (1839), à u museu di Bastia.

Vista di u Vechju Portu di Bastia, da Frédéric Bourgeois de Mercey (1805-1860), à u museu di Bastia

Decori interni

L'internu di a chjesa

U decoru internu hè statu cumplettamente rifattu à u XIXu seculu. Fermanu poche cose di l'anticu decoru baroccu.

In u 1870 a volta hè stata decurat da dui pittori fiorentini.

U coru

In u 1867, u decoru di a volta è di u coru sò rifatti. Ùn ferma dunque guasi nunda di i decori antichi. Hè l'impresariu bastiacciu Raphaël Nardini è u stucadore Paganoni chì i rifacenu.

U grande medaglione sopr'à l'altare maestru hè una bella riescita. Ci si vedenu figure d'anghjuli in un oculus chì s'apre ver'di u celu.

• 
• 

A volta

In u 1870 a volta hè rifatta, da dui pittori fiurentini. Rapresenta à San Ghjuvanni Battista chì batteza à Cristu.

• 
• 

E cappelle di i marinari è di i piscadori

San Ghjuvà hè a chjesa maiò di u Vechju Portu di Bastia, induve i marinari è i piscadori eranu numerosi. In a chjesa si trovanu duie cappelle di ste duie cungregazione, vicinu di u coru.

Cappella di i piscadori

I piscadori avianu a so cappella à manu diritta. Ci hè una bella pittura di l'artistu ghjenuvese Giovanni Badaracco. U guatru mostra à San Petru è Sant'Andria in una barca.

• 
• 

Cappella di i marinari

I marinari avianu a so cappella à manu manca, dedicata à Sant'Eramu. A pittura hè di un pittore ghjenuvese, Lorenzo de Ferrari.

• 
• 

L'altare maestru

In u coru ci si trova l'altare maestru di marmeru pulicromu. Hè statu fattu in u 1694 da Honoré Pellé, un artigianu francese stallatu in Ghjenuva.

• 
• 

I fonti di battezimu

A cappella di i fonti di battezimu si trovanu à manca di l'entrata principale. U gruppu di marmeru biancu data di 1857. Rapresenta u battezimu di Cristu. Hè statu fattu da Ferdinando Pelliccia. E duie culonne di l'ancona sò di marmeru corsu raru, di a pieve di Caccia.

• 
• 

U pergamu

U pergamu di marmeru hè di u 1781. Hè l'opera di parechji artisti ghjenuvesi : Gaetano Torre, Gianandrea Torre et Domenico Orsolino.

• 

A tribuna di l'organu

A tribuna di l'organu hè di u 1742. Assai ricca è decurata, hè stat fatta da u bastiacciu Giovanbattista Terrigo.

• 

E pitture

• 
• 
• 
• 
• 
• 

Tradizione

Ogni vigilia di San Ghjuvanni, u 23 di ghjugnu, un focu hè accesu nant'à u Vechju Portu. In Bastia porta u nome di fucarè .

U focu di San Ghjuvà, chjamatu in Bastia U Fucarè

Cultura

U canterinu Carlu Rocchi hà rescu celebre San Ghjuvanni cù a so canzona U campanile di San Ghjuvà. Hè stata ripigliata più tardi da Antone Ciosi è da Maì Pesce. Hè u bastiacciu Eugène Annarella chì l'hà scritta è chì hà cumpostu a musica.

Da vede dinù

• Oratoriu San Roccu
• Chjesa di a Cuncezziò
• Chjesa San Carlu
• Oratoriu di a Santa Croce
• Catedrale Santa Maria
• Citatella di Bastia