San Carlu di Bastia
San Carlu, hè u nome d'una chjesa in u centru storicu di Bastia, in Corsica Suprana. Hè scritta à i munumenti storichi[1]. Si trova in Terravechja, in u quartieru di U Guadellu (hè u nome di u fiumicellu chì passa sottu terra è chì si lampa in a Marina).
Storia
mudificàA chjesa hè stata custruita da frati, chjamati i Ghjesuiti in u 1635 [2]. A l'origine, era dedicata à Sant'Ignaziu di Loyola, patrone di i Ghjesuiti.
A storia di sta chjesa hè ligata à quella di i ghjesuiti in Bastia, cù a fundazione di u cullegiu di i ghjesuiti, chjamatu oghje Cullegiu Simon Vinciguerra, chì hè u primu stabilimentu d'insignamentu di Corsica. I primi corsi sò dati in u 1601, in e case vicinu, chì u cullegiu ùn hè ancu custruitu. Tandu si truvava à mezu à a campagna.
Dopu à l'espulsione di l'ordine di i Ghjesuiti in u 1769, l'edifiziu hè statu datu à a cunfraterna di San Carlu è a chjesa hà cambiatu u so nome.
Descrizzione
mudificàA facciata hè caratteristica di u stilu ghjesuitu. Piglia cum'è mudellu a chjesa di u Gesù, in Roma. Hè cumposta di duie parte cun pilastri. A parte superiore hè più stretta, cù un fruntone di forma triangulare è duie grande vulute.
Nant'à a facciata, ci sò duie nichje induve sò state messe duie statue : San Francescu Saveriu è Sant'Ignaziu.
-
A statua di Sant'Ignaziu -
A statua di San Francescu Saveriu
L'internu di a chjesa
mudificàIn a chjesa si ponu sempre vede i decori fatti di stucchi di u XVIIu seculu. Hè u so decoru d'origine[2].
À u centru di a volta, in u medaglione c'era una pittura di Sant'Ignaziu, vestutu di neru. Quandu a chjesa hè stata turnata à chjamassi San Carlu, i cunfratelli anu fattu cambià u culore di u vestitu per rapresentà à San Carlu[2].
In sta chjesa sò insepelliti parechji persunagi impurtanti :
Domenico Maria Spinola, anzianu doge di a Republica di Ghjenuva. Hè statu dinù guvernatore di Corsica. Hè natu è mortu in Bastia, è hè per quessa ch'ellu era cugnumatu in Ghjenuva Il Corsetto[2].
Dopu à parechji anni di travagli, a chjesa hè turnata à apre in u 2017[3].
Evenimenti storichi
mudificàA rivolta di 1814
mudificàIn u 1811, Bastia perde u so titulu di capitale à prufittu d'Aiacciu. Bastia hè purtantu più ricca è più pupulata. Hè tandu a cità a più impurtante di Corsica, è i bastiacci li ne vuleranu assai. In u 1814, allora ch'ella ci hè una grave crisa ecunimoca, nasce una cutestazione forte contr'à Napuleò in Bastia. Hè in San Carlu ch'ella nasce l'insurrezzione cont'à l'Imperu, è in particulare contr'à u guvernatore Berthier. I Bastiacci riuniti in chjesa pruclamanu a separazione trà a Corsica è a Francia, è u ristabilimentu di reame anglocorsu. In stu "Cumitatu di salute publicu" si ritrova u pueta è intellettucale bastiacciu Salvatore Viale[4].
A prima messa in lingua corsa
mudificàHè in San Carlu ch'ella hè detta a prima messa in lingua corsa, in u 1971. U prete era munsignore Casanova. A messa era cantata da i cantori di Sermanu.
Cunfraterna
mudificàHè a cunfraterna San Carlu chì s'occupa di a chjesa, di e feste è prucessiò. Dapoi u 2020 ci hè ancu una cunfraterna feminile[5] hè a prima di Bastia.
In giru à a chjesa
mudificàÀ u pede di u scalone di San Carlu, ci hè una funtana à manu manca. Si chjama funtana di i Ghjesuiti o E trè funtane. Hè stata rifatta in u 1574. Duie grande placche rammentanu e risturazione, in u 1722 è in u 1806.
U cunventu di i Ghjesuiti hè u più anticu di Bastia. Hè statu apertu in u 1635. I Ghjesuiti ci anu assiguratu l'insignamentu segundariu durante l'epica ghjenuvese. Hè u rè Luigi XV chì hà da espulse tutti i Ghjesuiti di Francia, in l'anni 1768-1769. Oghje hè un cullegiu, chì porta u nome di Simon-Jean Vinciguerra.
In faccia di San Carlu si trova un palazzu, chjamatu Palazzu Caraffa. Hè u casale cù a più grande facciata di Bastia.
Note
mudificà- ↑ https://www.pop.culture.gouv.fr/notice/merimee/PA2B000006
- ↑ 2,0 2,1 2,2 2,3 Bastia : le guide, dirigé par Jean-Baptiste Raffalli, Michel-Édouard Nigaglioni, Éditions Du Patrimoine, 2003
- ↑ https://france3-regions.francetvinfo.fr/corse/haute-corse/bastia/reouverture-eglise-saint-charles-bastia-1359607.html
- ↑ https://www.corsematin.com/articles/histoire-la-strategie-de-napoleon-pour-defendre-la-corse-mettre-tous-les-moyens-sur-calvi-seule-place-tenable-118349
- ↑ Copia di archiviu [archiviu 2022-02-07; Ritruvatu 2022-02-07].