Oratoriu San Roccu di Bastia

L' oratoriu San Roccu hè un edifiziu religiosu chì si trova in u quartieru di Terra Vechja, oghje carrughju Napoléon in Bastia . À l'origine hè a chjesa di a cunfraterna San Roccu.

Facciata di l'Oratoriu San Roccu

Storia mudificà

A so storia hè ligata à quella di e cunfraterne di Bastia. A cità ne avia una sola : quella di Santa Croce, situata in u quartieru Citatella è diretta da i Ghjenuvesi. Un manuscrittu di u 1638 conta chì a cumunità corsa, in zerga, decide di creane d'altre. Hè cusì ch'elle sò create duie cunfraterne nove : un gruppu d'adulescenti fonda quella di San Roccu, è un gruppu di adulti fonda quella di l'Immaculata Cuncezziò [1]. San Roccu hè dunque a cunfraterna storica di i giovanni bastiacci. Quand'elli diventatu adulti devenu andà in un'altra cunfraterna.

A so storia hè dinù ligata à quella di l'epidemie di u Medievu. San Roccu hè u santu chì prutege di l'epidemie. A grande pesta chì avia culpitu Bastia in u 1569 avia fattu danni tremendi. Si saria firmata di manera miraculosa à l'entrata di a cità grazia à l'intervenzione di San Roccu. Hè pè ringraziallu chì Bastiacci anu custruitu sta chjesa[2].

Descrizzione mudificà

Una prima chjesa hè stata fatta in u 1590. Dopu hè stata ricustruita cumplettamente in u 1604.

A facciata mudificà

A facciata hè stata ricustruita tardi, à u seculu 19, in stile neoclassicu. Quattru culonne tuscane sustenenu un grande fruntone triangulare. Hè l'opera di l'architettu bastiacciu Jean-Louis Guasco.

U grande purtò di màrmeru biancu cù a cunchiglia di i pellegrini data di u 1860.

I decori interiori mudificà

Dentru, i decori sò assai ricchi. Hè di stile baroccu. I damaschi di seta rossa coprenu i muri, segondu l'usu tradiziunale in Ghjenuva. U decoru di stucci d'oru data di u 1617.

U retablu di l'altare principale hè statu sculptatu in Bastia in u 1692.

 
L'internu di l'oratoriu
 
L'organi

Pitture mudificà

Ci sò parechje pitture in l'oratoriu San Roccu. In particulare una rapresentazione diu XVIIe seculu di San Roccu, San Bastianu, San Martinu è Santa Catalina d'Alessandria à i pedi di a Madonna. L'opera hè di u pittore fiurentinu Giovanni Bilivert, in u 1626[3].

U guatru hà benefiziatu d'una ristaurazione in u 2016[4].

 
L'altare è a pittura di Giovanni Biliverti

Sculture mudificà

In a nave, in una nichja di manca ci si trova una statua di prucessione di San Roccu. Hè di legnu, è hè datata di a fine di u seculu XVIII.[1].

 
Statua di prucessione di San Roccu

Festa di San Roccu mudificà

San Roccu hè sempre festighjatu in Bastia, ogni 16 d'Agostu. Dopu à a messa ci hè una prucessione in i carrughji di Terra Vechja. L'usu hè ch'ella ci sia una distribuzione di panucci[5],[6].

Note mudificà

  1. 1,0 1,1 Sott'à a direzzione di Jean-Baptiste Raffalli, Bastia : le guide, Paris, Editions du patrimoine, 2003.
  2. Sott'à a direzzione di Jean-Baptiste Raffalli, Almanach bastiais : tradizione viva di Bastia è di u so circondu, Comité des fêtes et de l'animation du patrimoine de Bastia, 2007
  3. https://www.pop.culture.gouv.fr/notice/merimee/PA2B000007.
  4. https://www.corsenetinfos.corsica/Bastia-Restauration-du-tableau-de-Giovanni-Bilivert-a-l-Oratoire-Saint-Roch_a21922.html
  5. https://www.corsenetinfos.corsica/A-San-Roccu-festighjata-in-Bastia_a43113.html.
  6. https://www.corsematin.com/articles/bastia-fideles-a-san-roccu-depuis-429-ans-75447 Archiviu 2022-02-03 at the Wayback Machine.

Da vede dinù mudificà