Vincent Stagnara
Vincent Stagnara (Bastia), 10 d'aostu 1950 - Bastia, 2 di ghjennaghju 2010) fubbe un avucatu è omu puliticu corsu.
Biugrafia
mudificàDiplumatusi in legge à Marseglia, unu di i so primi prucessi fù in u 1975 quand’ellu diventò u difensore d’Edmondu Simeoni dopu à l'affare d'Aleria. Qualchi anni dopu, in u 1979, fù unu di i difensori di u prucessu dettu di i 21: u primu prucessu di i primi militanti clandestini di u FLNC. Dopu à què, fù prisente ind’ogni prucessu ligatu à u muvimentu corsu, à tal’puntu chì averebbe fattu parte di a lista di cinque militanti corsi ch’è i servizii sicreti francesi vulianu tumbà (i quattru altri eranu Iviu Stella, Petru Poggioli, Alanu Orsoni è Leo Battesti). Bastonnieru di u tribunale di Bastia in u 1985, è militante di prim’ora, avia cumminciatu in u PSU per andà à l’ARC, è in l’anni ottanta, à a Cuncolta Naziunalista (da a quale dinveterà Sicretariu Ghjenerale), fù unu di l’avucati corsi i più famosi.
Unu di i so successi i più grandi fù, à a fine di l’anni ottante, a cundannazione di u statu francese à a Corte Internaziunale per fatti di turtura nant’à un indipendentistu corsu: Felice Tomasi (firmatu 5 anni in prighjone illeghjitimamente).
Fubbe dinù unu di i difensori di Yvan Colonna accusatu di avè tumbatu u prifettu Claude Erignac. Dopu à a creazione di Corsica Nazione in u 1992, pigliò e so distanze incù u muvimentu senza mai rinegà e so idee, firmendu sempre l’avucatu brigliante ch’ellu hè sempre statu.
Ultimamente, participò à a cuncezzione di "Corsica Libera".