A Traversa (boulevard Paoli)

A Traversa, chjamata in francese boulevard Paoli, hè u nome di un carrughju di Bastia. Hè u carrughju principale di u centru storicu di a cità. Hè assai cummerciante è vivu. Hè un assu di cumunicazione impurtante, chì permette di raghjunghje in a so parte u palazzu di ghjustizia è u cullegiu Simon Vinciguerra è in a so parte bassa permette d'accede à a gare è à u portu di cummerciu.

U crucivia di A Traversa è di u carrughju César Campinchi

Storia

A Traversa nasce cù u sviluppu di Bastia à u seculu 18. Tandu l'urbanisti decidenu di creà un assu novu di cumunicazione chì cambia di pettu à i carrughji stretti è storti di Terra Vechja. Hè decisu di custruisce casali grandi è alti, è à mezu una via larga è diritta, più commuda in u 1831.

Porta prima u nome di "Traverse Royale", chì a Francia hè in u 1838 sott'à a "monarchie de juillet" è u rè Philippe-Auguste.

U pianu d'urbanisimu prevede una cueranza in sta parte di a cità chì ùn hè ancu custruita : tutte e case devenu fà quattru piani (decisione di l'8 maghju 1839).

Sott'à u segondu imperu, u nome di A Traversa cambia hè diventa "traverse numéro 2" o "nouvelle traverse". A "traverse numéro 1" essendu u carrughju chì và da a chjesa di San Ghjisè à a Piazza d'Arme, è a "traverse numéro 3" l'attuale carrughju César Campinchi".

U pianu di a cità di 1844 ci mostra chì A Traversa si ferma tandu à u livellu di u carrughju Miot. Tandu a Piazza Santu Niculà hè un locu disertu, in u quartieru di u Fangu ùn ci sò ch'è giardini.

Pianu di Bastia in u 1866

Differenti nomi

Una vista di A Traversa

Stu viale s'hè prima chjamatu "Nouvelle traverse" o "traverse numéro 2".

Hà parte in sù, da u Palazzu di Ghjustizia à u numeru 12 (induve ci hè un bellu purtò in marmeru) s'hè chjamata più tardi "boulevard du Palais", è a parte in bassu "boulevard Paoli".

In u 1941, a parte in sù piglia u nome di "boulevard Géneral Bonaparte".

Eppo hè in u 1943 chì tutta a traversa hà pigliatu u nome di "boulevard Paoli".

Architettura

I casali di a Traversa sò di stile tuscanu. Piglianu per mudellu i palazzi taliani. E facciate sò elegante è decurate, spessu culurite. E finestre anu tutte persiane cun ghjelusie è ci si trovanu balconi in ferru.

In u 1839, primurosa di dà una cuerenza à stu corsu novu, a municipalità impone à e custruzzione d'avè quattru piani d'abitazione in più di e butteghe è magazini à u pianterrenu. Sott'à u secondu imperu, sò custruiti casali novi, sopr'à tuttu in a parte bassa. Questi quì anu certe volte un livellu in più.

Lochi d'interessu

L'anzianu cullegiu ghjesuitu, attuale cullegiu Simon Vinciguerra

U cunventu di i Ghjesuiti

Hè u più anticu stabilimentu d'insignamentu di Corsica. I Ghjesuiti sò un ordine religiosu fundatu da Ignaziu de Loyola. Avianu per missione a pacificazione è l'educazione di e pupulazione povere.

A so custruzzione hè decisa in u 1601, è i primi corsi sò dati in u quartieru ingiru à l'attuale cullegiu. Ma a custruzzione di u cullegiu hè longa. Principia in u 1612. Apre in u 1647, ma hè sempre un cantieru. Ci vole à aspettà u 1680 per l'apertura officiale.

Dopu à a rivuluzione francese i Ghjesuiti sò espulsi. U stabilimentu ferma un locu d'insignamentu. Diventerà cullegiu reale, eppo liceu imperiale. Avà si chjama cullegiu Simon Vinciguerra.

U Palazzu di Ghjustizia

A so custruzzione principia in u 1852. Hè inauguratu sei anni più tardi, in u 1858.

U palazzu di ghjustizia

U casale Valery

Era un casale impurtante di A Traversa. Bumbardatu durante a seconda guerra mundiale, hè statu lampatu in pianu più tardi.

U munumentu dedicatu à Pasquale Paoli

U bassurilievu fattu da Louis Patriarche

Vicinu di A Traversa, à u sbuccà di u carrughju Salvatore Viale, in e scale chì collanu à u teatru ci hè un munumentu dedicatu à Pasquale Paoli. Hè rapresentatu in un bassurilievu. Hè l'opera di u scultore bastiacciu Louis Patriarche.

Ci hè dinù una lastra cumemurativa, messa in u 2008.

Da vede dinù

• Carrughju Napuleò
• Vechju Portu
• A Citatella
• U Mercà