Tarpeia

Tarpeia era una verghjina vestali, figliola di u cummandanti di a citatedda rumana, Spurio Tarpeio, chì à i tempi di Romulu fù currotta incù l'oru da u rè sabinu, Titu Tazio è parmissi ch'è l'armati numichi intrissini in a citatedda furtificata incù l'ingannu.

U suppliziu di Tarpeia in un dinariu (piccula muneta d'arghjentu di l'antica Roma).

A lighjenda

Suldati chì lanciani i so scudi annantu à Tarpeia (frammentu di u frisgiu di a Basilica Emilia - I seculu d.C.).

A rocca tarpea, com'edda apparisci oghji.

Titu Liviu conta:

« ...a ghjuvanetta era andata dopu à i mura à circà l'acqua par i culti rituali. Dopu avè la catturata, a sfracichetini sottu u pesu di i so armi è l'uccisini, sii par dà l'idea chì a citatedda era stata cunquistata più incù a forza chì incù qualsiasi antru mezu, sii par furniscia un asempiu in modu chì più nisciunu dilatori pudissi cuntà annantu à a parola data. »

(Liviu, Ab Urbe cundita libri, I, 11. Virsioni Guido Reverdito.)

A ghjuvanetta par u desideriu di pusseda i bracciuletti d'oru ch'eddi purtavani i sabini à u bracciu mancu, avaria cusì apartu, a notti siguenti, a porta di a cità à i numichi cummandati da Titu Tazio, i quali, appena intruti, li ghjittàni, prima frà tutti u so cummandanti Titu Tazio, micca solu i bracciuletti d'oru ma dinò i so pisanti scudi, uccidendu la par via di u pesu è di u numaru di l'ughjetti chì l'aviani cuparta. U stessu Tarpeo, u babbu di Tarpeia, fù accusatu di tradimentu è cundannatu.

Plutarcu conta altri dui virsioni di a storia di stu parsunaghju mitulogicu feminicciu:

1. a prima sustinia (sicondu a virsioni di un certu Antigono, forsi Antigono di Caristo) ch'edda era a figliola di u stessu Titu Tazio, u cummandanti di i Sabini, a quali fù custretta à viva incù Romulu è ebbi sta sorti par vulintà di u babbu;
2. a siconda racuntava a virsioni di un certu Similo, abbastanza invirisimili par u stessu Plutarcu, sicondu u quali Tarpeia avaria cunsignatu a rocca capitulina à i Celti Boii, micca à i Sabini, apposta chì s'era innamurata di u so rè.

Si conta, infini, chì u fattu chì Tarpeia fussi stata sippiddita probbiu in i circonda di una rocca posta nantu à u Campidogliu, da a stessa ni presi u nomu: rupes Tarpeia o saxum Tarpeiumi o Tarpeius monsi (Rocca Tarpea o Sassu tarpeu), alminu finu à quandu Tarquiniu Prisco o Tarquiniu u Superbu ùn fecini micca trasfiriscia i resti di a zitedda è didicàni u locu à Ghjovi. Sempri à u tempu di Plutarcu esistia una rupes Tarpeia nantu à u Campidogliu, da a quali erani ghjittati i parsoni malvaghji.

Bibliugrafia

• Liviu, Ab Urbe cundita libri, I.
• Dionigi d'Alicarnassu, VII è VIII.
• Plutarcu, Vita di Romulu, 17.

Da veda dinò

• Rocca tarpea