Referendum facultativu

U referendum facultativu hè un miccanismu di a dimucrazia diretta in Svizzara è in u Liechtenstein.

Storia

A maiò parti di i cantoni campagnoli pratichighjani dapoi assà à longu certi formi di dimucrazia diretta, com'è a Landsgemeinde glarunesa chì esisti omancu dapoi 1275 ed hè praticata ancu oghji.

Hè mentri i cambiamenti maiò pulitichi suvitendu a Rivuluzioni francesa è l'attu di midiazioni chì nasciarani dinò in iSvizzara l'aspirazioni à più di libartà, in particulari à traversu à a " sucità svizzara " po' in u periodu chjamatu " rigenerazioni " chì suvitò a rivuluzioni francesa di 1830. A custituzioni di u 1848, instaurata da i muvimenti radicali dopu à a guerra civili di u Sonderbund, prividia un puteri riprisintativu è dicentralizatu chì ùn cunvinciti ch'è in parti i partiti vinti. Ed hè in u 1874, à u mumentu di a prima rivisioni di a Custituzioni, ch'iddu fù aghjuntu u drittu di referendum facultativu chì parmittia à a pupulazioni di cuntrà u puteri puliticu in piazza.

Funziunamentu

Un bullitinu di votu svizzaru in u 2009

In Svizzara, l'intruduzioni è a rivisioni di a leghji federali à u sensu furmali sò suttumissi à u referendum facultativu. Quandu una leghji nova o una leghji rivisata hè publicata in a Cascia federali, ogni citatinu uppostu à a so intrata in vigori disponi d'un cumportu di centu ghjorna par racodda 50000 firmi di citatini svizzari. In casu mai, a leghji divarà essa suttumissa à u referendum è ùn intrarà in vigori ch'è s'è a maiuranza di i vutanti si prununcia di manera favurevuli.

A leghji devi dinò essa uottumissa à u referendum s'è ottu cantoni ni facini a dumanda. U zogliu di ottu cantoni hè statu fissatu in u 1848 di modu à impidiscia chì i setti cantoni di u Sonderbund fussini in misura di esigia soli un referendum.

S'è nimu ùn cheri u referendum o s'è a vindemia di signatura fiasca, a leghji entri in vigori senza referendum.

Tutti i cantoni svizzari mettini dinò à dispusizioni di i so citatini u stuvigliu di u referendum facultativu è certi cantoni svizzari vani sin'à suttumetta, in i sistemi di referendum ubligatoriu o facultativu l'appruvazioni di crediti spiciali affittati à a rializazioni di travaddi publichi (referendum finanziariu). Ci voli dinò à aghjunghja à quissa u referendum custruttivu, esistindu in Berna è in Zurich par indittu, chì parmetti di ùn uppona si micca di manera catigorica à una leghji, ma di prupona un' altirnativa à i punti cuntistati di u testu vutatu da u parlamentu. I dui testi sò tandu suttumissi à u votu pupulari è una quistioni priférenziali parmetti di dicida s'è i dui sò accittati.