Passerottu

U passerottu
Passer italiae
Classificazione scentifica
Regnu	Animalia
Divisione	Chordata
Classa	Aves
Ordine	Passeriformes
Famiglia	Passeridae
Generu	Passer
Nomu binuminali
Passer italiae Vieillot, 1817

U passerottu (o passarottu) ( Passer italiae) hè un acellu chì face parte di a famiglia di i passeridae.

Descrizzione

U passerottu s'assumiglia à a spezia cumuna in Europa passer domesticus, ma hà i bucelli bianchi è una curona russiccia-bruna in capu, com'è u passerottu spagnolu (passer hispaniolensis). U passerottu hè longu 15-17 cm cm. Pesa da 25 à 35 grammi. A so apertura alare hè 20-30 cm. Face u so nidu in e case, i bastimenti o ind'i l'arburi.

Biolugia

U passerottu hè un acellu suciale chì campa in bandi, cumposti da parechji individui. Hè attivu mentre a ghjurnata è passa a maiò parte di u so tempu à circà u cibu in pianu. U so rigimu alimintare si cumpone per u più di granelli, ma pò dinù cunsumà insetti è altri picculi invertebrati.

A riproduzione ind'è u passerottu hà locu mentre a staghjone di i nidi, chì si situeghja di regula trà u mese di marzu è di lugliu. I coppii custruiscenu nidi à forma di cuppa in machjoni o arburi, à spessu in a vicinanza di e zone di cibu. A femina dipone di regula trà 3 è 5 ovi, ch'ella incuba durante circa duie simane. I dui parenti participeghjanu à l'alimentazione di i ghjovani piugoni sin'à ch'elli sianu pronti à chittà u nidu.

U passerottu hè onnivoru: manghja frutti, insetti, varmi è ancu ciò ch'ellu ghjetta l'omu.

Ripartizione

U passerottu hè endemicu di a penisula taliana, induv'ellu hè largamente spartu. U so areale, in u Mare Terraniu hè l'Italia, a Corsica, a Sicilia, Malta è a Creta. In a parte à punente di a Sicilia è in Sardegna, ùn si scontra micca u passerottu ma una spezia chì 'ss'assumiglia moltu: u passerottu spagnolu (passer hispaniolensis). In u nordu di l'Africa, ci hè una forma media trà u passerottu è u passerottu europeu, a spezia più cumuna in Europa: passer domesticus.

Priferisce l'ambienti aperti tali e pratuline, i campi cultivati è e zone urbane.

In Corsica

U piulacone

Passer italiae

U passerottu hè cumunu è prisente tuttu l'annu in Corsica. Hè prisente in l'isula sana, insin'à 1050 metri. Ma hè assente di i lochi ind'ellu ùn ci hè micca l'omu, è stà piuttostu in i paesi è in e cità. Ma pò accade chì una culonia di passerotti stessi luntanu da un paese. In l'areale di a punta suttana di a Corsica, in u triangulu Bonifaziu-Pianottulu-Sant'Amanza, accade à spessu di truvà una forma media, cruciata, trà u paserottu è u passerottu spagnolu (passer hispaniolensis), chì hè prisente in Sardegna. 'Ssa forma hè u resultatu da i scambii trà e duie spezie in e Bocche di Bonifaziu (Moneglia 2009). Ma u passerottu spagnolu dinò hè prisente in a parte suttana di a Corsica (Thibault 1985).

Sistematica

Difatti, u statutu di a tassunumia di u passerottu hè incertu ed hè sempre in dibattitu. Certi u cunsidereghjanu cum'è una sottuspezia di passer domesticus. D'altri invece l'anu cunsideratu cum'è una sottuspezia di u passerottu spagnolu (passer hispaniolensis). Ma in a sistematica muderna, u passerottu hè piuttostu cunsideratu cum'è una forma specifica: Passer italiae. 'Ssa forma specifica seria derivata da una spezia independente di passerottu chì era prima in Africa ma chì era sparita di u so areale nativu è chì si seria sparta dopu in u so areale attuale.

Parechji sinonimi di Passer italiae sò:

• Passer hispaniolensis italiae
• Passer domesticus italiae

Lessicu

Altri nomi corsi di u passerottu sò: u passu, a passula, u passaru casanu.

Referenze

• Moneglia, Pasquale, U Passerottu, Stantari, 17, 2009 (in francese)
• Thibault, Jean-Claude, Acelli di Corsica - Les oiseaux de Corse, 1983, PRNC (in francesu)
• J.-C. Thibault, Connaître les oiseaux de Corse - Acelli di Corsica, Ed. Albiana, 2006

Altri prugetti

• Passer italiae annantu à Wikimedia Commons.