Leonello Lomellini

Leonello Lomellini (Ghjenuva, 1350 – Ghjenuva, 1420) hè un omu puliticu ghjenuvese chì hè statu guvernatore di a Corsica pè u contu di a Republica di Ghjenuva, versu a fine di u seculu XIV è u principiu di u seculu XV.

Biugrafia

Hè natu versu u 1350 d'una famiglia nobile : u so babbu hè Napuleone Napoleon Lomellini è a so mamma Teodora Di Negro. Da ghjovanu hà seguitatu l'andatura di u babbu cum'è mercante.

In u 1378 face parte di i sei membri fundatori di l'associu cummerciale, chjamatu a maona, incaricatu di guvernà a Corsica pè u contu di a Republica di Genuva.

Lomellini sbarca in l'isula cun Giovanni di Magnerri per piglià u postu di guvernatore, ma immediatamente deve scumbatte cun l'ostilità di Arrigo della Rocca, un signore corsu chì s'hè ribellatu contr'à i Ghjenuvesi. Sustenutu da l'Aragone, u conte Arrigu face prigiuneru Lomellini. Hè cappiatu contr'à u pagamentu di 4000 fiorini.

Di ritornu in Corsica in u 1383, Lomellini si stalla in Biguglia. Ma u locu hè difficiule à difende è u guvernatore decide di stabiliscesi in altrò.

Prova prima di furtificà à Aleria, ma ùn ci riesce per via di l'attacchi di Arrigu di a Rocca . In fine di contu decide di creà una furtificazione nova più à u nordu, vicinu di un paese di piscadori chjamatu Portu Cardu. Sta torre hè chjamata Il Fortino o a Bastìa. Hè cusì ch'ella nasce a futura cità di Bastia.

Lomellini riesce à ripiglià u cuntrollu di a zona sittintriunali di l'isula. Ma in u 1391 fù scunfittu di novu durante una insurrezzione guidata da Paolino da Campo Casso è hè obligatu à vultà in Ghjenuva, induve sperava ottene rinforzi.

Davanti à l'ostilità di i Corsi contr'à a Maona, u doga Antoniotto Adorno decide d'ùn cunfirmalli l'amministrazione di a Corsica.

Volta in l'isula cun u fratellu Andrea è u so cuginu Valentino. In 1407 si battenu contru à Vincentellu d'Istria, sustenutu da Martinu I d'Aragone .

Leonello Lomellini ritorna definitivamente in Ghjenuva induve, hà persu una grande parte di a so influenza pulitica. In l'ultimi anni di a so vita s'occupa principalmente di e so attività mercanti, chì li danu grandi prufitti. S'era maritatu cù Pietra di Luciano Doria, cun quale hà avutu parechji figlioli : Matteo, chì hà occupatu parechji posti pulitichi in Ghjenuva, Stefano è Clarice.