Focu

forma di cumbustione

U focu hè l'ossidazione rapida di una materia (u combustibile) in u prucessu chimicu esotermicu di a cumbustione, liberendu u calore, a luce è diversi produtti di riazzione.[1] U focu hè caldu perchè a cunvirsione di a doppia lega debule di l'ossigenu muleculare, O2, in leghe più forte in i produtti di cumbustione, u diussidu di carboniu è l'acqua, libereghja l'energia (418 kJ da 32 g d'O2) ; l'energie di lega di u combustibile ùn ghjocanu ch'è un rollu minore quì. À un certu attimu di a riazzione di cumbustione, chjamatu puntu d'accendimentu, e fiamme sò produtte. A fiara hè a parte visibile di u focu. E fiare si cumponenu per u più di diussidu di carboniu, di vapore d'acqua, d'ossigenu è d'azotu. S'elli sò abbastanza calde, i gasi ponu esse iunizati per produce u plasma. Sient'è e sustanze infiarate è l'eventuale impurità steriore, u culore di a fiamma è l'intensità di u focu seranu differente.

U focu di legnu.

U focu, in a so forma a più currente, pò inghjennà una cunflagrazione, chì hà u putenziale di incausà i danni fisichi per via di a cumbustione. U focu hè un prucidimentu impurtante chì affitteghja i sistemi eculogichi di u mondu sanu. L'effetti pusitivi di u focu cumprendenu a stimulazione di a crescita è u mantinimentu di diversi sistemi eculogichi. I so effetti negativi cumprendenu i risichi per a vita è i bè, l'inguinamentu atmusfericu è a cuntaminazione di l'acqua. S'è u focu elimineghja a vegetazione prutettrice, e forte piosse ponu caghjunà un'aumentu di l'erusione di a terra da l'acqua. Di più, quandu a vegetazione hè brusgiata, l'azotu ch'è ella cuntene hè liberatu in l'atmusfera, in cuntrariu di l'elementi cum'è u putassiu è u fosfuru chì fermanu in e cennere è sò prestu riciculati in a terra. 'Ssa perdita d'azotu cagiunata da un incendiu caghjuneghja una riduzione à longu andà di a fertilità di a terra, ma 'ssa ficundità pò putenzialmente esse ricuperata chì l'azotu muleculare prisente in l'atmusfera hè "fissatu" è cunvertutu in ammuniacu da i finomini naturali tali a saietta è da e piante leguminose "fissatrice d'azotu" cum'è u trifogliulu, i pisi è i fasgiulini.

U focu hè statu imprudatu da l'esseri umani in i rituali, in agricultura per decippà a terra, per scucinà, per produce u calore è a [[luce]+, per a signaletica, à fini di propulsione, per fonde, stazzunà, incinnerà i rumenzuli, incinnerà, è cum'è arma o modu di distruzzione.

Pruprietà fisiche mudificà

Chimica mudificà

L'incendii spezzanu quandu un materiale inflammabile o combustibile, assuciatu à una quantità sufficente di un ossidante tale l'ossigenu gasosu o un antru cumpostu riccu di ossigenu (bench'elli esistenu l'ossidanti senza ossigenu), hè espostu à una fonte di calore o à una timperatura ambiente superiore à u puntu d'accendita di u mischiu combustibile ossidendu, è hè capace di mantene un tassulu d'ossidazione rapida chì produce una riazzione in catena. Hè ciò ch'è omu chjama cumunamente u tetraedru di u focu. U focu ùn pò esiste senza ch'è tutti 'ssi elementi sianu in piazza è in e bone prupurzione. Per indettu, un liquidu inflammabile ùn principierà à brusgià ch'è s'è u combustibile è l'ossigenu sò in e bone prupurzione. Certi mischii combustibile-ossigenu ponu necessità un catalizatore, una sustanza chì ùn hè micca cunsumata, quandu ella hè aghjunta, in una riazzione chimica à u mumentu di a cumbustione, ma chì permette à à riattivi di brusgià più faciule.

 
U focu hè affittatu da a gravità. À manca: una fiara annantu à Terra; à dritta: una fiara à bordu di l'ISS

À quandu accesu, una riazzione in catena deve produce si, da a quale i fochi ponu intrattene u so calore propriu da a liberazione supplementaria d'energia termica in u prucidimentu di cumbustione è ponu diffonde si, à pattu chì ci sia un appruvvisiunamentu cuntinuu in comburente è in combustibile.

S'è l'ossidante hè l'ossigenu di l'aria ambiente, a prisenza di una forza di gravità, o di una forza simile cagiunata da l'accilerazione, hè necessariu per produce a cunvezzione, chì elimineghja i produtti di cumbustione è arreca l'ossigenu à u focu. Senza gravità, un focu si circonda prestu di i so propii produtti di cumbustione è di di gasi non ossidanti di l'aria, chì escludenu l'ossigenu è spinghjenu u focu. Hè perchè u risicu d'incendiu in un vascellu spaziale hè debule quandu ellu hè à rota libera in buluu inerziale, ciò chì ùn s'appieca micca s'è l'ossigenu hè furnitu à u focu da un prucidimentu altru ch'è a cunvezzione termica.

U focu pò esse spintu ritirendu unu di d'elementi di u tetraedru di u focu. Pigliemu l'esempiu di una fiamma di gasu naturale, cum'è quella di un brusgiadore di cucinara. U focu pò esse spintu da unu di i seguenti modi:

  • tagliendu ne l'alimentazione in gasu, ciò chì cancella a fonte di combustibile;
  • cuprendu ne cumplittamente a fiara, ciò chì l'affoca chì a cumbustione usa l'ossidante dispunibile (l'ossigenu di l'aria) è u culloca in a zona intornu à a fiara incù u CO2;
  • l'appiicazione d'acqua, chì ritira u calore di u focu più prestu ch'è u focu ùn pò produce la (à listessu modu, suffià forte annantu à una fiara cullucherà u calore di u gasu in traccia di brusgià di a so surghjente di combustibile, à listessu fine);
  • o l'appiicazione di un produttu chimicu ritardadore tale u Halon annantu à a fiara, chì ritarda a riazzione chimica stessa sinu à ciò ch'è u tassulu di cumbustione sia troppu lentu per mantene a riazzione in catena.

Invece, u focu hè intensificatu aumintendu u tassulu glubale di cumbustione. I metudi per pervene ci cunsistenu à equilibrà l'apportu di combustibile è di comburente in e prupurzione stechiometriche, à aumintà l'apportu di combustibile è di comburente in 'ssu mischiu equilibratu, à aumintà a timperatura ambiente affinch'è u calore propiu di u focu possa megliu intrattene a cumbustione, o à furnisce un catalizatore, un mezu micca riattivu in u quale u combustibile è u comburente ponu riagisce più faciule.

Fiamma mudificà

 
A fiara di una candela

Una fiamma hè un mischiu di gasu è di solidi in riazzione chì emette a luce visibile, infrarossu è qualchì volta ultravioletta, chì u so spettru di frequenza dipende di a cumpusizione chimica di a materia in cumbustione è di i produtti di riazzione intermidiarii. In numerosi casi, cum'è a cumbustione di materie organiche, per esempiu u legnu, o a cumbustione scumpletta di gasu, e particule solide incandescente chjamate fulighjine producenu u luciore famigliare di u "focu". 'Ssa luce hà un spettru cuntinuu. A cumbustione cumpletta di u gasu hà un culore turchinu pallidu duvutu à l'emissione di un irraghjamentu à lunghezza d'onda unica pruvenendu da diverse transizione elettroniche in e molecule azzizzate furmate in a fiara. Di regula, l'ossigenu hè implicatu, ma l'idrogenu brusgente in u cloru produce ancu una fiamma, pruducendu u cloruru d'idrogenu (HCl). D'altre cumbinazione pussibile pruducendu e fiare, frà assai altre, sò u fluoru è l'idrogenu, è l'idrazina è u tetrossidu d'azotu. E fiamme di l'idrogenu è di l'idrazina sò dinù turchinu pallidu, mentre ch'è a cumbustione di u boru è di i so cumposti, valutati per mezu à u 20u seculu cum'è carburante à alta energia per i mutori à riazzione è e fusee, emette una fiamma verde intensa, ciò chì li vale u sopranome infurmale di "dracone verde".

U splindore di una fiara hè cumplessu. L'irraghjamentu di u corpu neru hè emessu da e particule di fulighjine, di gasu è di combustibile, benchì e particule di fulighjine sianu troppu chjuche per cumpurtà si cum'è corpi neri perfetti. Ci hè ancu un'emissione di fotoni da l'atomi è e molecule diseccitati in i gasi. Parte assai di l'irraghjamentu hè emessa in e fasce visibile è infrarossi. U culore dipende di a timperatura per l'irraghjamentu di u corpu neru, è di a cumpusizione chimica per i spettri d'emissione. U culore supranante in una fiara cambia incù a timperatura. A fotografia di u focu di furesta à u Canada hè un eccellente esempiu di 'ssa variazione. Vicinu à a terra, induve a maiò parte di e brusgiature anu locu, u focu hè biancu, u culore u più caldu pussibile per e materie organiche in generale, o giallu. Sopra à a rigione gialla, u culore passa à l'aranciu, chì hè più fretu, po à u rossu, chì hè ancu più fretu. Sopra à a zona rossa, a cumbustione ùn si produce più è e particule di carboniu micca brusgiate sò visibile sottu forma di fume neru.

 
Fotografia di un focu pigliata incù un'espusizione di 1/4000u di siconda

A ripartizione cumuna di una fiara in e cundizione di gravità nurmale dipende di a cunvezzione, chì a fulighjine hà tindenza à cullà in cima à una fiamma generale, cum'è in una candela in e cundizione di gravità nurmale, ciò chì a rende gialla. In microgravità o in assenza di gravità, cum'è in un ambiente di u spaziu straatmusfericu, a cunvezzione ùn si produce più, è a fiamma diventa sferica, incù una tindenza à diventà più turchina è più efficace (bench'ella possi spinghje si s'ella ùn hè micca spustata rigularmente, chì u CO2 esciutu da a cumbustione ùn si sperguglieghja micca tantu faciule in microgravità, è hà tindenza à affucà a fiamma). Esistenu parechje spiigazione pussibile à 'ssa differenza, chì a più prubabile hè ch'è a timperatura hè abbastanza sparta affinch'è a fulighjine ùn si forma micca è ch'è a cumbustione sia cumpletta. I sperimenti fatti da a NASA svelanu ch'è e fiamme di diffusione in microgravità permettenu di ossidà cumplittamente più di fulighjine dopu a so produzzione ch'è e fiare di diffusione annantu à Terra, datu una seria di meccanismi chì si cumportanu in modu differente in microgravità rispettu à e cundizione di gravità nurmale. 'Sse scuperte anu l'appiicazione putenziale in e scenze appiicate è l'industria, in particulare riguardu à u rindimentu energeticu.

In i mutori à cumbustione, varie misure sò pigliate per eliminà una fiara. U metudu dipende per u più da u fattu chì u carburante sia u pitroliu, legnu o un carburante à alta energia cum'è u cherosene.

Timperature adiabatiche tipiche mudificà

A timperatura adiabatica di a fiamma di un coppiu combustibile ossidendu datu hè quella a a quale i gasi aghjunghjenu una cumbustione stabile.

Vistighi fussili mudificà

I vistighi fussili di u focu appariscenu per a prima volta incù u stabilimentu di una flora terranea in u periodu Ordovicianu mediu, 470 milioni d'anni fà, permittendu l'accumulu d'ossigenu in l'atmusfera cum'è mai capunanzu, cum'è e nuvelle sturbe di piante terranee u pumpavanu cum'è un rumenzulu. Quandu 'ssu cuncintramentu varcava 13%, i fochi di furesta diventavanu pussibili. I fochi di furesta sò minziunati per a prima volta in l'archivie fussile di u Silurianu superiore, 420 milioni d'anni fà, da i fussili di piante carbunate. Eccituatu una lacuna contruversa à u Devunianu superiore, u carbone di legnu hè prisente dipoi tandu. U livellu d'ossigenu atmusfericu hè strettamente ligatu à a prevalenza di u carbone di legnu : hè chjaru ch'è l'ossigenu hè u fattore chjave di l'abbundanza di di fochi di furesta. U focu hè ancu diventatu più abundante quandu e graminacee anu ragiatu è sò diventate u compunente supranante di numerosi ecusistemi, à l'incirca 6 à 7 milioni d'anni fà; 'ssu legnu d'accendimentu hà furnitu l'esca chì hà permessu una prupagazione più rapida di u focu. 'Ssi incendii generalizati ponu avè iniziatu un prucidimentu di ritroazzione pusitiva, da qualessu elli anu produttu un clima più caldu è più seccu, più prupiziu à u focu.

Scenza di u focu è eculugia mudificà

Ogni ecusistema naturale hà u so propiu rigimu di focu, è l'organismi in 'ssi ecusistemi sò adattati o dipendenti di 'ssu rigimu di focu. U focu crea una mosaica di differente lenze d'ambiente, ognuna à un stadiu differente di successione. Differente spezie di piante, di animali è di microbi si spicializeghjanu in u sfruttamentu di un stadiu particulare, è criendu 'ssi differenti tipi di lenze, u focu permette à un più grande numeru di spezie d'esiste in un paisaghju.

A scenza di u focu hè un ramu di e scenze fisiche chì cumprende u cumpurtamentu, a dinamica è a cumbustione di u focu. L'appiicazione di a scenza di u focu cumprendenu a prutezzione contru à l'incendii, l'inchieste annantu à l'incendii è a gistione di l'incendii di furesta.

Cuntrollu umanu mudificà

I primi cuntrolli umani mudificà

 
Bushman accindendu un focu in Namibia

A capacità di ammaistrà u focu hà custituitu un cambiamentu radicale in l'abitudine di di primi esseri umani. U fattu di fà u focu per ingenerà u calore è a luce hà permessu à l'omini di coce i cibi, aumintendu simultaneamente a varietà è a dispunibilità di i nutrimenti è riducendu e malatie tumbendu ne l'organismi prisenti in drentu. U calore produttu aiutava ancu l'omini à stà à u caldu per tempu fretu, permittendu li cusì di campà in i climi più freschi. U focu tenia ancu i predatori nutturni à distanza. Omu trova e tracce di cibi cotti dapoi 1 milione d'anni, benchì u focu ùn sia prubabilmente micca statu usatu di manera cuntrullata nanzu à 400000 anni. Hè interessante di nutà ch'è a resistenza à l'inguinamentu di l'aria hà principiata à evoluà in senu à e pupulazione umane in un tempu simile. L'usu di u focu hè diventatu prugrissivamente più suffisticatu, incù a so utilisazione per crià u carbone di legnu è per cuntrullà a fauna selvatica, e dicine di migliaie d'anni fà.

U focu hè ancu statu usatu mentre seculi è seculi cum'è metudu di tortura è d'esecuzione, cum'ella ne tistimunieghja a morte da u focu è ancu i dispusitivi di tortura tali u stifale di ferru, chì pudia esse empiutu d'acqua, d'oliu o ancu di piombu, po scaldatu annantu à un focu apertu per l'agunia di quellu chì la purtava.

 
Hambourg dopu quattru bumbardamenti incendiarii di lugliu 1943, chì anu tombu à l'incirca 50000 persone.

Mentre a rivoluzione neulitica, à u mumentu di l'intruduzione di l'agricultura basata annantu à a biada, e pupulazione di u mondu sanu anu usatu u focu cum'è stuvigliu di gistione di u paisaghju. 'Ssi fochi eranu di solitu e brusgere cuntrullate o i "fochi freti", à pettu à i "fochi caldi" incontrullati, chì dannighjeghjanu a terra. I fochi caldi distrughjenu e piante è l'animali, è mettenu in priculu e cumunità. Hè particularmente un prublema in e fureste d'oghje induve a brusgera tradiziunale hè impidita cù u fine di incuragisce a crescita di e culture di legnu. I fochi freschi sò di solitu effittuati di veranu è di vaghjimu. Dirrascanu a machja aperta, brusgendu a biomassa chì puderia scruchjà un focu caldu s'ella diventava troppa densa. Offrenu una più grande varietà di mezi, ciò chì hè prupiziu à a diversità di u salvaticume è di e piante. Per l'omu, permettenu di travirsà e fureste dense è impraticabile. Un'antra utilisazione di u focu da l'omu in u quatru di a gistione di u paisaghju hè u so usu per decippà e terre per l'agricultura. A cultura annantu à murticciu hè dinù currente in parte assai di l'Africa trupicale, di l'Asia è di l'America suttana. "Per i picculi agricultori, si tratta di un mezu praticu di decippà e zone invadite da a vegetazione è di liberà i nutrimenti di a vegetazione annantu à pede in a terra", hà dichjaratu Miguel Pinedo-Vasquez, eculogistu à u Centru di ricerca è di cunsirvazione di l'ambiente di l'Istitutu di a Terra. Eppuru, 'ssa strategia utule hè ancu problematica. L'accriscimentu di a pupulazione, a frammintazione di e fureste è u riscaldamentu climaticu rendenu a superficia di a terra più sugetta à l'incendii scappati di di più impurtanti. 'Ssi incendii nocenu à l'ecusistemi è à l'infrastrutture umane, cagiuneghjanu i prublemi di salute è creanu e spirale di carboniu è di fulighjine suscettibile di prupizià un riscaldamentu ancu più impurtante di l'atmusfera, è dunque di pruvucà di più incendii. Oghje, à a scala mundiale, micca di menu di 5 milioni di chilomitri quatrati, sia una superficia equivalente à più di a mità di quella di i Stati Uniti d'America, brusgianu in core di un'annu datu.

Cuntrollu umanu ultiriore mudificà

Esistenu numerose appiicazione muderne di u focu. In u so sensu u più largu, u focu hè usatu ogni ghjornu da guasi tutti l'esseri umani di a pianeta in un quatru cuntrullatu. L'usatori di veiculi à cumbustione interna usanu u focu ogni volta chì elli cunducenu. E cintrale termiche furniscenu l'elittricità à parte assai di l'umanità.

 
Pittura di a cattidrale è di u bastimentu di l'Accademia dopu u grande incendiu di Turku, da Gustaf Wilhelm Finnberg, 1827

L'usu di u focu in a guerra hà una longa storia. U focu era a basa di tutte e prime arme termiche. Omeru hà discrittu in dittagliu l'usu di u focu da i suldati grechi chì si sò piattati in un cavallu di legnu per brusgià Troia mentre a guerra di Troia. Più tardi, a flotta bizantina hà usatu u focu grecu per attaccà e nave è l'omini. Mentre a Prima guerra mundiale, i primi lanciafiamme muderni sò stati imprudati da l'infanteria, è sò stati muntati incù successu annantu à i veiculi blindati mentre a Seconda Guerra Mundiale. Mentre quest'ultima guerra, e bombe incendiarie sò state usate da l'Assu cum'è da l'Alliati, in particulare annantu à Tokyo, Rotterdam, Londra, Hambourgu è, notoriamente, annantu à Dresde ; in 'ssi ultimi dui casi, e timpeste di focu sò state deliberatamente pruvucate, un anellu di focu circundendu ogni cità essendu attrattu ver' di l'internu da un currente ascendente pruvucatu da un gruppu cintrale di fochi. L'armata di l'aria americanu hà ancu largamente usatu d'incendii contru à bersaghji giappunesi mentre l'ultimi mesi di a guerra, divastendu e cità intiere custruite per u più di legnu è in carta. L'utilisazione di u napalm hè stata impiigata di lugliu 1944, ver' di a fine di a Seconda Guerra Mundiale; benchì u so usu ùn aghji micca attrattu l'attinzione di u publicu innanzu a guerra di u Vietnamu. I cocktails Molotov sò ancu statu usati.

Usu produttivu per l'energia mudificà

Infiarà un combustibile libereghja l'energia usevule. U legnu era un combustibile preistoricu, è hè dinù campivu oghje. L'usu di combustibili fussili, tali u pitroliu, u gasu naturale è u carbone, in e cintrale elettriche furnisce a grande maiuranza di l'elittricità mundiale attuale. L'Agenzia internaziunale di l'energia afferma ch'è guasi 80% di l'elittricità mundiale pruvenia da 'sse fonte in u 2002. E turbine facenu dopu girà un generatore elettricu per produce l'elittricità. U focu hè ancu usatu per furnisce dirittamente un travagliu meccanicu, in i mutori à cumbustione esterna è interna.

I resti solidi imbrusgevuli di una materia combustibile lasciati dopu à un incendiu sò chjamati ferraghjine s'è u so puntu di funditura hè inferiore à a timperatura di a fiara, affinch'è elli aduniscenu po si sulidificheghjanu raffritendu, è cennere s'è u so puntu di funditura hè superiore à a timperatura di a fiamma.

Gistione di u focu mudificà

U cuntrollu avversatu di un focu per ottimizà ne a taglia, a forma è l'intensità hè di solitu chjamatu gistione di u focu, è e forme e più avanzate di 'ssa gistione, tale ch'elle eranu tradiziunalmente (è qualchì volta dinù) praticate da i cucinari, da i stazzunaghji, da i maestri di stazzona è altri, sò attività altamente qualificate. Cumprendenu e cunniscenze annantu à a scelta di i tipi di legnu, di carbone di legnu o di carbone minerale da brusgià, annantu à a manera di dispone u combustibile, annantu à a manera di alimentà u focu à tempu in e prime fase è in e fase d'intrattenimentu, annantu à a manera di modulà a quantità di calore, di fiare è di fume sicondu l'appiicazione vulsuta, annantu à a megliu manera di spinghje un focu per rianimà lu più tardi, annantu à a manera di sceglie, di cuncipisce o di mudificà e stufe à legnu, e stufe à carbone, i forni di panatteria è i forni industriali, è cetera.

Prutezzione è privenzione mudificà

I prugrammi di privenzione di l'incendii di furesta in u mondu sanu ponu imprudà e tecniche tale l'utilisazione di di fochi di furesta è e brusgere dirette o cuntrullati. L'usu di i fochi di furesta face riferimentu à ogni incendiu d'origine naturale chì hè survigliatu ma autorizatu à brusgià. E brusgere cuntrullate sò i fochi accesi da l'agenzie guvernative in e cundizione meteurulogiche menu priculose.

I sirvizii di lotta contru à l'incendii sò furniti in a maiò parte di e zone sviluppate per spinghje o cuntene l'incendii micca cuntrullati. I spinghjifochi furmati usanu l'apparechji d'incendiu, e risorse d'appruvvisiunamentu in acqua tale e cundotte d'acqua è e bocche d'incendiu o ponu imprudà u marmuzzu di classa A è B sient'è ciò chì alimenteghja u focu.

A privenzione di d'incendii cerca di riduce e surghjente d'infiammazione. A privenzione di l'incendii cumprende ancu l'educazione, cù u fine di imparà à la ghjente cume evità di pruvucà l'incendii. I bastimenti, in particulare e scole è i grandi casamenti, organizeghjanu à spessu l'esercizii d'incendiu cù u fine di infurmà è di priparà i citatini annantu à a manera di riagisce à un incendiu di bastimentu. U fattu di fà parte apposta l'incendii distruttori custituisce un incendiu criminale è hè un crimine in a maiò parte di e ghjuridizione.

I codici di custruzzione mudelli esigenu i sistemi di prutezzione passiva è attiva contru à l'incendiu per minimizà i danni risultendu da un incendiu. A forma a più currente di prutezzione attiva contru à l'incendiu hè l'installazione di schizzaghjoli. Per massimizà a prutezzione passiva contru à l'incendiu di di bastimenti, i materiali di custruzzione è l'ammubulamentu in a maiò parte di di paesi sviluppati sò testati per a so resistenza à u focu, a so combustibilità è a so infiammabilità. I tissuti d'ammubulamentu, e mocchette è e plastichi imprudati in i veiculi è i battelli sò ancu testati.

Quandu a privenzione è a prutezzione contru à l'incendiu ùn anu micca permessu di evità i danni, l'assicuranza incendia pò mitigà ne l'impattu finanziariu.

Risturazione mudificà

Differenti metudi è misure di risturazione sò usate sicondu u tipu di disguasti caghjunati da un incendiu. A risturazione dopu à un incendiu pò esse effittuata da e squadre di gistione immubiliare, u persunale d'intrattenimentu di di bastimenti o da i pruprietarii elli stessi; eppuru, cuntattà un spicialistu professiunale accirtatu di a risturazione di i danni caghjunati da un incendiu hè à spessu cunsideratu cum'è u mezu u più sicuru di risturà un bè dannighjatu da un incendiu, per causa di a so furmazione è di a so grande sperienza. A

L'imprese di risturazione di l'acque è di l'incendii sò rigulamentate da u ministeru di u cunsumu di u Statu cuncirnatu - di solitu u cunsigliu di e licenzie di d'imprisarii di u Statu.

Simbulisazione mudificà

In a filusufia chinese, u focu face parte di i cinqui elementi, incù u metallu, l'acqua, u legnu è a terra.

Indì l'alchimisti in Occidente, u focu face parte di i quattru elementi fundamentali, incù a terra, l'acqua è l'aria.

U focu hè assuciatu di solitu incù u Sole, chì anch'ellu produce calore è lume. Hè assuciatu dinù à spessu incù i vulcani.

U cultu di u focu mudificà

 

U focu hè integratu in e riligione di parechje culture è hè statu l'oggettu d'una adorazione da bon'parechji populi.

Persia mudificà

In Antichità, i Persi cunsideravanu u cultu di u focu cum'è a parte fundamentale di a so riligione è e ceremonie di u culte sò discritte di manera precisa in u Zend-Avesta. Ogni mane, i persi saltuvanau u sole chì si pisava, chì era u simbulu di u focu u più puru. Cunsideravanu dinù focu cum'è u prutttetore di i Stati è cunsirvavanu u focu sacru in i santuarii, induve ellu ùn ci mai ch'ellu si spignissi.

Grecia è Roma mudificà

In a mitologia greca, u focu hè statu arrubatu à i Dii è datu à l'omini da Prometeu.

Cristianesimu mudificà

L'usu di i cironi hè cumunu in a Ghjesa catolica è ortodossa. A fiara hè u simbulu di u Santu Spiritu.

Citazione mudificà

U focu hè citatu à spessu in a litteratura è a cultura corsa. Per esempiu, in i pruverbii:

  • Diu ti franchi di u focu, di l'acqua è di i falsi tistimonii.[2]
  • Natali à u ghjocu, Pasqua à u focu.
  • Trè pignatte à u focu, hè festa ! Trè donne in casa hè gran'timpesta!
  • Zigliara, focu è fiara.
  • Accantu à u focu, a paglia ci stà mali.
  • Chì hà bisognu di u focu, u piglia in manu.
  • Chì s'ammorcia in u ghjocu, deve mette u culu à u focu.
  • Focu d'alzu, focu falsu.
  • Duv'iddu ùn ci hè ziteddi si spinghji u focu.

o in a sprissioni:

  • surviglià à calchissia com'è u latti annantu à u focu.
  • essa un focu: hè un focu !

o in i ghjastemi.[3]

  • Chì tù crepi piccendu à focu lentu !
  • Chì si ni spassi focu è fiari.

Note mudificà

  1. 'Ss'articulu pruvene in parte da l'articulu currispundente di a wikipedia in inglese.
  2. Saravelli-Retali, 1976, A vita in Corsica per via di i pruverbii è i detti - La vie en Corse à travers proverbes et dictons, Nice: Don Bosco
  3. Milleliri, Paulu (2010) Chì tù sia..., Albiana.

Da vede dinù mudificà