Capu Verde

Capu Verde o a ripublica di Capu Verde (in portughese: Cabo Verde o República de Cabo Verde; in creolu capiverdianu: Kabu Verdi) hè un statu insulare situatu in l'Uceanu Atlanticu, à u largu di e coste di a Muritania è di u Senegale. U paese hè cumpigliatu d'un arcipelagu di 10 isule vulcaniche, cù una superficia tutale di 4.033 km². A capitale hè Praia è e lingue ufficiale sò u portughese è u creolu capiverdianu.

Republica di Capu Verde República de Cabo Verde
Mottu: Unidade, Trabalho, Progresso (Unità, Travaddu, Prugressu)
Lingue ufficiali	portughese1, creolu capiverdianu
Capitale	Praia  (124.661 ab. / 2008)
Pulitica
Forma di guvernu	Republica
Presidente	José Maria Neves
Primu Ministru	Ulisses Correia e Silva
Indipendenza	u 5 di lugliu 1975 da u Portugallu
Entrata in l'ONU	u 16 di settembre 1975
Superficia
Tutale	4.033 km²
Acque	%
Pupulazione
Tutale	525.268 ab.
Densità	146 ab./km²
Geografia
Cuntinente	Africa
Ecunumia
Muneta	Escudo capiverdianu
Varie
Festa naziunale	5 di lugliu
1 A lingua naziunale hè creolu capiverdianu chì esiste in assai varietà.

A populazione di u paese hè di 525.268 abitanti in u 2024, cù una densità di populazione di 146 ab./km². L'abitanti sò chjamati Capiverdiani.

Capu Verde hè una Ripublica. L'attuale presidente hè José Maria Neves. U mottu ufficiale hè "Unità, Travagliu, Prugressu" è a muneta l'escudo capiverdianu.

U 5 di lugliu hè u ghjornu di a festa naziunale. Cilibra l'indipendenza di l'arcipelagu da u Portugallu, in u 1975.

Geugraffia

Situazione

Capu Verde hè situatu à u largu di e coste di a Muritania è di u Senegallu. A distanza trà l'arcipelagu è a cità di Dakar hè di 630 chilometri.

Isule

Isula di Santiago

Capu Verde hè un arcipelagu di 10 isule vulcaniche. Face parte di a Macarunesia, un inseme d'arcipelaghi, cum'è l'isule Canarie, Madera è l'Azore.

Santo Antão, Capu Verde

Paesaghju vulcanicu vistu da u Pico do Fogo

L'arcipelagu di Capu Verde hè spartutu in due gruppi: l'isule Barlavento à u Nordu, è l'isule Sotavento à u Sudu.

A più grande isula hè l'isula di Santiago cù una superficia di 991 km² è una pupulazione di 236.717 abitanti.

Isule di Capu Verde

Isula	Superficia	Populazione
Santiago	991	236.717
São Vicente	227	67.163
Santo Antão	779	47.124
Fogo	476	37.421
Sal	216	14.816
São Nicolau	388	13.661
Brava	67	6.804
Maio	269	6.754
Boa Vista	620	4.209
Santa Luzia	35	0
Capu Verde	4.033	434.669

Rilievu

Capu Verde hè un paese vulcanicu. Ci sò dunque parechji munti è vulcani. U più altu hè u Pico do Fogo, un vulcanu di 2.829 metri d'altura. Hè ancu u più grande vulcanu attivu di a regione. A so ultima eruzzione data da u 2014. U Pico da Antónia hè u più altu monte di l'isula di Santiago, a più maiò isula di l'arcipalegu. Culmineghja à un altitudine di 1.394 metri.

Clima

Situatu in a zona trupicale, Capu Verde pussede un clima caldu tuttu l'annu, ma ancu aridu. E precipitazione sò scarse. E timperature sò sempri superiore à 20°C. Per esempiu, a timperatura media annuale di Praia hè di 25°C. A i mesi di ghjennaghju è frivaghju, u clima di l'arcipelagu hè influanzatu da timpeste di sabbia chì venenu di u disertu di u Sahara, cù venti à volte viulenti.

Storia

Da u XVu à u XIXu seculu

A cità è u portu di Mindelo, oghje

Mappa di l'isule di Capu Verde, rializata da Jacques-Nicolas Bellin in u 1746

L'arcipelagu hè scupertu da sploratori ghjenuvesi è portughesi versu u 1456. Prima di a scurpata da l'Auropei, l'isule eranu disabitate. In u 1462, i Portughesi ghjunghjenu à l'isula di Santiago è fundanu a culonia di Ribeira Grande, chì fù a capitale di u tarritoriu durante 250 anni. Sta culunia fù u primu stabulimentu auropeu in e zone trupicale, è fù ancu a prima culunia in Africa subsahariana. Capu Verde divinta rapidamente un puntu impurtante per a strada versu l'Americhe è per u cummerciu di i schiavi africani. I schiavi sò diportati per travaglià in piantazione in Capu Verde o per esse vinduti in America.

Sò nate assai piantazione in l'arcipelagu, principalmente per a cultura di a canna da zuccheru, sfruttate da i schiavi africani. L'isule si sò arricchite cusì, grazie à st'ecunumia di a canna, ma ancu grazie à u cummerciu marittimu è di schiavi. Durante u XVIu seculu, l'arcipelagu subisce parechji assalti stranieri. L'Ottomani, l'Inglesi è i Francesi s'interessavanu à Capu Verde. L'Inglesi ghjunghjianu in u 1585, dopu à qualchì assalti pirati.

Cum'è a fortuna di l'isule diminuia, assai Capiverdiani anu emigratu à l'isule portughese di São Tomé è Principe o in America settentriunale, induve l'industria di a caccia di balena dava impieghi. Questu era soprattuttu veru cù a fine di u cummerciu di schiavi in ​​u 1876. A i tempi di stu cummerciu, l'isule avianu sempri statu strategiche.

Capu Verde divinta un locu di passaghju per i battelli chì passanu à traversu l'ucenau Atlanticu o chì vanu versu l'uceanu Indianu passendu per e coste africane. Ma l'apertura di u Canali di Suez in u 1869 significa chì i battelli chì andavanu à u livanti ùn anu più da andà intornu à u Capu di Bona Speranza. I battelli fubbenu dunque un pocu menu numerosi. Ma in Mindelo, in l'isula São Vicente, fù criata una stazione d'appruvisiunamentu impurtante per i navi.

U XXu seculu è l'indipendenza

In u 1951, Capu Verde divinta un tarritoriu d'oltremare, cum'è l'altre culunie portughese. Durante l'anni 1950, parechji muvimenti indipendentisti nascenu in e sfarente culunie. In u 1959, u Partitu africanu per l'Indipendenza di a Guinea è di Capu Verde (PAIGC) avvia una lotta armata contr'à i culunizatori portughesi è riescenu à cuntrullà certe zone di u paese. In u 1972, u PAIGC hè ricunnusciutu da e Nazione unite cum'è ligitimu.

U 20 di ghjennaghju di u 1973, Amilcar Cabral, unu di i fundatori di u PAIGC hè assassinatu. U Portugallu ricunnuscerà l'indipendenza di u Capu Verde in u 1975. L'indipendenza hè ufficialmente firmata u 5 di lugliu. U listessu annu, Aristides Pereira diventa u primu presidente di l'arcipelagu.

Cabral vulia crià un unione trà a Guinea è Capu Verde. Ma stu sognu sparisce in u 1980, dopu à un colpu di Statu in Guinea.