Caifassu

Ghjaseppu ben Caifassu (versu 14 nanzi G.-C. - versu 46 dopu à à G.-C.), cunnisciutu simpliciamenti sottu à u nomu di Caifassu (in ebraicu : יוֹסֵף בַּר קַיָּפָא ; in grecu : Καϊάφας) in u Novu Tistamentu, era u grandi preti ghjudeiu chì, siont'è i vanghjelii, hà urganizatu un cumplottu par tumbà à Ghjesù. I fonti principali di a vita di Caifassu sò u Novu Tistamentu è i scritti di Titu Flaviu Ghjaseppu. Fora di i so interazzioni incù Ghjesù, si sà pocu affari d'altru annantu à u so mandatu di grandi preti.

Cristu davanti à Caifassu, da Matthias Stom.

Storia

U storicu ghjudeiu di u Ia seculu, Titu Flaviu Ghjaseppu, hè cunsidaratu com'è a fonti litteraria strabiblica a più affidevuli par Caifassu. I so travagli cuntenini l'infurmazioni annantu à i dati di u mandatu di Caifassu com'è grandi preti, è ancu i rapporti annantu à d'altri grandi preti, è aiutani dinò à stabiliscia una discrizzioni cuerenti di i rispunsabilità di a carica di grandi preti. Ghjaseppu (Antiquitates Judaicae 18. 33 - 35) conta ch'è Caifassu hè divintatu grandi preti mentri un periudu di turbulenza. Dichjara dinò ch'è u pruconsulu Lucius Vitellius l'Anzianu hà dipostu u sociaru di Caifassu, Annas. (Antiquitates Judaicae 18. 95 - 97). U racontu di Ghjaseppu hè basatu annantu à una fonti più anziana in a quali i titulari di u grandi sacirdoziu erani allistinati cronulugicamenti.

Siont'è Ghjaseppu, Caifassu hè statu numinatu in u 18 dopu à à G.-C. da u prifettu rumanu chì hà precedutu à Ponziu Pilatu, Valerius Gratus.

Siont'è Ghjuvanni, Caifassu era u figliastru di u grandi preti Annas, chì hè largamenti idantificatu à Ananus, figliolu di Seth, minziunatu da Ghjaseppu. Annas fù dipostu dopu à a morti d'Augustu, ma ebbi cinqui figlioli chì sirvitini com'è grandi preti dopu à eddu. I termini d'Annas, di Caifassu è di i cinqui frateddi sò :

• Ananus (o Annas), figliolu di Seth (6 - 15)
• Éleazar, figliolu d'Ananus (16 - 17)
• Caifassu, chjamatu à ghjustu titulu Ghjaseppu figliolu di Caifassu (18 - 36 37), chì avia spusatu a figliola d'Annas (Ghjuvanni 18 : 13)
• Jonathan, figliolu d'Ananus (branu 37)
• Theophilus ben Ananus (37 - 41)
• Matthias ben Ananus (43)
• Ananus ben Ananus (63)

L'ussuarii di Caifassu è Miriam

L'ussuariu di Caifassu

L'ussuariu di Caifassu

Di nuvembri 1990, l'uvrieri ani truvatu un ussuariu di calcariu adurnatu quandu eddi priparavani una strada in a Furesta di a Paci à u sudu di u quartieri d'Abu Tor in Ghjerusalemma. St'ussuariu simbrava autenticu è cuntinia i resti umani. A parsona pinsava ch'è una scrizzioni in aramaicu annantu à u latu dicia " Ghjaseppu figliolu di Caifassu " è annantu à 'ssa basa, l'ossa di un omu annosu erani cunsidarati com'è appartinendu à u Grandi Preti Caifassu. Dapoi a scuparta iniziali, 'ss'idantificazioni hè stata cuntistata da certi sapienti par diversi raghjoni, in particulari l'ortugrafia di a scrizzioni, l'assenza di ogni minzioni di u statutu di Grandi Preti di Caifassu, a simplicità di a cappedda (bench'è l'ussuariu eddu stessu fussi tantu adurnatu comu si pudaria aspittà da una parsona di u so rangu è di a so famiglia), è altri raghjoni.

Ussuariu di Miriam

Di ghjugnu 2011, l'archiuloghi di l'Università Bar-Ilan è di l'Università di Tel-Aviv ani annunciatu a ricuperazioni di un ussuariu arrubatu, pruvinendu da una tomba in a vaddi di l'Elah. L'Auturità di l'Antichità d'Israeli l'hà dichjaratu autenticu è s'hè lagnata ch'eddu ùn pudissi essa studiatu in situ. Hè iscrittu incù u testu : " Miriam, figliola di Yéchoua, figliolu di Caifassu, preti di Ma'aziah di Beth Imri ". Annantu à 'ssu basamentu, Caifassu pò essa affittatu à u corsu sacirdutali di Ma'aziah, istituitu da u rè David.

Novu Tistamentu

" Cristu davanti Caifassu ". U Grandi Preti hè ripprisintatu sdrisgendu u so abitu di curdogliu davanti a ghjastema parcipita da Ghjesù (Giotto, Vita di Cristu, Cappedda Scrovegni, Paduva)

Ghjuvanni : rilazioni incù i Rumani

Annas, sociaru di Caifassu (Ghjuvanni 18 : 13), era statu grandi preti da u 6 à u 15 dopu à à G.-C., è cuntinuava à asercità un'influenza impurtanti annantu à l'affari ghjudei. Annas è Caifassu ani forsi simpatizatu incù i Sadducei, un muvimentu riligiosu in Ghjudea chì truvava a maiò parti di i so membri frà u fiori ghjudeiu asgiatu. U mandatu abbastanza longu di diciottu anni di Caifassu sughjirisci ch'è eddu avia boni rilazioni di travagliu incù l'auturità rumani.

In u Vanghjeliu di Ghjuvanni (Ghjuvanni 11), i grandi preti chjamani à una accolta di u Sinedriu in riazzioni à a risurrizioni di Lazaru. In a parabula di u Vanghjeliu di Lucca (Lucca 16, 28 - 30), a riazzioni prubabili di i " cinqui frateddi " à a pussibilità di u ritornu di u mindicanti Lazaru hà datu locu à a sughjirimentu di Claude-Joseph Drioux è di altri ch'è u " riccu " hè eddu stessu un'attaccu contru à Caifassu, u so sociaru è i so cinqui cugnati.

Caifassu rifletti, incù " i grandi preti è i farisei ", à ciò ch'è ci voli à fà di Ghjesù, chì a so influenza si sparghji. Temini ch'è si eddi " u lasciani cuntinuà cusì, tuttu u mondu cridarà in eddu, è i Rumani vinarani è distrughjarani u nosciu locu santu è a noscia nazioni ". A numata di Caifassu dipendi quì da l'irunia drammatica di l'autori di u vanghjeliu. Ciò ch'eddu dici u grandi preti ùn hè micca ciò ch'è eddu voli, ma hè ciò ch'eddu voli l'autori di u quartu vanghjeliu.

Ponziu Pilatu

In u Vanghjeliu di Ghjuvanni (Ghjuvanni 18), Ghjesù hè purtatu davanti Annas, chì u so palazzu era più vicinu; Annas l'intarroga annantu à i so discepuli è u so insignamentu, po' l'invia ind'è Caifassu. Caifassu faci un calculu puliticu, sughjiriscendu ch'eddu saria priferibuli ch'è un " solu omu " (Ghjesù) morghi innanzi ch'è "tutta a nazioni" fussi distrutta. In quissa, Caifassu faci una citazioni rabbinica (Gn. R. 94, 9).

Dopu, Ghjesù hè cunduttu à Ponziu Pilatu, u guvarnadori rumanu di Ghjudea. Pilatu dici à i preti di ghjudicà à Ghjesù eddi stessi, ciò à chì eddi rispondini ch'eddi ùn ani micca l'auturità par fà la. Pilatu intarroga à Ghjesù, dopu à chì eddu dichjara, " Eiu ùn trovu nisciunu fundamentu par un'accusa contru ad eddu. " Pilatu offri tandu à a folla cuncolta a scelta di un prighjuneri da libarà - ciò chì hè dittu in a tradizioni di a Pasqua - è scegliini un criminali chjamatu Barabbas inveci di Ghjesù.

Matteiu : u prucessu di Ghjesù

In u Vanghjeliu di Matteiu (Matteiu 26 : 56 - 67), Caifassu è altri membri di u Sinedriu sò ripprisintati in traccia di intarrugà à Ghjesù. Cercani falsi provi par accusà à Ghjesù, ma ùn poni truvà ni nisciuna. Ghjesù ferma zittu mentri tutta a prucidura sinu à ciò ch'è Caifassu esighji ch'è Ghjesù dicissi si eddu hè Cristu. Ghjesù rispondi : " socu eiu, è vidareti u Figliolu di l'omu pasatu à a dritta di a putenza, è vinendu annantu à i nivulona di u celi ". (Marcu 14 : 62) Caifassu è l'altri omini l'accusani di ghjastema è u cundannani à i castichi curpurali par u so criminu.

Implicazioni pulitichi

Caifassu era u figliastru d'Annas par matrimoniu incù a so figliola è hà rignatu più à longu ch'è qualsiasi grandi preti à l'ebbica di u Novu Tistamentu. Par i dirighjenti ghjudei di l'ebbica, ci era serii priaccupazioni cuncirnendu a duminazioni rumana è un muvimentu d'insurrizioni zilata par caccià i Rumani d'Israeli. I Rumani ùn vuliani micca metta in opara i viulazioni di a Halakha, è l'accusa di ghjastema ùn avaria dunqua micca avutu d'impurtanza par Pilatu. A pusizioni ligali di Caifassu era dunqua di stabiliscia ch'è Ghjesù era culepevuli micca solu di ghjastema, ma dinò di pruclamà si eddu stessu com'è u Missia, ciò chì era capitu com'è u ritornu di a rialtà davidica. Saria statu un attu di sidizioni è avaria pruvucatu l'esecuzioni da i Rumani.

L'atti : Petru è Ghjuvanni ricusani di essa ridutti à u silenziu

Ghjesù è l'apostuli

Più tardi, in Atti 4, Petru è Ghjuvanni sò andati davanti à Annas è Caifassu dopu à avè varitu un omu infermu. Caifassu è Annas ani missu in dubbitu l'auturità di l'apostuli par cumpiiscia un certu miraculu. Quandu Petru, impiutu di u Spiritu Santu, hà rispostu ch'è Ghjesù di Nazareth era a fonti di a so putenza, Caifassu è l'altri preti ani rializatu ch'è i dui omini ùn aviani micca educazioni furmali ma ani parlatu incù eluquenza di l'omu ch'eddi ani chjamatu u so salvadori. Caifassu rinviò l'apostuli, è si missi d'accordu incù l'altri preti ch'è a parola di u miraculu era dighjà statu troppu sparta par tentà di cunfutà la, è ch'è inveci di quissa, i preti avariani bisognu di privena l'apostuli di ùn sparghja micca u nomu di Ghjesù. Eppuri, quandu eddi ani datu 'ssu cummandu à Petru è Ghjuvanni, i dui ani ricusatu, dicendu " Ghjudicheti da vo stessi si eddu hè ghjustu à l'ochja di Diu di ubbidiscia à vo piuttostu ch'è à Diu. Chì ùn pudemu micca impidiscia di parlà di ciò ch'è no avemu vistu è intesu ".

Citazioni

Caifassu hè mintuvatu in a sprissioni corsa "da Pilatu à Caifassu". Hè citata in u puema intitulatu Morte è funerali di Spanettu da Santu Casanova:

Era bellu è tintinnante

Quandu marchjava à lu passu,

Quandu marchjava à lu trottu

Facia moltu fracassu,

Ma lu purtavate sempre

Da Pilatu à Caifassu.

Da veda dinò

• Ponziu Pilatu