Arte rumànica in Corsica

In storia di l'arte, l'arte rumànica hè un muvimentu di pruduzzione artisticu chì principia à u Xu seculu, è dura sin'à u XIIIu seculu. In Corsica si ritrova in e numerose cappelle è chjese spaperse in l'isula sana.

A chjesa di A Trinità, in Aregnu

San Mighele di Muratu

A catedrale di Mariana, detta "A Canonica" in Lucciana

A catedrale di Nebbiu, in San Fiurenzu

A Corsica ne hà cuntatu duie centu. Certe sò state distrutte, d'altre trasfurmate è ingrandate, parechje si ponu sempre vede.

Detagliu di a facciata di a Canonica, in Lucciana

L'arte rumànica in Corsica hè marcata da l'influenza pisana. Si parla d'arte rumànica di stilu pisanu. A custruzzione di l'edifizii rumànichi in l'isula si face quandu a Corsica hè amministrata da Pisa.

U tìmpanu di a chjesa San Quilicu di Cambia

Orìgine

A Corsica pisana

E republiche marinare à u Medievu

Intornu à l'annu Mille, a storia di a Corsica si ritrova ligata à a Republica di Pisa, una di e putenze di u Mediterraniu tandu.

In u 1077, pè rinfurzà a presenza di a Chjesa, u papa Gregoriu VII incarica l'amministrazione di a Corsica à u vescu di Pisa, Landolfu.

À partesi da u 1091, u papa Urbanu II rinforza l'impurtanza di Pisa in Corsica è cede à u vescu di Pisa pudere piu forti.

L'organizazione di a Chjesa in Corsica hè reurganizata in trè punti :

- E cinque vescuvati primitive (Mariana, Aleria, Aiacciu, Sagone è Nebbiu) sò riattivati. Aleria, Aiacciu è Sagone sò messe sott'à u cuntrollu di l'archivescu di Pisa. Mariana è Nebbiu sò messe sott'à u cuntrollu di l'archivescu di Ghjenuva.

- Ste vescuvati sò elle stesse divise in pieve. In ogni pieve hè custruita una chjesa impurtante, chjamata anch'ella "pieve" o "chjesa piuvana". Sta chjesa si trova di regula à u centru geograficu di u territoriu di a pieve, à listessa distanza di l'abitatu spapersu. Si trova spessu isulata. Hè solu quì ch'ellu si face u battezimu.

Vede a pagina : Lista di e pieve di Corsica

D'altre chjese segundarie è cappelle sò custruite.

- À partesi da u 1080, parechje abbazie di Tuscana è di Liguria si stallanu in Corsica. E più impurtante eranu trè : San Gorgonio di l'isula di a Gorgonia, San Venerio del Tino è San Mamilianu di l'isula di Montecristu. I ricchi pruprietarii, i signori, li danu terre per stallassi. Participeghjanu cusì à cristianizà a pupulazione.

Un stilu novu : l'architettura rumànica

Un grande prugramma di custruzzione (o di ricustruzzione) di e chjese principia tandu. Sò centinaie d'edifizii chì sò alzati. L'architetti pisani adopranu un stilu novu, chì serà chjamatu più tardi rumànicu. Sò tecniche nove chì sò impiegate da l'architetti è l'artigiani pè a custruzzione.

In Corsica stu stilu rumànicu copia u mudellu di e chjese di a Tuscana vicina.

In l'isula sana sò custruite catedrale, chjese è cappelle. Pè u più sò cuncentrate in u nordu este di a Corsica, è in Balagna.

Sò alzate catedrale maiò (A Canònica in Mariana, Santa Maria in San Fiurenzu), ma dinù chjese piuvane à u centru d'ogni pieve, è cappelle segundarie.

• U mudellu pisanu
• 
  U domu di Pisa
• 
  A catedrale di Nebbiu

Caratterìstiche

Pianu

E chjese rumàniche di Corsica anu di modu generale un aspettu semplice. A catedrale di Mariana hè a più grande (33 metri di lunghezza).

A maiò parte di l'edifizii rumànichi di Corsica sò fatti nant'à un pianu cù una nave unica, cù un'àbside meza circularia cù una volta, orientata à l'Este. In Corsica ùn ci hè nisuna chjesa cù un transettu.

Ci sò trè esempii di chjesa cù una doppia àbside : Santa Cristina di E Valle di Campulori, Santa Marione di Corti, Santa Maria Chjappella in Ruglianu. Una sola chjesa presenta una trìplice àbside, hè quella di San Pancraziu in Castellare di Casinca.

Solu e catedrale di Mariana è di Nebbiu anu una nave centrale separata nant'à i so lati da culonne è pilastri.

I muri sò zeppi, l'aperture sò poche.

• L'àbside di e chjese rumàniche corse : ùnica, doppia o trìplice
• 
  Chjesa cù un'àbside : San Ghjuvanni d'Altiani
• 
  Doppia àbside : Santa Cristina à E Valle di Campulori
• 
  A trìplice àbside di San Pancraziu, à U Castellà, in Casinca

Materiali di custruzzione

I custruttori di l'edifizii rumànichi impiegavanu e petre trove sopr'à locu. E chjese custruite à st'epica sò dunque u spechju di a diversità geològica di a Corsica. A diversità di i materiali impiegati hè grande : granitu, calcariu, matticciu, màrmeru cipullinu...

A pulicrumia di certe chjese (San Mighele di Muratu, A Trinità d'Argenu) nasce di l'assuciazione di sti differente petre.

E catedrale

A Corsica hà cuntatu sei diòcesi : Aleria, Mariana, Nebbiu, Sagone, Aiacciu è Accia. Di ste sei diòcesi, fermanu trè catedrale di stile rumànicu : Nebbiu, Mariana è Sagone.

A catedrale di Mariana, detta A Canònica

Santa Maria Assunta, catedrale di Mariana

In u 1119 hè custruita a catedrale di Mariana, chjamata A Canònica. Hè fatta nant'à un pianu à trè nave separate da culonne. E petre venenu da Capicorsu. Sò blocchi di metre di matticciu cipullinu. A tecnica di custruzzione di i muri chì alterna petre alte è fine dà un'impressione di rigature rimanda à u stilu ch'ellu si pò vede in a chjesa Sant'Alessandro di Lucca, in Tuscana.

A facciata di A Canònica

A facciata ella hè cumposta di lèsene di trè manere differente chì face pensà à a chjesa Santa Maria del Regno d’Ardara, in Sardegna, o à quella di San Sisto, in Pisa.

I decori scultati di A Canònica sò pochi. Ci sò arcatelle ceche nant'à l'àbside chì riposanu nant'à mudiglioni.

Nant'à l'entrata principale ci hè un arcu scultatu cù una frisa d'animali è un soprusciu decuratu di mutivi.

Nant'à a facciata sud ci sò dinù mutivi geometrichi, listessi à quelli chì si ponu vede in Pisa, nant'à a chjesa San Sepolcro.

• A catedrale Santa Maria Assunta, detta A Canònica, in Mariana (Lucciana)
• 
• 
• 
• 
• 
• 

A catedrale di Nebbiu

In a Catedrale di Nebbiu si vede bè l'influenza pisana. A facciata hè cumposta nant'à u listessu mudellu chè quella di u Domu di Pisa, ch'ella sia pè l'architettura o l'ornamentazione.

• A catedrale di Nebbiu, Santa Maria Assunta in San Fiurenzu
• 
• 
• 

A catedrale di Sagone

• E ruvine di a catedrale Sant'Appianu di Sagone
• 
• 
• 

E chjese piuvane

A chjesa piuvana hè chjamata dinù chjesa pievana, pievanìa, chjesa matrice o più simpliciamente "pieve". Hè a chjesa a più impurtante di u rughjone à u medievu, quandu i paisoli eranu spapersi, chjuchi è pocu abitati. E chjese piuvane sò tandu custruite à u centru di a pieve. A pieve hè dinù u nome di a circuscrizzione amministrativa è religiosa chì i Pisani tornanu à creà per lancià un prugramma di custruzzione di e chjese. Geneviève Moracchini-Mazel in i so travagli ne hà ricensatu un centu.

Aregnu : A Trinità

Chjesa piuvana di a pieve d'Aregnu

• 
• 
• 
• 
• 

Muratu : San Mighele

Chjesa piuvana di a pieve di Bivincu

• 
• 
• 
• 
• 
• 
• 
• 
• 
• 
• 

Castellare di Casinca : San Pancraziu

San Pancraziu o San Brancà, chjesa piuvana di a pieve di Casinca

• 
• 

A Casalta : Santa Maria di a Natività

Chjesa piuvana di a pieve d'Ampugnani

• 
• 
• 
• 

Altiani : San Ghjuvanni

Chjesa piuvana di a pieve di Rogna

• 
• 
• 

Rustinu : Santa Maria Riscamone

Chjesa piuvana di a pieve di Rustinu

• 
• 

Corti : Santa Marione

Chjesa piuvana di a pieve di Tàlcini

• 

Brandu : Santa Maria di e Neve

Chjesa piuvana di a pieve di Brandu

• 
• 

Furiani : Santa Maria

Chjesa piuvana di a pieve d'Ortu

• 
• 

Càrbini : San Ghjuvanni

Chjesa piuvana di a pieve di Càrbini

• 

Cànari : Santa Maria

Chjesa piuvana di a pieve di Cànari

• 
• 
• 
• 
• 
• 
• 

Lumiu : San Petru è San Paulu

Chjesa piuvana di a pieve di Lumiu

Si ritrovanu sumiglie cun e chjese pisane di Santa Cristina è San Piero a Grado.

• 
• 
• 

E Ville di Pàrasu : San Ghjuvanni

Chjesa piuvana di a pieve di Tùani

• 
• 

Santa Lucia di Tallà : San Ghjuvanni

Chjesa piuvana di a pieve d'Attalà

• 
• 
• 

A Grossa : San Ghjuvanni

Chjesa piuvana di a pieve di Bisughjè

• 
• 

Calinzana : San Ghjuvanni

Chjesa piuvana di a pieve d'Àrmitu

• 
• 

Corti : San Ghjuvanni

Chjesa piuvana di a pieve di Vènacu

• 
• 
• 

U Petricaghju : San Chirgu (o San Quilicu)

Chjesa piuvana di a pieve d'Alisgiani

San Chirgu, à U Petricaghju

E cappelle

Sermanu

Santi Niculaiu

• 

Siscu

San Mighele

• 
• 

Cambia

San Quilicu

• 
• 
• 

U Quercitellu

San Ciprianu

• 

Biguglia

Sant'Andria

• 

Merusaglia

Santa Riparata

• 
• 

Sant'Andria

• 

Quenza

Santa Maria

• 
• 

Castirla

San Mighele

• 
• 

Tralonca

San Lurenzu

• 
• 

Lucciana

San Parteu

• 
• 
• 

Castellu di Rustinu

San Tumasgiu

• 
• 
• 

Figari

San Quilicu di Montilati

• 
• 

Olcani

San Quilicu

• 
• 

E sculture

I decori scultati sò rari. E cumunità paisane sò in a maiò parte mudeste à u Medievu. Ma si trovanu belli decori, cumu per esempiu u tìmpanu di San Chirgu di Cambia. A so funzione hè d'imbellisce, ma dinù d'insignà storia di i santi o scene di a bibbia à quelli chì ùn sapianu leghje.

U tìmpanu di San Quilicu di Cambia

Certe volte si trovanu sculture chì rapresentanu mutivi o figure d'umani o d'animali. Si ponu vede nant'à i mudiglioni, l'arcatelle è i capitelli.

Detagli di a catedrale di Nebbiu, in San Fiurenzu

Detagli di a catedrale di Mariana, in Lucciana

E sculture di chjesa di A Trinità, in Aregnu

Tìmpanu in Pedicorti di Gaghju di stile rumànicu, riimpiegatu in u campanile

Vucabulariu

Àbside

Hè a parte chì finisce a chjesa, a so forma hè in mezu tondu. In Corsica a maiò parte di e chjese rumàniche sò fatte cù àbside ùniche, ma ci n'hè cun àbside doppie, è una sola chjesa cù un'àbside trìplice.

A doppia àbside di Santa Maria Chjappella, in Ruglianu

Affrescu

Pittura nant'à i muri fatta segondu una tecnica particulare. A materia chì riceve a pittura deve esse sempre fresca è ùmida. Hè da quì ch'ellu vene u so nome (in talianu : à fresco).

Affrescu in a cappella di San Tumasgiu, in Castellu di Rustinu

Altare

In una chjesa, o una cappella, hè u tavulinu induve u prete celebra a messa. In francese si dice autel.

L'altare di a chjesa Sant Lucia, in Isulacciu di Fiumorbu

Arcatella

Decoru fattu di parechje piccule arcate. In l'arte rumànica si ritrovanu per esempiu nant'à e facciate di certi edifizii. Un'arcatella hè detta "ceca" quandu u muru induv'ella si trova hè pienu. Currisponde in francese à a parolla arcature.

L'arcatelle ceche di a catedrale di Nebbiu, in San Fiurenzu

Arcu tondu

Forma d'arcu caratterìstica di l'arte rumànica. L'arcu face un mezu tondu. In francese si dice arc en plein cintre.

Arcu tondu, detagliu di a chjesa San Mighele di Muratu

Bassurilievu : U bassurilievu hè una tecnica di scultura chì cunsiste à rapresentà nant'à una lastra di materiale duru (petra, marmeru, bronzu...) una scena o mutivi in trè dimensioni. U sugettu di u bassurilievu si spicca di u fondu di manera legera.

Mutivi in bassurilievu nant'à u latu di a catedrale di A Canonica.

Battisteru (o battisteriu) : Custruzzione circulare o poligunale situata prima à cantu à a chjesa induve si facia u battezimu. Nanzu, u battezimu si praticava per immersione. Quellu chì si facia battizà si ciuttava in un pozzu d'acqua, nentru à u battisteru.

U battisteru di Santa Maria Riscamone, à E Valle di Rustinu

Capitellu

Hè l'elementu, scultatu è decuratu, chì si trova in cima d'una culonna o d'un pilastru.

Un capitellu di a catedrale di Nebbiu

Cappella

Edifiziu religiosu chjucu cù un'altare. E cappelle sò di dimensione minute di pettu à e chjese.

A cappella San Mighele, in Siscu

Chjavetta

E chjavette sò e petre zuccate chì ghjuvavanu per fà un arcu tondu. Si dice in francese "claveau" o "voussoir".

E chjavette d'un arcu tondu

Chjesa piuvana

Hè a chjesa principale d'una pieve. A chjesa piuvana era situata di regula generale (ma micca sempre) à u centru di a pieve.

A chjesa piuvana di l'Ampugnani, Santa Maria di A Casalta

Coru

In e chjese, u coru hè u locu induve stà u prete è i cantori durante e cerimonie.

Feritoghja

Una feritoghja hè un'apertura fine è stretta ch'ellu si vede in generale in e furticazione militare, da induve si pò fà passà l'arme per tirà è ferisce. In l'architettura rumànica si ponu vede aperture chì s'assumiglianu à feritoghje. Lascianu passà poca luce ma chì ùn avianu micca a funzione defensiva. In francese s'impiega a parolla "meurtrière".

Apertura di tippu "feritoghja" in San Mighele di Muratu

Fruntone

U fruntone d'una facciata hè a parte superiore, in forma di triàngulu.

Lèsena

Una lèsena hè una banda verticale di rilievu picculu, nant'à un muru. Si dice dinù pilastru.

E lèsene di a facciata di A Canònica

Mudiglione

Un mudiglione hè un elementu scultatu chì ghjova à sustene una curnice o un'arcatella. I mudiglioni di e chjese rumàniche rapresentanu figure d'omi, animali, o presentanu mutivi geometrichi.

Mudiglioni di a cappella San Quilicu, in Cambia

Nave

A nave d'una chjesa hè u spaziu cumpresu trà i dui ranghi di pilastri chì sustenenu a volta. Hè quì ch'ellu si stalla u publicu per assiste à a messa. Currisponde in francese à la nef.

A nave di a catedrale di Nebbiu, Santa Maria Assunta, in San Fiurenzu

Òculu

Un òculu hè un'apertura di forma tonda, cum'è un ochju.

Pieve

Una pieve hè una circuscrizzione riligiosa, amministrativa è geugrafica. Currisponde à una microregione. À l'orìgine a parolle pieve indetta a chjesa principale, situata in ogni valle di Corsica induve l'abitanti s'addunianu pè a cerimonia di u battezimu. Hè a sola induve si trova un battisteru o i fonti battismali. Ghjuvava dinù di campusantu. Sta chjesa era dunque chjamata pieve, chjesa pievana o chjesa piuvana. In latinu plebania. Si dicia dinù chjesa matrice. U termine "pieve" s'hè pocu à pocu stesu per parlà dinù di a circuscrizzione chì dipendia di sta chjesa. Ogni pieve facia parte d'una diòcesi. Ci sò stati à quandu cinque, à quandu sei diòcesi in Corsica. E cunfine di e pieve sò naturale (fiumi, creste, muntagne) è seguiteghjanu e forme di e valle.

Carta di e pieve di Corsica, à u XVIIIu seculu

Pulìcromu

Di parechji culori. Ci sò duie chjese pulìcrome di stile rumànicu in Corsica : A Trinità in Aregnu è San Mighele, in Muratu.

• Chjese pulìcrome
• 
  A Trinità in Aregnu
• 
  San Mighele, in Muratu
• 
  Santa Riparata di Balagna
• 
  San Rinieru in Lunghignanu

Soprusciu

Hè a petra chì sustene u muru sopr'à una porta. Si dice dinù sopraporta. In francese : linteau.

Soprusciu di a chjesa di A Nunziata in Sermanu

Tìmpanu

Hè u spaziu chì si trova sopr'à e porte di e chjese rumàniche. Di forma meza circularia, u tìmpanu marca l'entrata di u locu di cultu è materializeghja a transizione trà u mondu di l'omi è quellu di Diu.

Tìmpanu di a cappella Santa Riparata, in Merusaglia

Transettu

In una chjesa in forme di croce latina, u transettu hè una nave traservale à a nave principale. E chjese di piccula dimensione ùn anu micca transettu. In francese si dice le transept.

Volta à botte

A volta à botte hè una forma di volta tìpica di l'architettura rumànica. A volta à botte utilizeghja a forma di l'arcu tondu. Si dice in francese voûte en berceau.

• A volta à botte
• 
  Ricustituzione geometrica d'una volta à botte
• 
  À l'internu di Santa Maria Assunta, in San Fiurenzu

Da vede dinù

• Lista di e pieve di Corsica
• Architittura rumànica
• Rumànicu pisanu
• Architettura rumànica in Sardegna