Alpana

L'alpana
Pandion haliaetus
Classificazione scentifica
Regnu	Animalia
Divisione	Chordata
Classa	Aves
Ordine	Ciconiiformes
Famiglia	Accipitridae
Generu	Pandion
Nome binuminale
Pandion haliaetus Linnaeus, 1758

L' Alpana (Pandion haliaetus) hè un acellu chì face parte di a famiglia di l'Accipitridae. Hè l'unica spezia chì face parte di u generu Pandion. Si stima chì ci sò circa 6000 copii d'alpane in Europa.

L'alpana, in bulu

Descrizzione

L'alpana hè alta 50-60 cm. Hè più maiore ch'è u buzaiu. Pò campà sin'à 32 anni. A so apertura alare varieghja da 1,45 m à 1,65 m. Pesa da 1 à 2 kilò. E so nare si ponu chjude, ciò chì permette à l'alpana si stà mori sottu à l'acqua per piscà. I diti sò putenti è e sgrinfie sò longhe. U sopra di l'alpana hè niricciu, invece u sottu hè biancu. 'Ssu cuntrastu hè caratteristicu di 'ssu acellu. L'alpana face ogni annu, da mezu aprile à u principiu di maghju, una cuvata di trè ovi, in generale. L'ovu hè cuvatu da 35 à 40 ghjorni. U piulacone stà in i nidu da 8 à 10 simane.

Ripartizione

L'alpana hè cumuna in Asia, in Africa, in America Centrale è in Nord'America, è in Europa. A maiò parte di l'alpane d'Europa passa l'inguernata in Africa è ghjunghje dopu in Europa, à l'eccezzione di l'alpane di u Mediterraniu è in particulare di l'alpane chì sò arrighjunate in Corsica. L'alpaa ùn teme micca di travirsà i grandi diserti.

In Corsica

U nidu di l'alpana, in a Riserva di Scandula

L'alpana hè prisente in Corsica. Hè ancu chjamata l'alpaghja. Dipoi sempre, ci hè statu dui tipi di pupulazione d'alpane in Corsica (Thibault 1983). Prima, une pupulazione arrighjunata, cullucata sopratuttu annantu à a facciata marittima uccidentale di l'isula. Sicondu, una pupulazione d'alpane ghjunghjitticce, ghjunta in migrazione, d'aprile à sittembre è chì pò passà l'inguernu annantu à i stagni di Corsica. Ùn firmava più ch'è quattru coppii arrighjunati versu 1970 in a riserva di Scandula. Ma sicondu e testimunianze, l'alpane arrighjunate in Corsica stavanu dinù, innanzi, in u Capicorsu è in u sudestu di l'isula. Da 1977 à 1980, ci era 6 à 10 coppii in Corsica, posti annantu à 90 kilomitri di coste. In 1981, ci eranu 20 coppi è l'alpana s'era arrighjunata dinù in u so rughjone anticu di u Capicorsu. Ma ci n'hè avà circa 40, a maiò parte essendu in a Riserva Naturale di Scandola.

Pandion haliaetus

Biolugia

Per u più, l'alpana si nutrisce di pesci, ma accade ch'ella manghjessi ranochje, accillucci di mare o d'acqua, o picculi mammiferi, cum'è a bellula.

U nidu di l'alpana hè fattu di branche. Hè custruitu annantu à qualchì pinzu, qualchì arburu maiore o qualchì scogliu. Accade andu, ma raramente, ch'ellu fussi custruitu in terra, quandu ùn ci hè micca predatori.

Tassonumia

L'alpana hè a sola spezia di u generu Pandion. Hè stata discritta per a prima volta da Carl von Linné in 1758 sottu u nome di Falco haliaetus. Parechje sottuspezie sò state discritte, ma a so validità hè oghje discutita. E più ricunnusciute sò :

• Pandion haliaetus haliaetus : sottuspezia numinale, prisente in Europa è in Asia
• Pandion haliaetus carolinensis : sottuspezia nordamericana
• Pandion haliaetus cristatus : sottuspezia australasiana

Prutezzione

L'alpana era in tempi d'una volta minacciatu da a caccia è a distruzzione di u so ambiente. Eppuru, e so pupulazione anu criscutu sti pochi anni grazia à a prutezzione legale è à i prugrammi di cunsirvazione. Hè attualmente classificata cum'è essendu di preoccupazione minore da l'Unione Internaziunale per a Cunsirvazione di a Natura (UICN).

L'alpana hè cunsiderata cum'è rara in l'Unione Europea è hè prutetta da a cunvinzione internaziunale di Washington (CITES) chì interdisce u cummerciu di e spezie di fauna è di flora minacciate di sparizione.

Referenze

• L'acelli - Les oiseaux, Ghjuvan Petru Battestini, Adecec, 1982 Archiviu 2012-01-11 at the Wayback Machine
• J.-C. Thibault & G. Bonaccorsi, The birds of Corsica, British Ornithologists’ Union, Check-list n°17, 1999
• Jean-Claude Thibault, Connaître les oiseaux de Corse - Acelli di Corsica, Ed. Albiana, 2006

Ligami

• L'alpana, Kallistea Archiviu 2009-06-01 at the Wayback Machine

Da vede dinù

• acelli di Corsica
• a Riserva di Scandula

Altri prugetti

• Pandion haliaetus annantu à Wikimedia Commons.