Working Class Hero

Working Class Hero hè una canzona di John Lennon ricacciata da u so album di 1970 John Lennon Plastic Ono Band, u so prima album dopu à u dissulvimentu di u gruppu di rock i Beatles.

Tema

John Lennon in 1969

Risulutamenti pulitica, a canzona hè un cummentu criticu annantu à a diffarenza trà i classi suciali. Siont'è Lennon in un'intarvista incù Jann Wenner di Rolling Stone di dicembri 1970, parla di l'individui di a classa uparaia chì sò trasfurmati in classi medii, in "macchini". Lennon hà dinò dichjaratu : "Eiu pensu ch'edda hè una canzona rivuluziunaria - hè probbiu solu rivuluziunariu. Pensu simpliciamenti ch'è u so cuncettu hè rivuluziunariu".

U riturneddu di a canzona hè "A working class hero is something to be".

'Ssa canzona ùn era micca a prima canzona pulitica di Lennon. A so seria di canzoni pulitichi hà cuminciatu in u 1968 incù a "Rivuluzioni" di i Beatles è s'hè parsuvitata in u 1972 incù l'isciuta di Some Time in New York City.

Righjistrazioni è sonu

Arrighjistrata à i studios EMI u 27 di sittembri 1970, a canzona ùn metti in scena ch'è Lennon, chì canta è sona di chitarra acustica à usu di sustegnu. A prugrissioni di l'accordi hè assà simplicia è s'appoghja annantu à u La minori è u Sol maghjori, incù una corta avvinta pà u Re maghjori in una linia di u riturneddu. A tecnica di Lennon cumprendi un riff incù un piccu martiddatu di a nota Mi annantu à a corda di Re è dopu una corda di La aparta. U tonu è u stilu di a canzona sò simili à quiddi di i Masters of War è u North Country Blues di Bob Dylan, un'influenza cunnisciuta di Lennon. Tremindù sò basati annantu à l'acconciu di Jean Ritchie di a canzona fulclorica inglesa tradiziunali, Nottamun Town. Lennon hà arrighjistratu Working Class Hero più d'una cintunara di volti sinu à ciò ch'è eddu fussi suddisfatu di a righjistrazioni. A righjistrazioni hè u cumpositu di dui presi diffarenti : u tonu di a chitarra è a boci cambia trà 1:24 è 1:45 pà u versu "When they've tortured and scared you".

Contruversia

John Lennon è Yoko Ono di marzu 1969

In u 1973, u diputatu americanu Harley Orrin Staggers hà intesu a canzona - chì cumprendi i linii "Til you're so fucking crazy you can't follow their rules" è "But you're still fucking peasants as far as I can see" - annantu à WGTB ed hà dipostu una lagnanza vicinu à a Cummissioni federali di i cumunicazioni (FCC). U dirittori di a stazioni, Ken Sleeman, hè statu cundannatu à un annu di prighjò è à un'amenda di 10000 dullari, ma hà difesu a so dicisioni di diffonda a canzona dicendu ni : "L'abitanti di Washington DC sò abbastanza suffisticati pà accittà una parola di quattru lettari in u so cuntestu, è ùn essa micca azzizzati, affesi o cuntrariati sissualamenti". L'accusi sò stati abbandunati. Altri stazioni di radiu americani, com'è a WBCN di Boston, ani interditu a canzona pà u so usu di a parola " fucking ". In Australia, l'album hè isciutu incù 'ssa parola cacciata di a canzona è i paroli cinsurati annantu à u cartulari internu.

Da veda dinò

• i Beatles
• John Lennon