Un Fiore (Ghjuvan Petru Lucciardi)
Un Fiore hè una puesia di Ghjuvan Petru Lucciardi (1862-1928). Hè stata publicata in L'Annu Corsu per u 1927. A so struttura hè quella d'un sunettu.
Un Fiore
mudificà- Vidi un carufanettu ghjà sbucciatu ;
- D'odori deliziosi a strada empiia.
- Cù una voce vizzosa mi dicia :
- « Cogli mi... cù e so labbre m'hà basgiatu.
- È cù e so mane d'oru hà carizzatu
- A mio curolla chì si strasmurtia ;
- È ci hà lasciatu tanta puesia,
- Ch'avà sò, frà li fiori, invidiatu.
- Cogli mi, cun delizia aspirerai
- L'alitu di a so lena parfumata,
- È i pichji di u so core senterai.
- A so imagine viderai stampata ;
- Surrisu più graziosu ùn ci fù mai... »
- — Quessa, risposi, hè la mio Donna amata.