Turritopsis dohrnii
| |||||
|---|---|---|---|---|---|
| |||||
| Turritopsis dohrnii | |||||
| Classifica scentifica | |||||
| Regnu | Animalia | ||||
| Divisione | Cnidaria | ||||
| Classa | Hydrozoa | ||||
| Ordine | Anthomedusae | ||||
| Famiglia | Oceanidae | ||||
| Generu | Turritopsis | ||||
| Nomu binuminale | |||||
| Turritopsis dohrnii Linnaeus, 1758 | |||||
| File:Imagina benvinuta.jpg | |||||
Turritopsis dohrnii (Weismann, 1883) hè una potta marina di a famiglia di l'Oceanidae.[1] Incù Turritopsis nutricula, hè u solu animale attualmente cunnisciutu chì pò ringhjuvanisce, vene à dì rigredisce cumplittamente à un statu d'immaturità sissuale, dopu à avè aghjuntu a so piena maturità sissuale. Per via di quessa, hè stata chjamata "carnazza immurtale". Hè statu numinata Turritopsis dohrnii in onore di u biolugu Anton Dohrn.
Descrizzione
mudificàE culonie di hydrozoa sò d'altezza varievule (sinu à 35 mm) è cumportanu relativamente pochi rami. E buttate ùn facenu ch'è uni pochi di millimetri di spissore è l'idre (i polipi hydrozoa individuali) sò rusulate pallidu o trasparente, incù 12-20 tentaculi disposti intornu à a bocca. E ghjovane carnacce, inquantu à elle, anu un manubriu giallu pallidu è 8 à 12 tentaculi.
L'individui adulti misuranu insin'à 2,7 mm di longu annantu à 3,2 mm di diamitru ; a campana hà una struttura sferica. U manubriu si stende insin'à i bordi di a campana, e gonade pigliendu un culore brunu. I tentaculi sò frà 14 à 32 è ponu avè un ingrussamentu à a so estremità.
Distribuzione
mudificàBenchì omu pensa ch'è u generu Turritopsis sia originariu di l'Oceanu Pacificu, s'hè spartu in u mondu sanu, ingenerendu differente spezie. E differenze morfulogiche trà 'sse spezie sò state virificate da un studiu cumparativu chì hà stabilitu ch'è T. Dohrnii si trova per u più in u mare Terraniu occidentale, a cala di Napuli è u mare Adriaticu. I campioni catturati in u mare di u Giappone devenu prubabilmente a so origine à raghjone antropogeniche, traspurtati à u Giappone dapoi u mare Terraniu in l'acque di ballast di e nave induve elli sopravvivenu senza mischià si incù i T. Pacifica indigene.
Ciclu di vita
mudificàU prima à custattà ch'è T. Dohrnii hè capace à ringhjuvanisce hè Christian Sommer, un biolugu marinu tedescu chì l'hà identificata à a fine di l'anni 1980 quandu ellu facia i studii annantu à l'hydrozoa in l'acque di Rapallo. A carnaccia hè stata traspurtata in l'acquariu di u biolugu genuvese Giorgio Bavestrello, chì vulia studià u so ciclu di vita, ma e cundizione ambientale di l'acquariu ùn eranu micca e megliu per Turritopsis : u stress à u quale a carnaccia hè stata sottumessa hà scruchjatu u meccanismu di ringhjuvanimentu è u ghjornu dopu di u trasportu, i biolughi anu scupertu ch'è ci era un polipu à a piazza di a carnaccia. T. Dohrnii avia rigreditu à un stadiu anteriore di u so sviluppu.
A carnaccia hè stata dopu studiata da un gruppu di scentifichi, direttu da Ferdinando Boero, prufissore à l'Università di Salento è assuciatu di u CNR-ISMAR, è Stefano Piraino. I so travagli, chì rediscrivenu a spezia à ogni stadiu di u so sviluppu è a manera ch'ella pò ringhjuvanisce, sò stati publicati in u 1996.
Malgradu a so straurdinaria capacità, chì li hà ancu valsutu u sopranome di carnaccia Benjamin Button, siont'è u persunaghju resu celebru in a nuvella di Francis Scott Fitzgerald, T. Dohrnii ùn sopravvive micca faciule in cattività. À i ghjorni d'oghje, solu u scentificu Shin Kubota di l'Università di Kyoto hè riesciutu à mantene in vita una cultura di T. Dohrnii mentre un longu periodu (almenu dui anni). Kubota, chì hè unu di i scentifichi chì cunsacra u più tempu à u studiu di 'ssa carnaccia, hè à spessu interrugatu da i media giappunesi è hà rigistratu numerose canzone annantu à T. Dohrnii.