Prosper Mérimée, natu u 28 di sittembre di u 1803 in Parigi è mortu u 23 di sittembre di 1870 in Cannes, hè un scrittore, storicu è archeologu francese.

Ritrattu di Prosper Mérimée

Biugrafia mudificà

A so famiglia face parte di a burghesia, pratichechja l’arte è Prosper Mérimée face studii di dirittu, ampara u pianuforte, è studieghja a filusufia è ancu parechje lingue. S’interessa à a litteratura è publicheghja da 1825 testi, sopr'à tuttu nuvelle chì l’anu fattu cunnosce è li valenu d’esse elettu à L’Accademia Francese in 1844.

In u 1831, entre in li scagni ministeriali è diventa in u 1834 inspettore generale di i munumenti storichi. S’accupa di a risturazione di parechji munumenti impurtante frà i quali a Catedrale Notre-Dame de Paris ch’ellu cunfideghja à Eugène Viollet-le-Duc.

Viaghja tandu à traversu a Francia è crea una classifica di i munumenti storichi. Ghjuntu in Corsica in 1839, face u giru di l’isula da u 16 d’aostu à u 7 d’ottobre, à a ricerca di munumenti interessanti. S'intaressa assai à i megaliti ch'ellu paraguneghja à i munumenti ch'ellu hà vistu in Brittagna, si passiona per e chjese di stile rumanicu ch'ellu circherà à fà rinnuvà (Santa Maria Assunta di Mariana o Canonica, San'Ghjuvani di Carbini...) ma li garba pocu l'arte barocca assai prisente in l'isula.

I primi munumenti classificati sò :

  • a catedrale Santa Maria Assunta di San Fiurenzu ;
  • a chjesa San Michele in Muratu ;
  • a torre di Seneca in Luri ;
  • a chjesa Santa Cristina à E Valle di Campoloru ;
  • a chjesa San Cesariu in Rapale ;
  • a stantara d’Appricciani in Sagone (solu munumentu scrittu in a prima lista per a Corsica Suttana).

E so nuvelle e più cunnisciute sò intinte d’esotismu (a Corsica in Mateo Falcone è Colomba o l’Andalusia in Carmen).

Hè in u paese di Fuzzà, in Corsica suttana ch’ellu scontra a vera Culomba chì li derà l’ispirazione per scrive a so nuvella publicata in 1840.

Scritti nant'à a Corsica mudificà

 
Edizione di u 1862

A prima nuvella corsa di Mérimée hè Mateo Falcone, scritta in u 1829. Dece anni dopu, in u 1839, ci hè u Rapport spécial sur l'état des monuments de la Corse, dumandatu da u ministeriu di l'internu. Passa tandu sette settimane in Corsica. Tandu scrive dinù Notes d'un voyage en Corse. À u so ritornu scrive Colomba, ch'ellu principia à scrive di dicembre 1839.


"Base Mérimée" mudificà

À partesi da u 1834, Prosper Mérimée principia à fà u censu in a Francia sana di i munumenti architetturali i più impurtanti. Hè per rendeli omagiu chì u Ministeriu di a Cultura crea in u 1978 a "Base Mérimée"[1] chì face u listinu di i munumenti storichi.

Note è riferenze mudificà

  1. http://www2.culture.gouv.fr/culture/inventai/patrimoine/

Ligami mudificà

Base Mérimée : http://www2.culture.gouv.fr/culture/inventai/patrimoine/