U Canali di Panama (o Canale di Panama) (spagn. Canal de Panamá, ingl. Panama Canal ) hè un canali artificiali chì traversa l'istmu di Panama. Longu 81,1 km cumpresi i prulungamenti in mari, unisci l'Uceanu Atlanticu incù u Pacificu. Hà una prufundità massima para à 12 m, a larghezza varieghja trà i 240 è i 300 m in u lavu Gatún, mentri hè di 90-150 m in u trattu di u tagliu di a Culebra. Hè custituitu da un sistemu di chjusi, incù 6 conchi, chì parmetti à i navi di suparà un disliveddu tutali di 28 m, evitendu à i navi diretti da porti di u Pacificu à quiddi di l'Atlanticu è viciversa a circunnavigazioni di l'America miridiunali. U tempu di parcorsu hè di circa 4/5 ori. L'imbuccatura in currispundenza di u Mari di i Caraibi si trova aghjacenti à u portu di Cristóbal in a baia di Limon. I navi pruvinenti da l'Atlanticu è diretti in u Pacificu, dopu à avè parcorsu l'aria di rialzamentu, cumpostu da i trè Gatún Locks, attraversani u Lavu Gatún, a zona di Gamboa, u Strettu di Culebra, ghjunghjendu dopu à a chjusa di Pedro Miguel, eppo passani, dopu un prima saltu di liveddu di circa 9 metri, in u Lavu di Miraflores, chì dà accessu à i dui chjusi di Miraflores righjunghjendu à l'isciuta di quissi u liveddu di u mari vicinu à u portu di Balboa. Segui a navigazioni passendu u Ponti di l'Americhi finu à ghjunghja dopu in u Golfu di Panama. U canali hè attravirsatu da migliaia di navi à l'annu par un tunniddaghju di dicini di milioni di tonni in tremindù i sensi. In u 2009, 14.342 navi ani attravirsatu u canali, traspurtendu 198.014.288 tonni di cargo. U pidaticu duvutu par a navigazioni hè a fonti principali di l'ecunumia di u statu di Panamá. I navi chì traversani u canali ùn poni micca suparà i 292,68 metri di lunghezza è i 32,31 metri di larghezza à causa di i diminsioni massimi di i "conchi" i quali, in u sensu di a lunghezza, sò limitati da i porti di cumunicazioni trà i conchi stessi. 'Ssa limita sarà suparata in u 2014, à tarmini di l'espansioni di u canali à opara di un cunsorziu.

Carta di Panama, incù u canali beddu visibuli à u centru trà l'Uceanu Pacificu (in bassu) è u Mari di i Caraibi (in altu).
U canali in una rialisazioni infurmatica

Giugrafia mudificà

À parta da u virsanti Atlanticu, intrendu à l'internu di a Limon Bay, u canali veru è probbiu fù imbuccatu dopu un trattu di circa 7 km. L' 11 km chì suvitani si snodani in dirizzioni sudu sudu-punenti finu à righjunghja i chjusi di Gatún, chì innalzani l'unità transitanti di 27 m sopra u liveddu di u mari, finu à u lavu artificiali di Gatún, furmatu da a custruzzioni di una diga annantu à u fiumu Chagres. Dopu à avè travirsatu u lavu, u canali prusegui versu sudu sudu-livanti insin'à l'imbuccatura di u tagliu di Gaillard (o ancu tagliu di a Culebra), un trattu di canali di circa 13 km ricavatu da u tagliu di una roccia durissima, à u tarmini di u quali si trova a chjusa di Pedro Miguel. Quissa, parmittendu un abbassamentu di circa 9 metri, cunduci à u lavu Miraflores. Par pudè righjunghja u liveddu di u mari hè nicissariu di passà à traversu i dui chjusi rimanenti di Miraflores. Par via di a cunfurmazioni di u cuntinenti americanu, l'imboccu da l'Atlanticu si trova più à punenti di l'imboccu da l'Uceanu Pacificu; quissa cuntrasteghja incù l'approcciu intuitivu, chì voli l'Uceanu Atlanticu postu à urienti di u Pacificu. In pratica, una navi chì parti da u Mari di i Caraibi (Atlanticu) è devi righjunghja l'acqui di u Pacificu, volta à daretu versu livanti è, una volta righjuntu l'imboccu, torra à navigà versu punenti.

Storia mudificà

 
Fasi di a custruzzioni di u canali

U prugettu urighjinariu di u canali ricodda à u XIX seculu; in u 1879 fù sustinutu da u Cungressu Internaziunali di Parighji è ebbi trà i so prumutori Ferdinand de Lesseps, chì era dighjà statu u custruttori di u Canali di Suez. In u 1881 Lesseps fundò una sucità par raccoglia fondi è iniziò i travagli sicondu un prugettu moltu cumplessu chì ùn prividia micca l'impiegu di chjusi; u so tentativu faddì par via d'ostaculi di natura tecnica è finanziaria. In u 1885 fù sustituitu da Gustave Eiffel è a sucità faddì in u 1889. In u 1901 i Stati Uniti ottensini da u guvernu culumbianu (à l'ebbica Panama facia parti di a Grandi Culumbia) l'autorisazioni par custruiscia è gistiscia u Canali par 100 anni. In u 1903 parò u guvernu di a Culumbia, in un soprassaltu d'urgogliu naziunali, dicisi d'ùn ratificà micca l'accordu. I USA tandu ùn esitoni micca à urganizà una summossa à Panama è à minaccià l'intarventu di l'asercitu s'è fussi avvinuta a riazzioni di u guvernu lighjittimu. Panamá cusì, com'è dighjà Cuba, divintò una Ripubblica indipindenti ma sottu a tutela di i Stati Uniti chì ottensini l'affittu parpetuu di a Zona di u Canali è l'autorisazioni di cumincià i travagli.

 
Canali di Panamá è Canali di u Nicaragua - Carta storica

I travagli cumincioni in u 1907, impresi da u geniu militaru americanu, è si cunclusini u 3 aostu 1914, siguendu i prugetti di u culuneddu Gothal (l'invintori di i chjusi sò l'architetti ducali Filippo da Modena è Fioravante da Bologna). L'inaugurazioni ufficiali fù parò rinviata à u 1920, à causa di l'iniziu di a prima guerra mundiali. A so cundizioni ghjuridica era arrigulata da trè accordi:

  • u Trattatu Hay-Pauncefote (1901)
  • u Trattatu Hay-Bunau Varilla (1903)
  • i Trattati Torrijos-Carter (1977).

U prima di quisti (Trattatu di Neutralità) privedi ch'è i Stati Uniti avissini u drittu pirmanenti di difenda u Canali da ogni minaccia chì pudaria intarfiriscia incù a so accissibilità cuntinuata è neutrali à i navi in transitu di tutti i nazioni, mentri u sicondu hà indicatu l'annu 2000 com'è tarmini di l'affittu di u Canali.

Espansioni di u canali mudificà

U prugettu d'espansioni di u Canali di Panama hè un prugettu chì duppiarà a capacità di u Canali di Panama da u 2014, parmittendu u passaghju di navi più grandi. In l'aprili 2006 s'hè cunclusu u studiu chì hà duratu cinqui anni par un allargamentu di u Canali. L'allargamentu sarà suvitatu in quantu u referendum pupulari hà datu, incù u 75,25% di 'sì' (u 43,3% di l'aghjenti drittu hà vutatu) l'appruvazioni di u prugettu. I travagli, iniziati in u 2007, divariani essa tarminati prima di u 2014, cintinariu di l'apartura di u canali. U prugettu privedi a custruzzioni di dui novi serii di chjusi, paralleli à quiddi esistenti, in currispundenza di ciascunu di l' imbocchi di u Canali. Ogni seria avarà trè camari. Si prucedi inoltri à u scavu di dui canali d'accessu à i novi chjusi è à l'allargamentu di u canali di navigazioni. U prugettu privedi di purtà à u doppiu di a capacità di navigazioni di u canali prima di u 2025.

Reguli di navigazioni mudificà

U transitu di i navi pò avvena sulamenti accittendu i clausi di a "dumanda di transitu" è dopu a so accittazioni da parti di l'autorità panamensi. Duranti u transitu di u canali sò suspesi i dritti rilativi à a stratarriturialità di i navi da guerra è parechji reguli di bandera rilativi à u cummandu è à a cunduzioni di i navi marcantili. U pilotu di u canali, chì hè distinatu à a navi da l'autorità lucali, assumi dirittamenti u cummandu di a navigazioni, ùn svugliendu micca, com'è nurmalamenti avveni in a maiò parti di i porti di u mondu, u rollu di simplici cunsultanti di u cummandanti. U cummandanti, in forza di i leghji è di i rigulamenti disciplinanti a navigazioni marittima, ferma rispunsevuli di i sirvizii è di a funziunalità di a navi sottu u so cummandu, senza parò pudè intarfiriscia in l'uparazioni di pilutaghju. I dritti di prubità è l'urganisazioni interna di i sirvizii di a navi fermani invariati.

Curiusità mudificà

In u corsu di a guasi cintinaria storia di sta via d'acqua ch'hè u Canali di Panama, l' "Autoridad di u Canal de Panamà" hà numinatu parechji "piloti unurarii", trà l'ultimi, u Commodoro Ronald Warwick ghjà cummandanti di a Queen Mary 2 di a cumpagnia di navigazioni inglesa CUNARD LINES è u Cummandanti Supiriori CSLC Raffaele Minotauru, chì era dighjà cummandanti di grandi navi transuceanichi di linia di a storica Italia di Navigazioni S.p.à., megliu cunnisciuta in u mondu di u shipping sottu u nomu di Italian Line. Puri truvendu si l'Uceanu Pacificu à punenti di l'istmu, è l'Uceanu Atlanticu à livanti, una navi chì si prisenta à l'imboccu da u Pacificu, diretta versu i Caraibi, si dirighji à punenti, è li ci voli guasi à vultà à daretu. Analugamenti succedi par un piroscafu chì entri in u Canali da u latu Atlanticu (caraibicu). Si dirighji versu livanti, grossu modu. A spiigazioni di stu apparenti paradossu hè data da u fattu ch'è l'istmu di Panamà, in u so puntu più strettu, è chì hè intarissatu da u Canali, compii una ghjirivoltula, è u so andamentu hè da sudu estu versu nordu punenti, nanzi ch'è da nordu à sudu.

Da veda mudificà

Fonti mudificà

'Ss'articulu pruveni in parti o in tutalità da l'articulu currispundenti di a wikipedia taliana.