Acrosticu

Un acrosticu (da u grecu ἀκρόστιχον, cumpostu di ἄκρον, "estremu" è στίχος, "versu") hè un cumpunimentu pueticu o un'altra sprissione linguistica in i quali e lettere o e sillabe o e parole iniziale d'ogni versu formanu un nome o una frasa.

Acrosticu di Nathaniel Dearborn pubblicatu à Boston in u 1850: lighjendu e prime lettere d'ogni filare, si forma u nome Jenny Lind

À l'origine l'acrosticu avia per sicuru una funzione mnemonica è prubabilmente una funzione magica. Si pussedinu parechji esempii d'acrostici in cumpusizione sacre babilunese, per esempiu quella chì prisintava u nome di u so autore: "Saggil-kinam-ubbib, prete di l'incantesimi di Babilonia". Altri esempii d'acrostici di l'antichità si ritrovanu incù a Bibbia, per opera di u prufeta Geremia, incù u "Libru di e Lamintazione", i cusiddetti "Salmi alfabetichi" in i quali l'iniziu d'ogni versu prisenta, in l'ordine, tutti e lettere di u santacroce (Salmi 25, 34, 119).

Usu

Usu anticu

I più antichi esempii di acrostici in grecu ricollanu à Arato di Soli è à Nicandru; ci sò numerose acrostici trà l'epigrammi di l' Antulugia Palatina è in l'opera di Dionigi u Periegeta. In a litteratura latina Cicerone tistimunieghja ch'è Ennio fù autore d'acrostici; l'argumenti in versi di e cummedie di Plautu, prisentanu in acrostici u titulu di e cummedie stesse.

Frà i pueti cristiani, acrostici funi cumposti da Commodiano in i so Instructiones. A tradizione di l'acrosticu cuntinuò in u Medievu è dopu in a litteratura taliana: moltu famosu hè l'acrosticu custituitu da i capiversi di e terzine di l' Amurosa visione incù i quali u Boccaccio dedicò l'opera à Maria di Aquino.

Famosu hè ancu l'acrosticu postu à l'iniziu di u Cummentu murale à Ghjobba di Gregoriu Magnu. Sò definiti acrostici ancu i termini chì risultanu da e lettere iniziale di singule parole nanzi ch'è di versi: l'esempiu più cunnisciutu hè l'acrosticu cristologicu IΧΘΥΣ, "pesciu", custituitu da l'iniziale di a formula Ἰησοὺς Χριστὸς Θεοῦ Υἱὸς Σωτήρ, (Ghjesù Cristu Salvatore figliu di Diu).

Usu mudernu

Un esempiu d'acrosticu d'epica più ricente, inspiratu da e vicende di a prima è di a siconda guerra di u Golfu, hè quellu irunicamente custituitu incù à e lettere di a parola B.U.S.H.: Bisogna Uccide Saddam Hussein.

L'opera Gödel, Escher, Bach: un'eterna ghirlanda brillante di Douglas Hofstadter face dinù ampiu usu di l'acrosticu.

In Corsica

I pueti corsi anu imprudatu qualchì volta l'acrosticu. Per esempiu Ghjuvan' Petru Lucciardi ni publicò unu in Le Petit Bastiais in u 1909:

Cum'hè, Cirnea cara, cos'hè tuttu stu dolu ?

I to saloni chjosi è tutti i lumi spenti ?

Restu cume sturditu. Saraghju forse u solu ?

N'ebbera ? A ignurà perchè, tù, ti lamenti ?

E cume ? Ùn sai chì Vattelapesca hè mortu ?

A Corsica intiera u pienghje è ùn hà tortu.

è un altru pocu dopu, quand'ellu morse u pueta Petru Matteu Lucciana dettu Vattelapesca:

Vattelapesca hè mortu. U dialettu corsu

Avà cumu farà senza u so babbarellu ?

Temu chi tutt'ognunu, è cun pocu rimorsu,

Tenga à un vulè più avè ch'è frencese in cerbellu

ETesto in grassetto cumu si faria si e nostre mammarelle,

Le zie è le caccare pudessinu turnà ?

Allora le scialate !... E care curciarelle

Ponu ghunghje: nisunu più le capisciarà.

E purtantu ùn trimate, o muntagnoli cari,

Sappiate chì lu corsu si parlarà in eternu,

Chì u sgiò Vattelapesca - riposi in sempiternu!-

A fattu indi 'ssa lingua memorie è libri rari.

Da vede dinù

• Acronimu
• Mesosticu
• Telesticu
• Florentius

Bibliugrafia

• Geniu Gherardi (2011) I Lucciardi - Una famiglia corsa di pueti è di maestri di scola Archiviu 2021-01-22 at the Wayback Machine, Edizione Albiana

Fonte

'Ss'articulu pruvene in parte da l'articulu currispundente di a wikipedia in talianu.