|
U gadduresu si prisenta com'è una lingua assà uniforma incù picculi diffarenzi in sustanza liati à la prununcia.
* A so varianti cumuna, più parlata è standardizata hè quidda '''timpiesa''' (''"timpiésu"''), chì s'hè sparta dipoi u VIu seculu in gren' parti di a Gaddura; à Tempiu hè abitualmenti parlata incù in i scagni pubblichi è in l'ambienti più pristighjosi; a parlata di a cità hà sturicamenti risintutu u maiò influssu catalanu rispettu à quidda di i campagni;
Hè parlata dinò in a marina di Santu Tiadoru à Vignola cù picculi diffarenzi di prununcia è in calchì parola trà Alta è Bassa Gaddura tantu chì i citatini di Tempiu è Caragnani à spessu ùn esitighjani micca à fà rimarcà à i gadduresi di a bassa Gaddura (anticamenti ditti ''pasturini'') a so manera - à i so arichji - grussulana di parlà, par via di a prununcia è di i sprissioni;
* U parlà di '''Caragnani''' (''"caragnanesu"'') si diffarinzighja da u gadduresu cumunu pà certi aspetti di prununcia (ad es. "friacchju" par "friagghju"/frivagghju, "pucchju" par "bugghju"/bughju, "spucchjià" par "sbucchjià"/sbuchjà) è par u so accentu carattiristicu, assà urighjnali.
* A' '''Nuchisi''', in piazza di u sonu nasali palatali "-gn-" par prununzià p.es. "vigna" veni suventi impiicatu u sonu nasali velari "-nghj-" dunqua si prununziighja "vinghja" è innò "vigna", "conghju" è innò "cognu", "Caranghjani" è innò "Caragnani"; à listessa manera, u sonu "gli" veni resu cù "lghj", dunqua "aglióla" (tribbiatura) sona "alghjióla", "puntogliu" (frusta pà fà marchjà li boi) si prununziighja "puntolghjiu", "spianteglia" (suttupedi di suvaru pà i scarpi) diventa "spiantelghjia", ecc.;
* U parlà '''lungunesu''' ha piddatu calchì parola in più da u corsu ughjincu ma ùn prisenta micca diffarenzi strutturali riguardu à u gadduresu cumunu;
* U '''matalininu''' o ''isulanu"'' parlatu annant'à l'isuli di A Matalena, essendu fruttu d'una immigrazioni più ricenti di ghjenti corsa hà carattiristichi di u corsu ughjincu (es. articuli in "u", "i" par "lu", "li", "quiddu" pà "chiddu", "avà" par "abà", "acqua" par "ea", "durci" par "dulci", "nosciu" par "nostru"). Ha dinò parichji paroli d'urighjina ghjenuvesa è punzesa.
* A varietà '''agghjesa''', parlata in l'exi Cumuna di Agghju (Aggius) (Aggius, Badesi, Trinitai, Viddalba è Valledoria Centro), si diffarenza da u gadduresu cumunu pà certi paroli, pà sustituzioni di a C velari cù a G velari (timpiesu "pecura", agghjesu "pegura"; timpiesu "focu", agghjesu "fogu"; timpiesu "eu socu", agghjesu "eu sogu", ecc.) è pà l'usu funeticu di a Z in piazza di C palatali: (gall. "celu", agg. "zelu"; gall. "centu", agg. "zentu"), similmenti à i dialetti sassaresu è castiddanesu; in piu, mentri in lu timpiesu s'utilizighjani i dui soni ucclusivu-palatali o mediupalatali -chj-, -ghj- in paroli com'è "ghjesgia", "occhji", "aricchji", "ghjnocchji", "ghjattu", "figghjulà", "chjamà", "chjodu", "vecchja", in agghjesu u sonu -chj- hè rimpiazzatu da la C palatali (a C di "cecu"; dunqua, si dici: "occi", "aricci", "ciodu", "veccia", ecc.);
* U parlà di '''Bultighjata''', sumiddenti à l'agghjesu, si diffarinzighja parchì a G palatali (quidda di u talianu "gelo") sustituighja u sonu -ghj- (si dici "figgiulà" [figghjulà], "aggesu" [agghjesu] è a N nasali velari (quidda di "mancu") in piazza di u sonu nasali palatali -gn- (par es., si dici "mangià" [magnà, manghjà].
* U suttudialettu '''cuzinesu''' di stampu agghjesu, hè assà vicinu à u bultighjatesu ma faci diffarenza pà a più friquenti linizioni di a "C" velari, pa' l'urdinariu radduppiamentu funeticu di "t" è "m" (''prittindimmu'', gall.cum. ''pritindimu'') è pa' a più marcata influenza lissicali da u Castiddanesu è Logudoresu. Hè parlatu in la Cumuna di S. Maria Coghinas è da calchì famidda di Valledoria.
I diffarenzi trà i parlati appena discritti sò limitati à calchì variazioni funetica, lissicali e/o d'accentu supratuttu trà Alta è Bassa gaddura tantu chì par unu spertu locutori gadduresu sarìa pussibili capì da l'accentu o da calchì parola l'urighjna di una parsona di Tempiu, Nuchisi o Caragnani (è d'Agghju spezialmenti) ma li sarìa monda arduu s'iddu pruvinissi da Lungoni o S.Tiadoru.
|
