Oceanu Atlanticu: differenze trà e virsioni

Ss'oceanu accupa un bacinu à forma di "S", dispositu in a dirizzioni nordu-sudu. Hè divisu in dui sizzioni principali, l'Atlanticu di u Nordu è l'Atlanticu di u Sudu, da currenti equaturiali posti à circa 8° di latitudina nordu. Hè dilimitatu à punenti da u cuntinenti americanu (sii da a parti sittintriunali ch'è da quidda miridiunali) è à livanti da l'Auropa è da l'Africa (ma dui di i so mari adiacenti, u [[Mari Tarraniu]] è u [[Mari Neru]] bagnani ancu l'[[Asia]]). Cumunicheghja incù l'[[oceanu Pacificu]] à traversu u [[Mari Glaciali Articu]] à nordu, è u Canali di Drake (in a Terra di u Focu) è Capu Horn à sudu. Inoltri esisti una cunnissioni artificiali trà i dui oceani, u [[Canali di Panama]], chì si trova vicinu à l'equatori, in l'istmu chì unisci i dui Americhi. À livanti cumunicheghja incù l'[[oceanu Indianu]], à traversu u Capu Agulhas, à u 20° E (è micca da u [[Capu di Bona Spiranza]] com'è si riteni cumunamenti), ma ancu à traversu u canali artificiali di Suez. L'Atlanticu copri u 20% di a superficia di a Terra, ed hè sicondu solu à u Pacificu com'è grandezza. L'oceanu prubbiamenti dittu copri un'aria di circa 82 362 000 km² (para à 8 volti quidda di l'Auropa), chì righjunghji i 106 450 000 km² s'eddi si cunsidareghjani ancu i so mari adiacenti. I terri accupati da u bacinu idrugraficu di l'Atlanticu ammontani à quattru volti quiddi di u Pacificu o di l'Indianu. U vulumu di l'oceanu Atlanticu hè di 323 600 000 km³, è di 354 700 000 km³ cunsidarendu ancu i mari adiacenti. A prufundità media (vulumi/superficii) di l'Atlanticu hè di 3 926 m, ridutta à 3 332 m s'eddi si pigliani in cunsidarazioni i mari adiacenti. A prufundità maiò hè di 9 219 m, righjunta in l'abissu Milwaukee, chì si trova in a Fossa di Portu Ricu, circa 135 km à nordu di l'isula di Portu Ricu. A larghezza di l'Atlanticu varieghja trà 2 848 km in u puntu più strettu, trà u [[Brasili]] è a Liberia, finu à 4 830 km trà i Stati Uniti è l'Africa sittintriunali.