Scola matematica di Lwów

A Scola matematica di Lwów (in polaccu : Lwowska szkoła matematyczna) hè un gruppu di matematichi polacchi travagliendu in u periodu trà e duie guerre à l'Università Jean-Casimir è à a Scola politecnica in Lwów (oghje a cità di Lviv hè in Ucraina). 'Ssi universitarii arriconu un cuntributu particularmente impurtante in u campu di l'analisi funzionale, di e funzione reale è e prubabilità.

Storia

Panca cummemurativa à Cracuvia incù Otto Nikodym è Stefan Banach in discussione teurica

Omu cunsidereghja ch'è a Scola deve a so esistenza à dui matematichi, Hugo Steinhaus (natu in u 1887) è Stefan Banach (natu in u 1892). U so scontru di veranu 1916 à Cracuvia hè diventatu una vera ligenda. Mentre una spassighjata in u parcu Planty à Cracuvia, u prufissore Hugo Steinhaus sentì i studienti Stefan Banach è Otto Nikodym discute a misura di Lebesgue. Intrigatu da 'ssu dibattitu teoricu di prima trinca, Steinhaus sottumissi tandu à Banach un prublema matematicu arduu chì li risistia. À u capu di uni pochi di ghjorni, Banach li arricò a soluzione. 'Ssu travagliu sfuciò annantu à una publicazione cumuna di i dui omini in u bulletinu di l'Università Jagellonne di Cracuvia intitulata 'Annantu à a cunvirgenza di media di serie di Fourier'. Marcò u principiu di a carriera di Stefan Banach è a nascita di a so longa cullaburazione incù Hugo Steinhaus, quandu i dui omini, vinendu da mezi assai sfarenti, ùn avarianu micca duvutu scuntrà si. Diplumatu di l'università di Lwów è di Göttingen, Hugo Steinhaus nascì in una famiglia ghjudeia pruspera, mentre ch'è Stefan Banach, autodidattu, vinia da una famiglia povera di muntagnoli di u sudu di a Polonia, abbandunatu à a nascita da a so mamma.

In u 1929, Steinhaus è Banach fundonu, a rivista Studia Mathematica. L'innuvazione di 'ssu periodicu cunsistì, à l'epica di e riviste generaliste, à cunsacrà si à i prublemi d'analisi funzionale è à a teuria di e prubabilità. A rivista era multilingue. À latu di u polaccu, omu ci truvava l'articuli in alemanu, in lingua inglese è in lingua francese.

I membri di u gruppu si scuntravanu à spessu à u Caffè scuzzese (Kawiarnia Szkocka). I prublemi studiati è e so soluzione si scrivianu annantu à e tuvagliole di carta o propriu annantu à u marmeru di e tavule chì si pristava particularmente bè à a scrittura à u criò. Era interdita di nittà le ma quantunque ci eranu e cose chì si perdianu, è à spessu i matematichi ùn ghjunghjianu micca à recustituisce i so raghjunamenti. Infine, in u 1935, per evità 'sse perdite d'infurmazione, Łucja Banach, a donna di u matematicu, di cumprò un grossu quaternu, u cunfidò à u casceru è i matematichi piglionu l'abitudine d'iscrive ci i prublemi è l'equazione. Cusì hè natu u Libru scuzzese chì pussede un grande valore scentificu. Dopu à a guerra, Stanisław Ulam traduce u libru in inglese è u mandò à i più centri grandi matematichi in u mondu. Criò una sensazione.

U Caffè scuzzese accuglìa ancu i matematichi polacchi di e scole di Cracuvia è di Varsovia: Kazimierz Kuratowski, Bronisław Knaster, Alfred Tarski, Wacław Sierpiński, è ancu i matematichi di u mondu sanu invitati à Lwów. Ulam hà scrittu l'anni più tardi ch'è l'intensità di a riflessione è di u cuncintramentu chì rignava in 'ssu caffè ùn pò paragunà si ch'è à u periodu di travagliu annantu à l'energia nucleare à Los Alamos.

A Siconda guerra mundiale fubbe una sciagura per a Polonia, è in particulare per e so matematiche. Più di 25 matematichi fubbenu tombi o morsenu in i campi. Assai altri, partuti innanzu guerra o spergugliati da a guerra, ùn rivensinu micca frà i quali Stanisław Ulam, Zygmunt Birnbaum o Marek Kac chì si ritruvonu à u Punente, in particulare in i Stati Uniti. Da una decisione pigliata à a cunferenza di Yalta, a cità di Lwów si ritruvò fora di Polonia.

Membri

A scola matematica di Lwów in u 1930.

Frà i membri di a scola matematica di Lwów, omu conta:

• Antoni Łomnicki (1881-1941)
• Włodzimierz Stożek (1883-1941)
• Leon Chwistek (1884-1944)
• Hugo Steinhaus (1887-1972)
• Stanisław Ruziewicz (1889-1941)
• Władysław Nikliborc (1889-1948)
• Eustachy Żyliński (1889-1954)
• Stefan Banach (1892-1945)
• Kazimierz Bartel (1892-1941)
• Stefan Kaczmarz (1895-1939)
• Stanisław Saks (1897-1942)
• Juliusz Schauder (1899-1943)
• Herman Auerbach (1901-1942)
• Władysław Orlicz (1903-1990)
• Zygmunt Birnbaum (1903-2000)
• Andrzej Turowicz (1904-1989)
• Karol Borsuk (1905-1982)
• Stanisław Mazur (1905-1981)
• Edward Marczewski (1907-1976)
• Józef Schreier (1908-1943)
• Marceli Stark (1908-1974)
• Stanisław Ulam (1909-1984)
• Władysław Hetper (1909-1940)
• Meier Eidelheit (1910-1943)
• Józef Pepis (1910-1941)
• Marek Kac (1914-1984)
• Feliks Barański (1915-2006)

Articuli cunnessi

• Scola matematica di Cracuvia
• Scola matematica di Varsovia
• Scola di Lvov-Varsovie
• Scola polacca di matematiche
• Massacru di i prufissori di Lwow
• Libru scuzzese