Santa Maria (Sardegna)
Santa Maria hè un'isula di l'arcipelagu di A Matalena, in u Nordu di a Sardegna è à u sudestu di i bucchi di Bonifaziu.[1] Faci parti di u Parcu naziunali di l'arcipelagu di A Matalena.
Giugrafia
mudificà.JPG)
Incù l'isuli di Budelli è Razzoli situati à menu d'una cintunara di metri à punenti è spiccati da u passu di l'Asineddi, Santa Maria custituisci u gruppu d'isuli u più à u nordu di l'arcipelagu di A Matalena[2]. Di una superficia di 2 km2, Santa Maria hè l'isula a più bassa di tuttu l'arcipelagu incù u so rilevu abbastanza pianu chì culminighja à 69 metri in a Guardia di u Turcu. À a so estremità nordu, Santa Maria pussedi un isulottu culligatu dinuminatu A Presa chì hè accumpagnatu da l'isulottu di Capicciolu.
L'isula pussedi uni pochi d'abitanti à l'annata, ma vedi a so pupulazioni crescia mentri l'istatina par via di uni pochi di infrastrutturi turistichi custituiti da una vintina di casi è un albergu, datendu da prima a missa in piazza di u parcu naziunali è di l'intardizzioni di custruiscia.
Storia
mudificà.JPG)
À u Medievu, l'isula era abitata da frati binidittini chì erani scappati da Bonifaziu è s'erani stabiliti in u munasteru Maria di Budellu custruisci annantu à Santa Maria, accupatu sin'à u seculu XVI po abbandunatu è sfattu à u seculu XIX par l'edificazioni di i casi novi di l'abitanti di l'isula. Santa Maria, è ancu l'isula vicinanti di Razzoli funi abitati à parta da u principiu di l'annati 1800 da i membri di a famidda Bertoleoni, l'avvinturieri chì culunizàni parichji isuli di l'arcipelagu è di a costa uriintali di a Sardegna (com'è Mortoriu è Tavulara). Difatti l'accupàni insinamenti à u 1960.
L'isula fù usata in a siconda parti di u seculu XX da filmeri di filmi in particulari da Franco Solinas è ancu com'è locu di navigazioni è d'arretta di l'attori Gian Maria Volontè - chì hè suttarratu in A Matalena. Mentri una dicina d'annati, l'attori Roberto Benigni ebbi una casa in Santa Maria.
Turisimu
mudificàI dui spiaghji più cunnisciuti di Santa Maria sò:
- cala Santa Maria, chì hè una di i più grandi spiaghji di l'arcipelagu sanu, incù 200 metri di rena bianca è fina fina
- cala di Fossu.
Noti
mudificà- ↑ 'Ss'articulu pruveni in parti da l'articulu currispundenti di a wikipedia in francesu.
- ↑ Veda Isuli Razzoli è Santa Maria annantu à u situ di u parcu naziunali di l'arcipelagu di A Matalena.