Sémillante

A Sémillante era una fregata di a marina francesa di u XIXu seculu. In u so viaghju dapoi l'arsanali di Tulò versu a guerra di Crimea, naufragò à a larga di l'isuli Lavezzi.

Cimiteriu ind'iddi sò inumati i naufragati di a Sémillante.

Storia

Jules Noël : Munimentu cummemurativu di u naufraghju di a Sémillante (1873, incisioni)

A Sémillante chetta u portu di Tulò u 14 di frivaghju 1855, cummandata da u capitanu Jugan, à distinazioni di a Crimea (mari Neru) par arricà à i forzi francesi vivari, rinforzi in truppa è in matiriali par fà a guerra à a Russia.

U so equipaghju conta 293 omini, oltri u so statu magiori. À bordu, hà piddatu piazza un distaccamentu di 393 militari di l'armata di tarra incù un impurtanti matiriali (cannona, murtaii, munizioni, vivari...).

A Sémillante hè piddata in una timpesta trimenti à u largu di a Sardegna è u so cummandanti dicidi di passà da i bucchi di Bonifaziu, à l'isuli Lavezzi, in una zona di zecchi è di scoddi. Spinta da una raffica di sudu, a Sémillante pichja à una vilucità stimata à 12 nodi una zecca signalata da una boa. Sciappata da l'impittatura, sprafunda in a nuttata da u 15 à u 16 frivaghju di u 1855. Tuttu hè statu subitu subitu abissatu.

U 18 di frivaghju, i prima cadavari, certi frastagliati in tuttu, sò turrati annantu à i grevi da i currenti. Sò tutti inumati dopu annantu à l'isula, par via di a mancanza di medii di trasportu, da una curvata di 50 suldati, staccati in rinforzu di i marini. U 20 frivaghju, u numaru di corpi inumati s'ammonta à 250.

U cimiteriu

Piramida di granitu custruita in umaghju à i vittimi di u naufraghju.

Annantu à i 700 omini à latu di a Sémillante, 560 riposani in i dui cimiterii di l'isula. L'altri 136 corpi (è u statu magiori) ùn sò micca stati ritruvati. Soli u capitanu Jugan è u cappiddanu sò stati idantificati.

A placca annantu à u palazzu di i cimiterii annantu à l'isula Lavezzu mintuvighja :

À a mimoria di l'ufficiali di l'armati di tarra è di mari chì ani truvatu a morti in u naufraghju di a Sémillante u 15 di frivaghju 1855 versu meziornu. I so resti sò cunfusi quì incù quiddi di i so omini uniti in u riposu aternu com'iddi l'erani in u duveri. Chì i so nomi fussini cunnisciuti par parmetta ci d'anurà a so mimoria.

Stu incipit in a mimoria di i naufragati hè suvitatu da una piccula lista di nomi chì i so resti sò suttarrati quì. I cimiterii cumprendini altri placchi esurtendu à prigà par tali o tali naufragatu...

Bibliugrafia

• Alphonse Daudet, L'Agunia di a "Sémillante" (in Lettari di u me mulinu) (in francesu)
• Ghjirolmu Lorenzi, U sangui in i veli (Ghjurnali di bordu) [rumanzu], Borgu, ed. Mediterranea, 1998 (in francesu)
• Danielle Favereau, A Sputica Storia di a " Sémillante " [rumanzu], Bastia, ed. Anima Corsa, 2003 (in francesu)
• Dumenicu Milano, anzianu merri di Bonifaziu, U Naufraghju di a " Sémillante ", ed.1980

Liami

• Interromania, Ducumentu: Isule Lavezzi]
• Mostra "Mare Nostrum, i Corsi è u mari" di u 2 di luddu à u 30 di dicembri di u 2011 à u Museu di a Corsica in Corti]