Puppusgiula

A puppusgiula
A puppusgiula
Classificazioni scentifica
Regnu	Animalia
Divisioni	Chordata
Classa	Aves
Ordini	Upupiformes
Famiglia	Upupidae
Genaru	upupa
Nomu binuminali
Upupa epops Linnaeus, 1753

A puppusgiula (o a puppusgia) (Upupa epops) hè un aceddu chì faci parti di a famiglia di l'Upupidae. A puppùsgiula hè longa 25-29 cm, incù un'apartura alaria di 44-48 cm. L'impiumatura hè carrataristica, bruna moltu chjara in a parti subrana è incù una striscia orizuntali biancu-nera in a parti suttana. U capu hè pruvistu di un ciuffu erettili di piumi, u bizzicu essendu abbastanza longu (5-6 cm) è appena incurvatu in ghjò. I patti sò corti ma forti. A puppusgiula pesa 60-80 g. Pò campà insin'à 11 anni. Da marzu à ghjugnu, a femina pone a cova, 5-7 ova biancu-virdicci, par circa 16 ghjorna, in un ciottulu. Dopu 3 o 4 sittimani, i piulacona chettani u nidu. Ci poni ancu essa dui cuvati l'annu. Ci hè pocu dismurfisimu sissuali ind'è a puppusgiula è u masciu è a femina sò guasi listessi.

Upupa epops

Biulugia

A puppùsgiula si nutrisci di larvi d'invertebrati, d'insetti maiori, di mignoculi, di molluschi, o di ragni. Improda u so longu bizzicu per sundà a terra in cerca di predi. A puppusgiula hè dinò cunnisciuta par u so cumpurtamentu, induv'edda improda u so bizzicu par scavà tafona in a terra in cerca di larvi d'insetti. Hè attiva duranti a ghjurnata è passa a nuttata à appuddà si in l'arburi.

Ripartizione

A puppusgiula hè una spezia migratrice prisente in numerosi rigione di u mondu. Hè diffusa in l'Auropa centrali è meridiunali sana, in Asia è in Africa sittintriunali. Migra versu i tropichi in invirnata. Priferisce l'ambienti aperti tali e pratuline, i campi cultivati, l'arici di fureste è e zone arbustive. Mentre a staghjone inguernale, migra versu rigione più calde, in particulare in Africa subsaariana.

In Corsica

A puppusgiula hè prisenti in Corsica. U so nomu veni da u so gridu: "Pupupù, pupù". Hè un aceddu cumunu, ma ghjugniticciu. A puppusgiula affacca in Corsica à parta da u mesi di marzu, ma à spessu, i puppusgiuli ghjugnini in Corsica in i trè primi sittimani d'Aprili. Accadi dinò calchì volta chì a puppusgiula passessi l'annata sana in l'isula, ma hè raru. A puppusgiula stà un pocu dignalocu in Corsica, da u litturali insin'à un'altezza di 1000 metri. Si scontra più suventi accantu à u litturali è priferisci a machja bassa, i prata è s'infatta ancu vicinu à i paesi è i paisoli. Difatti, a puppusgiula si vedi più pocu in a machja alta è spessa.

Sistematica

I sottuspezii di Upupa epops sò:

• Upupa epops africana Bechstein, 1811
• Upupa epops ceylonensis Reichenbach, 1853
• Upupa epops epops Linnaeus, 1758
• Upupa epops longirostris Jerdon, 1862
• Upupa epops major C.L. Brehm, 1855
• Upupa epops marginata Cabanis & Heine, 1859
• Upupa epops senegalensis Swainson, 1837
• Upupa epops waibeli Reichenow, 1913

Innanzi, a puppusgiula hè classificata in l'ordini di i coraciiformi, ma a classifica più ricenti di Sibley & Monroe l'hà integrata in l'ordini novu di l'upupiformi.

Cunsirvazione

A puppusgiula hè cunsiderata com'è una spezia di priaccupazioni minori sient'è l'Unioni internaziunali pà a cunsirvazioni di a natura (UICN). Bench'edda possi essa affittata da a perdita d'ambienta duvuta à l'agricultura intensiva è à l'urbanisaziona, a so pupulaziona ferma stabuli in numarosi righjoni. I misuri di cunsirvazioni tali a prutizzioni di l'ambienti è a sensibilisazioni di u publicu sò escinziali par assicurà a sopravvivenza di 'ssa spezia à longu andà.

Lessicu

A pupusgiula hè ancu chjamata in corsu: a puppusgia, a pappusgia.

Citazioni

Accadi chì a puppusgiula fussi mintuvata in a cultura corsa. Par asempiu in i sprissioni:

• Beddu chì pari una puppusgiula : biddissimu
• Tena a so donna in puppusgia : tena mori à contu a so moglia
• Andà si ni in puppusgia chì significheghja: svaniscia si ni.

Rifarenzi

• Foru corsu, Lessicu
• Papi, Arnestu, Donna
• J.-C. Thibault & G. Bonaccorsi, The birds of Corsica, British Ornithologists’ Union, Check-list n°17, 1999
• J.-C. Thibault, Connaître les oiseaux de Corse - Acelli di Corsica, Ed. Albiana, 2006
• Versini, Saveriu, Parolle di Corsica, 2001, DCL

Liami

• L'acelli - Les oiseaux, Ghjuvan Petru Battestini, Adecec, 1982 Archiviu 2012-01-11 at the Wayback Machine
• U cantu di a puppusgiula Archiviu 2006-05-27 at the Wayback Machine

Altri prugetti

• Upupa epops annantu à Wikimedia Commons.