Predica di a rustaghja
A Predica di a rustaghja hè una puisia scritta da Monsignori di la Fuata. Hè stata publicata in A Muvra in 1924.
Predica di a rustaghja mudificà
- Simonu u cioncu circava in a flicaghja.
- Ghjugni lu preti. O preti, ùn vò più in piaghja.
- È parchì caru Simonu ?
- Aghju persu la rustaghja.
- Lascia fà, lu me cumpari,
- Vogliu fà trimà l’altari.
- Frateddi cari, s’hè pers’una rustaghja
- Chì l’hà la rendi ; l’hà trova in a flicaghja
- Rimittiti la dumani,
- Sinnò boia ùn si n’impaghja ;
- O sintiti ciò ch’e dicu
- O sinnò, vi maladicu.
- Una rustaghja si sà quant’edda costa ;
- Ci vol carbonu è farru à bedda posta,
- È ci vol meza ghjurnata,
- Par avè la ben composta :
- Dunqua deti la à u patronu :
- La rustaghja hè di Simonu.
- Veni lu branu, è ci hè la dibbiera ;
- Veni l’istati è ci hè la dirraschera ;
- Si tù ùn ha' la to rustaghja,
- À nissunu la po' chera ;
- S’edda veni d’andà in piaghja,
- Comu fà senza rustaghja ?
- S'tù va' in campagna par veda li to chjosa,
- La caddi hè aparta, è boiu ùn si riposa ;
- Tagliarè dui o trè machji,
- Se' sicuru ; bedda cosa !
- Sì tù incontri la lamaghja,
- Comu fà senza rustaghja ?
- Ghjuntu in u pratu, ti fughjni li feri ;
- Ha' la rustaghja, ùn tena pur pinseri :
- Boia è vacchi tutti quanti
- Vinarani vulinteri ;
- Taglia a fronda, è hani da traghja ;
- Comu fà senza rustaghja ?
- Ha' una quistioni, lu stilu hè pruibitu,
- È la pistola ùn hà chè lu banditu ;
- Sì tù porti la rustaghja,
- Qual s’accosta cusì arditu ?
- Sì lu ghjacaru t’abbaghja,
- Comu fà senza rustaghja ?
- Ci vol a trava da l’eghji è da Nironu,
- Da Bracacciola, da u mulu è da Baghjonu ?
- Sbrumarè quattru lamaghji,
- Ùn ni manca à u lamaghjonu ;
- Chì ni vol trè o quattru paghja ?
- Comu fà senza rustaghja ?
- Li sgarzunotti ti coglini li fica ?
- Chì ci hè bisognu chì nimu la ti dica ?
- Pensi forsa di parà li
- Cù u mintrastu o cù l’urtica ?
- Ci vol pronta la lamaghja:
- Comu fà senza rustaghja ?
- Si la to vigna hè accantu à u mal vicinu,
- È si tù brami di bia lu to vinu,
- Chjudi bè lu to scaleghju,
- Cun un tancu prugnulinu
- Osinnò cù la lamaghja ;
- Ma ci vol a to rustaghja.
- Sensa rustaghja, nun servi à cinquantà la
- Soffri la vigna, parch’ùn si pò fà pala,
- Si ni casca lu fasgiolu
- È u currochjulu s’ammala,
- Sì la festa ùn hè carraghja,
- Ci vol dunqua la rustaghja.
- Ti si vol chjimpà la sarpi catiddata,
- Sì tù vol fughja, ha' da impiità l’annata ;
- Sì tù pari, vidaremu
- S’edd’ùn nasci la frittata,
- Or par quistu, tù ha' da raghja,
- Sì tù ùn ha' la to rustaghja !
- Hè un usu anticu, lu sani ancu in Varchjaghja ;
- Chì movi un pedi, bisogna ch’eddu l’aghja.
- Ùn hè omu di Furciolu
- Chì un porta la rustaghja :
- È vurristi chì Simonu
- Si n’andessi c'lu bastonu !
- Dunqua, figlioli, rinditi la rustaghja :
- Dopu dumani Simonu hà da andà in piaghja,
- Chì l’avissi è ùn a di rendi,
- Pagarà li so viaghja ;
- Eppo' hè fretu aval d’invernu ;
- Ma chì caldu ch’hè in infernu !
- Sta sbradizata la feci preti Santu,
- Ma com'ed’eddu ùn ci n’abbaghja tantu ;
- Pridicheghja cusì bè ni,
- Eppo' basta lu so cantu !
- Pa li funi è li rustaghji,
- Ùn ci hè preti chì l’assaghji.
- Tuttu u Furciolu ludava stu sirmonu ;
- Ma u più cuntentu qual era po ? Simonu.
- N’hà ma’intesu lu Furciolu ?
- Oh ! lu latru ! ma chì tonu !
- È mort’eiu, dissi lu preti,
- Ma da più ni sintareti.
- Di sti sirmoni nissunu ni pò fà :
- Ni sfidu tutti li preta d'lu di quà :
- Venga quì u seminaristu ,
- Venga quì cù u sò rabà !
- S’è mi vogliu scuzzulà ,
- Tandu sì chì sintarà.