Piazza Santu Niculà (Bastia)

A piazza Santu Niculà hè a piazza a più grande di Bastia. D'una lungura di 280 metri pè 80 di largu, hè una di e più grande di Francia. Hè u locu di spassighjata storicu di i Bastiacci.

Vista di a piazza Santu Niculà

Orìgine di u nome

A piazza si chjama "Santu Niculà" per via di a presenza d'una cappella dedicata à stu santu. Oghje smarrita, hè stata distrutta in u 1889 quandu sò stati fatti i travagli di custruzzione di u corsu Pasquale Paoli.

Si truvava à u numeru 17 di u boulevard de Gaulle.

A cima di a Piazza

Storicu

A creazione di a piazza ricolla à u seculu XVIII. Nanzu ùn c'era ch'è una spianata abbandunata. U fiume di u Fangu si lampava in fondu di a piazza, induve ci hè a merrìa attuale. In a parte à meziornu, c'eranu scogli. U locu si chjamava "U Monte".

Differenti nomi di a piazza

Sò i Francesi chì l'anu da accuncià, quandu stallanu u guvernu in l'attuale liceu Jean Nicoli. A piazza hè battizata prima place Narbonne, di u nome di u generale. In l'anni 1820 si chjama place de Rivière, di u nome di u marchese Charles de Rivière. S'hè chjamata dinù place Louis-Philippe.

L'accunciamenti

In u 1831 ci hè un prugettu pè rifalla. Hè l'architettu bastiacciu Louis Guasco chì ne hè incaricatu. In u 1834 si lampa in fondu di a piazza u sbreiu di e custruzzione di a cità. À a fine di u seculu XIX sò lampati i petraculi cacciati per fà u tunnellu di u trenu, chjamatu tunnellu di "A Turretta". Hè tandu chì u fiume di U Fangu hè canalizatu.

Una muraglia hè alzata da u latu di u mare. E palme sò poste in u 1907.

In u 1911 hè inauguratu un palazu, u Cyrnos Palace. St'albergu hè decuratu di manera ricca. Rivalizeghja di bellezza cù i più belli palazzi di a Costa d'Azuru. Ma hè distruttu da i bumbardamenti americani in u 1943

A piazza hà ancu servutu di terrenu di ballò nanzu à a guerra di 1914.

Infine, a prefettura hè custruita in fondu di a piazza, in l'anni 1960, à u locu di l'anzianu Cyrnos Palace. Stu bastimentu diventerà a merria di Bastia in u 1982.

A merria di Bastia

Dimensioni

Face 280 metri di lunghezza è 80 di largu. Misura dunque 22.400 metri quatrati. Hè più grande ch'è Trafalgar Squara in Londra è San Petru in Roma.

Munumenti

A statua di Napuleò

Statua di Napuleone

A statua di Napuleò in custume d'imperatore rumanu hè l'opera di u scultore fiurentinu Lorenzo Bartolini. D'appressu à certi saria piuttostu rapresentatu in divinità, postu ch'ellu hà l'attributi di u diu Ghjove.

Hè stata cummandata da a surella di Napuleone, Elisa. Duvia esse stallata in u so palazzu di Lucca, in Tuscana. In u 1813 a statua hè compia. Ma l'Imperu hè cadutu è u prugettu fù abbandunatu.

In u 1849, un annu nanzu a so morte, u scultore l'hà pruposta à a merrìa di Bastia. L'accessu di Napuleone III à u pudere hà facilitatu l'operazione. L'inaugarazione hè stata fatta u 15 di ghjungnu 1854.

Daretu à a statua, nant'à u pedestallu ci sò l'arme di a cità di Bastia, a torra chì rapresenta u primu castellu custruitu durante a fundazione di a cità.

• 
  A statua di Napuleò
• 
• 
• 

U chjoscu à musica

Hè statu inauguratu in u 1908.

U chjoscu

U munumentu à i morti

U munumentu à i morti hè statu fattu pè cummemurà a prima guerra mundiale induve 400 suldati bastiacci sò stati tombi. Hè l'opera di dui artisti bastiacci : Louis Patriarche è Jean-Mathieu Pekle.

A statua

A scultura di Louis Patriarche

Hè stata cummandata da a municipalità bastiaccia à u scultore Louis Patriarche in u 1920. A scultura hè inaugurata in u 1925. U gruppu ammenta un episodiu di a storia di a Corsica chì s'hè passatu à u XVIIIu seculu. Una veduva, Margherita Paccioni di Rennu, avia persu i so dui figlioli in a guerra d'indipendenza. Hà purtatu u so ultimu figliolu à Pasquale Paoli. Simbulizeghja u sacrifiziu è l'amore di a patria. munumentu face pulemica, sopr'à tuttu pè u so basamentu chì ùn piace micca. Hè statu cambiatu è in u 1935 hè inauguratu u novu. davanti à 20.000 persone. Tandu u merre hè Emile Sari.

U bassurilievu

Nant'à u basamentu di a statua ci hè un bassurilievu di bronzu, fattu da un altru scultore bastiacciu, Jean-Mathieu Peckle (1868-1956). Rapresenta un voceru. tradiziunale.

U bassurilievu di Jean-Mathieu Pekle

Case è palazzi

Ci sò parechji palazzi ingiru à a piazza Santu Niculà. Certi sò case d'Americani. Hè per esempiu u casu di a casa Roncajolo, in cima di a piazza, da u latu sud. Hè statu custruitu in l'anni 1850. I fratelli Roncajolo anu fattu furtuna in l'espurtazione trà Marseglia è u Venezuela.

Ci sò dinù u palazzu Agostini è u palazzu Fantauzzi.

• 
  Palazzu Roncajolo
• 
  Palazzu Fantauzzi
• 
  Palazzu Agostini

Da vede dinù

Pagine ligate

• A Citatella
• San Roccu
• A Cuncezziò
• San Ghjuvà
• Santa Maria
• San Carlu
• Santa Croce

Ligami

Piazza San Niculà, filmettu di u Scéren-CRDP, 2012