Milvu neru

U milvu neru hè un rapaci diurnu di taglia media appartinendu à a famiglia di l'Accipitridae, chì cumprendi dinò numarosi altri rapaci diurni. Si distingui da u so piumaghju neru brunicciu, i so ali larghi è arcati, a so coda furcata è i so ochja giaddi. A taglia varieghja siont'è a sottuspezia, ma a maiò parti di l'individui misurani circa 55 à 65 cm di longu è ani una largura da 130 à 150 cm. A coda di u milvu neru hè furcata, ma menu ca quidda di u milvu. Pesa trà 600 è 1000 grammi. U milvu neru pò campà sin'à l'ità di 20 anni.

Ripartizioni

U milvu neru hè una di i spezii di rapaci i più sparti à u mondu. Omu u trova in i righjoni trupicali è subtrupicali d'Africa, d'Aurasia è d'Australasia. Hè assenti di certi zoni, in particulari l'arcipelagu indunisianu è certi parti di l'America suttana. Da marzu à uttrovi u milvu neru si pò scuntrà in guasi l'Auropa sana. Priferisci i loca aparti. D'inguernu, u milvu neru stà in l'Africa sottusahariana.

In Corsica

Milvus migrans hè prisenti in Corsica.^[1]

Biulugia

U milvu neru hè un aceddu uppurtunistu chì si nutrisci d'una grandi varietà di predi, in particulari di picculi mammiferi, di rettili, d'anfibii, di mastaruculi è di carogni. Caccighjeghja à spessu bulendu altu in u celi, scrutendu a terra in cerca di nutrimentu. Pò dinò arià senza sforzu mentri longhi periudi, usendu i currenti d'aria ascindenti pà cullucà si.

I milvi neri sò munugami è custruiscini nidi vuluminosi in l'arburi o annantu à i scuglieri. A femina diponi di regula 2 à 4 ova chì sò incubati da i dui parenti. I piulagona nascini cuparti di prima pelu è sò dipindenti di i so parenti pà nutriscia si sinu ch'eddi siini capaci à bulà.

Sistematica

Esistini parechji sottuspezzii di Milvus migrans:

Milvus migrans milvus
Milvus migrans lineatus : a sottuspezia africana
Milvus migrans parasiticus : in Africa
Milvus migrans govinda in India
Milvus migrans affinis : in Australia

Cunsirvazioni

U milvu neru hè classificatu com'è una spezia di priaccupazioni minori da l'Unioni internaziunali pà a cunsirvazioni di a natura (UICN). Eppuri, certi pupulazioni ani cunnisciutu una calata impurtanti par causa di a distruzzioni di l'ambienti, di l'avvilinamentu è di l'inticciu incù i linii elettrichi. Hè impurtanti di pruteghja l'ambienti di u milvu neru è di sinsibilizà u publicu à a so impurtanza eculogica.

U milvu neru hè prutettu da a cunvinzioni internaziunali di Washington (CITES) chì intardisci u cummerciu di i spezii di fauna è di flora minacciati di sparizioni.

Noti

↑ Thibault & Bonaccorsi (1999), Thibault (2006).

Rifarenzi

J.-C. Thibault & G. Bonaccorsi, The birds of Corsica, British Ornithologists’ Union, Check-list n°17, 1999
Jean-Claude Thibault, Connaître les oiseaux de Corse - Acelli di Corsica, Ed. Albiana, 2006

Liami

Lessicu - l'aceddi - les oiseaux, Adecec
Milvus migrans (in francesu) Archiviu 2009-03-05 at the Wayback Machine

Altri prugetti

Milvus migrans annantu à Wikimedia Commons.

[1] Thibault & Bonaccorsi (1999), Thibault (2006).

[1]