Lisandru Magnu (in grecu anticu : Aléxandros ho Mégas o Mégas Aléxandros) o Lisandru III (Aléxandros III), natu u 21 lugliu 356 av. G.-C. in Pella è mortu u 11 ghjugnu 323 av. G.-C. in Babilonia, hè un rè di Macidonia è unu di i parsunaghji i più celibri di l'Antichità. Figliolu di Filippu II, elevu d'Aristoteli è rè di Macidonia à parta da u 336, diventa unu di i più grandi cunquistadori di a storia pigliendu pussidimentu di l'immensu Imperu persicu è avanzendu si insin'à i spondi di l'Indu.

Lisandru Magnu in una copia di un bustu grecu in u British Museum di Londra
Lisandru Magnu in una copia di un bustu grecu in i Musei Capitulini (Roma)

Dopu à l'assassiniu di Filippu, Lisandru ridita d'un riamu putenti è d'una armata spirimintata. Ripigliendu u prugettu panellenicu di u so babbu, riunisci a Macidonia è i cità grechi in una cualizioni cù u fini d'invada l'imperu persicu. In u 334, sbarca in Asia, iniziendu una campagna chì durarà deci anni. Vinci una prima vittoria contru à i satrapi persichi à u Granicu chì li offri l'Anatolia. Po in u 333, scunfighji u rè Dariu III à Issos. Imprendi a cunquista di a Fenicia è marchja insin'à l'Egittu ind'eddu hè pruclamatu faraonu. A vittoria à Gaugamele in u 331 li offri a tutalità di l'imperu persicu. Porta dopu una campagna contru à i generali persichi indomiti è s'avanza sinu à u paesi di i Scitichi. Dirighji infini una ultima campagna à u Pendjab è in a vaddi di l'Indu (u Pacchistanu attuali) mentri a quali vinci a battaglia di l'Hydaspe ; ma in u 326 i so suldati ricusani d'avanzà più luntanu. Mori in 323 à Babilonia prubabilamenti di malatia, à l'ità di trenta dui anni, prima di avè pussutu rializà i so prugetti di cunquista di l'Arabia.

Lisandru Magnu hà fundatu una vintina di cità, a più impurtanti essendu Alissandria d'Egittu, ed hà impiantatu culonii insin'à i cunfini di l'Asia, stindendu nutevulamenti l'influenza di l'ellenisimu. Si piazza in a cuntinuità di i suvrani achemenidi è cerca à assimilà i fiori asiatichi incù pà scopu d'assicurà a perennità di l'imperu ch'eddu hà criatu, com'eddu ni tistimunieghja in particulari u so matrimoniu incù una principessa di Bactriana, Russana. U so imperu hè spartutu à a so morti trà i so principali generali, i Diadochi, chì formani à a fini di u ivesimu seculu av. G.-C. i diffarenti riami di u periudu ellinisticu.

A pusterità di Lisandru Magnu à traversu a storia, i culturi è i riligioni si spiega da l'ampiezza di i so vittorii militareschi, da a so vulintà di cunquista di l'insemu di u mondu cunnisciutu è da a so parsunalità piena di filusufia ma ancu di dismisura. A so epupea suscita da l'Antichità numarosi publicazioni litterarii. Parò i scritti di i storichi cuntimpuranei di l'avvinimenti sò tutti sparitu ; soli sussistini à i ghjorna d'oghji i so abbriviadori, frà i quali certi sò à l'urighjina di i lighjendi chì u cuncernani. Frà i so raconti legendarii, u Rumanzu di Lisandru accupa una piazza à parti ; isciutu da i scritti di u Pseudu Callisteni, mischia a storia è u fantasticu pà divintà unu di l'opari non riligiosi i più letti in u Medievu, in Uccidenti com'è in Urienti.

Da u regnu di Lisandru Magnu si custruisci un mitu chì u prisenta com'è un aroi divinizatu. 'Ssa numata, malgradu i critichi risguardu à i so eccessi o à a so crudeltà, varca dopu i fruntieri di u mondu grecu pà piglià piazza frà i scritti di i riligioni munuteisti. In a Roma antica, hè cunsidaratu com'è un mudeddu par bon parechji generali è imperatori. In l'Imperu bizantinu, benifizieghja di una grandi pupularità in tutti i mezi suciali è rapprisenta l'ideali di u suvranu, mentri ch'eddu cunnosci una forma di cristianisazioni. In l'Auropa medievali, hè vistu com'è un asempiu di virtù cavaddareschi à traversu à u Rumanzu di Lisandru. À l'ebbica muderna, hè un tempu un mudeddu pà Louis XIV. À u seculu di i Luci, apparisci com'è quiddu chì hà stesu a civilisazioni auropea è apartu u cummerciu trà l'Auropa è l'Asia. À l'ebbica cuntimpuranea, ispira a vulintà d'indipendenza di i Grechi è diventa u mudeddu di u cunquistadori è u civilizadori pà i prumutori di a culunisazioni auropea. In Asia, benifizieghja di una grandi pusterità sottu u nomu di Iskandar (o Iskander). Infini, hè rapprisintatu in numarosi opari d'arti di l'Antichità sinu à i nosci ghjorna.

Fonti mudificà

Fonti diretti mudificà

I fonti diretti annantu à Lisandru Magnu sò schersi è frammintarii. U racontu di Callisteni, nipoti d'Aristoteli è sturiugrafu ufficiali di u cunquistadori, ùn hè micca statu cunsirvatu in a so integralità. I scritti di i cumpagni di Lisandru Magnu, in particulari Tulomeu, Aristobuli, Nearcu, Onesicriti è Careti, ani dinò sparitu. A Storia di Lisandru di Clitarcu, ridatta pocu dopu a morti di u cunquistadori, hè dinò ridutta à u statu di frammenti.

L'archivii reali cuntimpuranei ani ancu eddi sparitu. Hè in particulari u casu di l'Efemeridi, cronachi ridatti da u cancillieri Eumeni di Cardia à parta da u 330. 'Ssi archivii parini essa stati prestu inaccissibuli dopu à a morti di Lisandru.

Frà i ducumenti ufficiali, soli sussistini schersi scrizzioni epigrafichi emissi in cità grechi. I fonti numismatichi furniscini impurtanti dati pulitichi è ecunomichi.

Fonti indiretti mudificà

I fonti diretti annantu à Lisandru Magnu, veni à dì i scritti di i so cuntimpuranei, sò pà a maiò parti spariti. I soli fonti indiretti chì ci sò parvinuti sò i raconti d'autori rumani o grechi chì ani vissutu parechji seculi dopu à a morti di u cunquistadori.

Si distingui dui tradizioni principali in 'ssi raconti. A prima, rapprisintata da Arrianu è Plutarcu, hè cunsidarata com'è più affidevuli. 'Ssi autori s'appoghjani annantu à i Mimorii di Tulomeu è d'Aristobuli, dui cumpagni di Lisandru.

A siconda tradizioni, rapprisintata da Diodoru, Quintu Curziu è Ghjustinu, hè ghjudicata di menu affidevuli. 'Ssi autori s'appoghjani in grandi parti annantu à a Storia di Lisandru di Clitarcu, un autori di u 4 e seculu av. G.-C., chì hè cunsidaratu com'è pocu ubbiettivu.

Arrianu mudificà

Arrianu hè un ufficiali rumanu di u 2 e seculu ap. G.-c. hè l'autori di l'Anabasa di Lisandru, un racontu dittagliatu di i cunquisti di u cunquistadori. Arrianu s'appoghja annantu à i Mimorii di Tulomeu è d'Aristobuli, ch'eddu hà pussutu cunsultà in a bibbiuteca d'Alissandria. Hè un tistimoniu affidevuli, ma ùn hè micca esenti di prighjudicamenti. Ammira Lisandru Magnu, ma u ghjudicheghja calchì volta troppu ambiziosu è arruganti.

Plutarcu mudificà

Plutarcu hè un biugrafu è muralistu grecu di u 1a seculu dopu. G.-C. hè l'autori di a Vita di Lisandru, una biugrafia in a quali paraguneghja Lisandru Magnu à Ghjuliu Cesaru. Plutarcu s'appoghja annantu à una grandi varietà di fonti, chì i so Mimorii di Tulomeu è d'Aristobuli, ma ancu raconti più tardivi. Hè un tistimoniu intarissanti, chì arreca un puntu di vista greca annantu à Lisandru Magnu.

Diodoru mudificà

Diodoru di Cicilia hè un storicu grecu di u 1a seculu av. G.-C. hè l'autori di a Bibbiuteca storica, un'opara anciclupedica chì cumprendi un racontu di i cunquisti di Lisandru. Diodoru s'appoghja in grandi parti annantu à a Storia di Lisandru di Clitarcu. Hè un tistimoniu affidevuli, ma hè influinzatu da i so puliti idei murali.

Quintu Curziu mudificà

Quintu Curziu hè un ufficiali rumanu di u 1a seculu ap. G.-C. hè l'autori d'una Storia di Lisandru Magnu, un racontu in latinu. Quintu Curziu s'appoghja in grandi parti annantu à a Storia di Lisandru di Clitarcu, ma ancu sopra à altri fonti, chì i so Mimorii di Tulomeu è d'Aristobuli. Hè un tistimoniu affidevuli, ma hè influinzatu da i rumanzi di Lisandru chì erani pupulari à a so ebbica.

Ghjustinu mudificà

Ghjustinu hè un autori rumanu di u 2u seculu ap. G.-C. hè l'autori d'una Storia univirsali, chì cumprendi un racontu di i cunquisti di Lisandru. Ghjustinu s'appoghja in grandi parti annantu à i Storii filippichi di Trogu Pumpeiu, un storicu rumanu di u 1a seculu av. G.-C., chì s'appoghja eddu stessu annantu à a Storia di Lisandru di Clitarcu. Ghjustinu hè un tistimoniu affidevuli, ma hè influinzatu da l'idei antirumani di Trogu Pumpeiu.


Fonti archiulogichi mudificà

I tistimunianzi archiulogichi annantu à Lisandru Magnu sò schersi, ciò chì hè duvutu à a brevità di u so regnu è à a difficultà di datà i strati archiulogichi di quidd'ebbica.

L'Alissandria fundati da Lisandru Magnu sò spariti, cacciatu ni Alissandria d'Egittu. U situ attuali d'Aï Khanoum currispondi podarsi à Alissandria di l'Oxos, ma a ducumintazioni scuparta hè più tardiva.

A tomba di Filippu II, u babbu di Lisandru, mostra una scena di caccia annantu à un affrescu. Si pudaria agiscia si u ghjovanu Lisandru à fiancu à u so babbu.

A maiò parti di l'opari d'arti cuntimpuranei di u regnu di Lisandru sò spariti, ma sussisti uni pochi d'opari uriginali di l'ebbica ellinistica.

I mosaichi di a caccia à u lionu è di a caccia à u cervu chì rapprisentani verusimilamenti Lisandru Magnu datani di l'ultimu quartu di u quartu seculu av. G.-C. ; sò stati missi in casi à Pella.

U sarcofagu di Lisandru ritruvatu à Sidonu data di a fini di u quartu seculu av. G.-C. ; glurificheghja u cunquistadori, muscendu dinò a so capacità à allià si incù u fiori persicu.

A celibra mosaica di Lisandru pruvinendu da Pompei dataria di a fini di u 2u seculu av. G.-C. Mostra Lisandru cumbattendu Dariu III à a battaglia d'Issos siont'è a tiuria tradiziunali, vali à dì à a battaglia di Gaugameli siont'è un'antra tiuria.

Ghjuvantù è educazioni mudificà

Ghjuvantù mudificà

Lisandru Magnu hè natu in Pella, in Macidonia, u 20 o u 21 lugliu 356 av. G.-C. hè u figliolu maiò di u rè di Macidonia Filippu II è di a principessa Eacidi di Epiru Olympias.

Siont'è una lighjenda, Lisandru saria natu di a leia trà Olympias è Zeus, u rè di i dii. 'Ssa lighjenda hè apradata da Lisandru Magnu à fini pulitichi, fendu calchì volta rifirimentu à u diu innanzi cà à Filippu quand'eddu evucheghja u so babbu.

À l'ità di 10 anni, Lisandru avaria sunatu di lira è ricitatu tiratio tragichi davanti à l'ambasciadori ateniesi.

Educazioni mudificà

À l'ità di 13 anni, Lisandru hè cunfidatu à l'educazioni di u filosofu Aristoteli. Quistu li insegna a filusufia, i scenzi, i matematichi, a litteratura è a storia.

L'educazioni di Lisandru hè marcata da u desideriu di u so babbu di fà d'eddu un grandi rè. Filippu II li insegna l'arti di a guerra è di a strategia militaresca.

Regnu mudificà

Rè di Macidonia mudificà

Lisandru Magnu hè rè di Macidonia da 336 à 323 av. G.-C.

Accissioni à u puteri mudificà

Lisandru succedi à u so babbu, assassinatu in 336 av. G.-C. Hè tandu annosu di vinti anni. Devi prima assicurà a so pusizioni in Macidonia, eliminendu i so rivali putinziali. Faci cusì tumbà u so cucinu Amyntas IV, u so mezu frateddu Caranos, è ancu dui principi di Lincestidi.

Campagni sittentriunali mudificà

In 335 av. G.-C., Lisandru imprendi dui spidizioni contru à i barbari da u nordu, una sinu à u Danubiu, l'altra in Illiria rivultata. Scunfighji i Triballi, i Geti è a pupulazioni d'Illiria, è s'imponi com'è u maestru di u righjonu.

Rivolta di i cità grechi mudificà

Mentri Lisandru hè accupatu à nordu, i cità grechi si rivoltani contru à a duminazioni maciduniana. Lisandru intarveni prestu è sfracicheghja a rivolta di Tebi, chì hè spiantata. Atena hè risparmiata, ma Lisandru riclama indarru ch'eddi li fussini missi in manu i principali oratori antimaciduniani.

Spidizioni in Asia mudificà

In 334 av. G.-C., Lisandru lancia a so spidizioni in Asia contru à l'Imperu persicu. Vinci una seria di vittorii dicisivi, à Granica, à Issos, à Gaugameli, è s'impatrunisci di a maiò parti di l'Imperu persicu.

Lisandru u Cunquistadori mudificà

Ubbiettivi di a spidizioni in Asia mudificà

 
I cunquisti di Lisandru Magnu.

Lisandru ripiglia à so contu u prugettu panellenicu di u so babbu Filippu II, fideli à u pinsamentu d'Isocrati chì chjama à l'unioni di i Grechi intornu à u riamu di Macidonia contru à u numicu ereditariu ch'eddi rapprisentani i Persichi. A guerra contru à l'Imperu achemenidi pari inevitevuli dapoi chì Artaxerxes III hè vinutu in aiutu à Bisanza è à Perintu in 340 av. G.-C. cù u fini di riducia 'ss'espansioni maciduniana chì rimetti in causa a Paci di u Rè. Filippu ùn hà micca cunsidaratu a cunquista di l'insemu di l'imperu persicu, ma piuttostu di staccà ni i pruvinci egei induva l'influenza greca hè forti, à l'incuntrariu di l'altupianu anatolicu mori iranizatu. Cerca ancu à fidarà i Grechi contru à i Persichi, prima chì quiddi ùn si allieghjini contru ad eddu. D'altrondi certi Grechi sperani chì 'ssa spidizioni addibulisciarà a Macidonia è currispondini sicritamenti incù i Persichi.

Armata di Lisandru mudificà

In u prulungamentu di Filippu II chì hà stazzunatu l'arnesu di a cunquista, Lisandru benifizieghja di numarosi carti maestri militareschi, chì vani aldilà di u so carisimu parsunali o di u so curaghju in a battaglia. Disponi prima, à l'iniziu di a spidizioni, d'una armata agguerrita da i guerri di Filippu. 'Ss'armata hè furmata d'una falangia, à tempu putenti è mobili, d'una cavaddaria greva, sputica forza d'assaltu, d'una cavaddaria lighjera, rapita à a manovra è d'ardigni di sediu, efficaci pà a presa di i piazzi forti. S'appoghja ancu annantu à a lialtà di i so Cumpagni, frà i quali un squadronu di 300 cavalieri forma a so vardia (l'agema), è pò cuntà annantu à l'epiguni (eredi) persichi ricrutati à parta da 330 av. G.-C.

Sbarcu in Asia (branu di u 334) mudificà

Di maghju 334 av. G.-C., à a testa di i forzi cualizati riuniscendu Maciduniani è Grechi di a leia di Corintu, Lisandru parti da Pella è, in vinti ghjorna, aghjunghji Sestos in Chersonesi di Tracia. Quand'eddu sbarca in Asia, ficca a so lancia in a terra, significhendu ch'eddu conta fà di i duminii di u Grandi Rè persicu a terra cunquistata da a lanci. Mentri chì Parminionu hè incaricatu di traspurtà l'armata maciduniana à Abydos, Lisandru si dirighji à a testa di 37000 omini versu Eleonti, in Chersonesi, ind'eddu anureghji da un sacrifiziu l'aroi Prutesilas, prima Acheu cascatu à u mumentu di a guerra di Troia. 'Ssu cennu hè u prima d'una longa lista chì illustra a vulintà di u rè di culpà l'imaginazioni fendu si passà pà u nuveddu Achilli, senza ch'eddu sii pussibuli di sapè s'eddu hè sinciramenti pinitratu di a fiirezza d'appartena à a razza di l'aroi o s'eddu si tratta d'un simpliciu gestu tiatrali à distinazioni di i so suldati è populi d'Asia Minori è di Grecia.

Lisandru sbarca dopu in Asia vicinu à a lucalizazioni supposta di Troia. Ereghji l'altari in u tempiu d'Atena, po diponi una curona annantu à a cappedda d'Achilli, pruclamendu lu biatu d'avè avutu i so provi narrati da Omeru mentri chì Efaistionu, u so predilettu, faci listessa annantu à quiddu di Patroclu. 'Ssu piligrinaghju à Troia pò parè tantu rumantica chì publicitariu. Lisandru riunghji dopu a so armata à Arisbè in quattru ghjorna, cunturnendu pà u nordu u massicciu di u Pityos.

Battaglia Granica (maghju 334) mudificà

U principali capu mercinariu grecu di Dariu III, Memnon di Rodi, hè partitanti di a pulitica di a terra brusgiata faccia à i Maciduniani, chì ni stima u valori. Pruponi dunqua di purtà versu l'internu di u paesi, senza cumbatta, i truppi di Lisandru, mentri chì a flotta persica purtaria a guerra insin'à Macidonia

D'Issos à Gaugameli mudificà

Lisandru Magnu, dopu à avè chittatu Gurdionu, sottumetti prestu a Paflagunia è a Cappadocia, po avanza versu u sudu, intrendu in Cilicia. Malgradu una malatia à Tarsa, cuntinueghja, sottumittendu i muntagnoli di Cilicia è catturendu i Lingui. In quistu mentri, vittoriiin Caria è a caduta d'Alicarnassu rinforzani a so pusizioni, bench'è a situazioni firmessi tesa incù a ghjunta imminenti di Dariu III.

A battaglia d'Issos di nuvembri 333 av. G.-C. si cunchjudi da una vittoria dicisiva di Lisandru, catturendu a famiglia di Dariu. 'Ssa vittoria caghjuneghja un avvicinamentu di i cità grechi incù Dariu, ma Lisandru manteni a prissioni, in particulari in Fenicia, ind'eddu sottumetti parechji cità. U sediu di Tir, da ghjinnaghju à aostu 332 av. G.-C., hè particularamenti difficiuli, ma si tarmineghja cù a vittoria di Lisandru, chì parsuviteghja dopu versu l'Egittu.

In Egittu, Lisandru hè accoltu in libaratori. Hè pruclamatu faraonu à Memphis in u 331, sceglii a lucalizazioni d'Alissandria, è cunsulta l'oraculu di Zeus Ammon à Siwa. In quistu mentri, a flotta persica hè difinitivamenti vinta in u mari Egeu, cunsulidendu a pusizioni di Lisandru.

A battaglia di Gaugameli d'uttrovi 331 av. G.-c. marca un'antra vittoria cruciali pà Lisandru. Dopu à 'ssa battaglia, si pruclama rè d'Asia è parsuviteghja à Dariu, chì fughji. Lisandru entri in Babilonia, po à Susa, ind'eddu s'impatrunisci d'immensi tisori. In Grecia, Antipater, righjenti di Lisandru, faci fronti à i rivolti, in particulari quidda di Agis III di Sparta, ma i riprimi incù successu.

Lisandru cuntinueghja a so campagna in Persidi, ind'eddu scontra una forti risistenza à i Porti persichi, ma parveni finalmenti à Persepoli. A cità hè abbuttata è incindiata, un attu simbolicu ma contruversu. Intantu, Dariu hè assassinatu da i so probbii generali, Bessos, chì si pruclama rè ma hè prestu sfidatu da Lisandru.