L'annu novu
L'annu novu hè una puesia di Petru Lucciana. Hè stata publicata in L'Annu Corsu in u 1923.
L'annu novu
mudificà- Annu novu, eo ti salutu!
- Hai di fiori una curona;
- Di speranze è sogni splende
- Tutta quanta a to persona;
- Ma chì hà esperienza
- Ùn si fida à l’apparenza.
- N’aghju vistu vene assai
- Di i fratelli toi maggiori,
- Carche e mane di prumesse;
- Eppo, invece di favori,
- Calci è pugni m’hanu datu,
- Cum'è un polpu m’hanu pistatu!
- Tante cose ùn ti dummandu
- Cunsigliere municipale,
- Marghigliè, nè crucifissu
- Ùn vogliu esse, nè u ghjurnale
- Di u mio nulla empie ùn mi piace.
- Bramu solu salute è pace.
- Quandu giovanu eru anch’eo,
- È ùn sputava ancu i mio denti,
- Cridia u mondu una carriera
- Duve a palma hè di i valenti.
- Cambiatu emu o eo od ellu,
- Ch'è mi pare avà un burdellu.
- Omi è donne in cunfusione,
- Cum'è mascare, daretu
- À pastizzi è bichjerini
- Ghjornu è notte corre vedu;
- Ed ùn guardanu, e carogne,
- S’elli scoprenu e vergogne.
- Ma leghjendu i libri antichi,
- Sti lamenti pur ci trovu;
- Sicchè in fondu di u mio core
- Dulurosi dubii eo provu.
- Serà vera chì u mondu tuttu
- Statu hè sempre cusi bruttu ?
- Oh, sia pur cumm’ella sia!
- S'è ci hè u goffu, ci hè ancu u bellu,
- È di questu eo mi cuntentu,
- À chì u vole lascendu quellu;
- È ripete quì mi piace
- Dà mi tù salute è pace !