L'Arrestu di Cristu

L' Arrestu di Cristu hè un dipintu di Caravaggio pintu in u 1602 è cunsirvatu à a Gallaria naziunali d'Irlanda à Dublinu. Ripprisenta un episodiu di u Novu Tistamentu in u corsu di u quali Ghjuda veni à u riscontru di Ghjesù è l'abbraccia cù u fini di disignà lu à i suldati chì venini par arristà lu. Setti parsunaghji sò ripprisintati à mezu corpu, in senu à una cumpusizioni assà densa chì ghjoca annantu à i sprissioni, i muvimenti è i ghjochi d'ombra è di luci. Frà 'ssi parsunaghji apparisci un omu purtadori di una lanterna : s'agisci verusimilamenti di un auturitrattu di u pittori lumbardu.

L'Arrestu di Cristu

U dipintu, à l'iniziu criatu dopu à una cummanda di Ciriaco Mattei, ferma a prubità di a famiglia Mattei sin'à u XIXu seculu. À pocu à pocu, a so traccia hè persa mentri chì a so attribuzioni hè rimissa in quistioni : hè tandu idantificatu com'è una copia di a mani di u pittori fiammingu Gerrit van Honthorst. U dipintu hè finalmenti affidatu à u principiu di l'anni 1930 à un cunventu di ghjesuiti in a cità di Dublinu è ùn hè ch'è à u principiu di u 1990 ch'eddu hè ritruvatu è turratu à attribuiscia à Caravaggio dopu risturazioni.

Esistini numarosi copii di 'ssu dipintu, frà i quali dui pruvucheghjani particularamenti l'intaressu di i storichi di l'arti : una hè cunsirvata à Odessa è l'altru apparteni à una cullizzioni privata rumana. S'è a virsioni d'Odessa hè generalamenti rispinta di u catalogu di l'opari di Caravage, quidda di Roma hè vivamenti cuntistata dapoi 2004, è pudaria ancu pratenda à u statutu d'opara autografa, à listessu titulu ch'è a tela di Dublinu.

Cuntestu

Asdrubale Mattei, unu di i trè frateddi Mattei ind'è quali Caravaggio si stalla in u 1601 è chì diventani prutittori è cumandatarii avisati.
(Ritrattu anonimu, seculu XVII, museiu Condé di Chantilly)

À u principiu di u XVIIu seculu, a carriera di Caravaggio hè ormai probbiu bè lanciata, com'è ni attestani i cummandi maghjori chì li sò affidati par dicurà a cappedda Contarelli o ancu a cappedda Cerasi. Ma in u 1601, l'artistu chetta a risidenza di u cardinali Del Codda - chì hà tantu fattu par accumpagnà 'ssu successu - par cullucà si in u nuveddu Palazzo Mattei induv'edddu stà u cardinali Girolamo Mattei è ancu i so frateddi, Asdrubale è Ciriaco. Ùn ci passa ch'è dui anni, ma 'ssu cambiamentu di locu è di prutittori marca un'evuluzioni in a so manera di pinghja : i sceni di genaru à i temi musicali è mitulogichi cari à Del Monta sò tralasciati à prò di a narrazioni riligiosa. Di sicuru influinzatu da u seriu è a sulennità vulsuti par i grandi cummandi publichi ch' eddu hà onurati, Caravaggio tendi à mudificà l'atmusfera di i so dipinti à distinazioni di cullizzioni privati, in un sensu à tempu più munumintali è più puru. In l'Arrestu di Cristu com'è in l'Incridulità di san Tumasgiu, chì hè pintu à pocu pressu à listessu tempu è par listessu cumandatariu, a narrazioni si ghjoca par u più annantu à i sprissioni facciali è i cenni di i parsunaghji, moltu più ch'è annantu à i custumi o annantu à i dicori chì spariscini in tuttu. Eppuri, hè dinò pussibuli di cunsidarà 'ssa tela com'è insiriscendu si in a sterpa di i furmati maiò criati par dicurà i cappeddi Contarelli è Cerasi : a storica di l'arti Francesca Cappelletti ci vedi in particulari una " stessa dinsità di l'ombri, [una] stessa maestria di l'intensità drammatica ".

Cummanda

À u XVIIu seculu, u storicu è criticu d'arti talianu Ghjuvanni Petru Bellori, frà i primissimi biugrafi di Caravaggio, disigna u marchesi Asdrubale Mattei, unu di i " signori rumani [attratti da] l'incantu di u so pinneddu ", com'è cumandatariu di l'opara. Ancu s'è, à u XXu seculu, l'autori menu spicializati cuntinueghjani ad attribuiscia li a rispunsabilità di a cummanda, i spicialisti cuntimpuranei s'accordani piuttostu à idantificà Ciriaco Mattei (frateddu d'Asdrubale è ancu di u cardinali Girolamo Mattei) com'è cumandatariu. Avaria passatu 'ssa cummanda vicinu à Caravaggio in u 1602.

In rialità, è qualvoglia fussi u nomu di u cumandatariu finali, Caravaggio elabureghja verusimilamenti l'Arrestu di Cristu sottu à l'influenza cunghjunta di i trè frateddi Mattei : quiddi sò difatti assà prossimi è tutti trè dinò intarissati da l'arti. Cusì, a storica di l'arti Catalina Puglisi stima chì a prisenza di Ghjuvanni chì si ni gughji versu a manca di u dipintu (un elementu narrativu chì ùn hè micca evanghjelicu ma duvutu à i scritti ultiriori di u papa Grigoriu Magnu) pudaria essa stata sughjirita da Girolamo, l'omu di ghjesgia. Listessu Girolamo avaria dinò pussutu insista annantu à l'attitudina d'umiltà è di abnigazioni di Cristu.

In tuttu, Ciriaco pussedi trè teli di l'artistu lumbardu, tutti discritti è ammirati da i so cuntimpuranei : a Cena à Emmaus oghji à Londra, u San Ghjuvan Battisti di u Capitolu è l'Arrestu di Cristu ch'è Bellori discrivi incù pricisioni. U rigulamentu di 'ssa cummanda succedi u 2 di ghjinnaghju 1603, data à a quali Caravaggio ricevi a somma di 125 scudi.

Discrizzioni è analisa

Dittagliu: l'omu à a lanterna hè verusimilamenti un auturitrattu di Caravaggio.

U dipintu discrivi l'arrestu di Ghjesù in l'ortu di l'Alivi, à u mumentu induva Ghjuda abbraccia à Ghjesù cù u fini di disignà lu à i suldati vinuti à arristà lu. 'Ssa scena hè discritta di modu simili in i quattru Vangelii.

I suldati in armatura (trè sò visibuli, chì un hè guasgi intiriamenti piattu daretu l'omu à a lanterna) intoppani à Cristu à u mumentu induva Ghjuda avvicina i so labbri par dipona u basgiu di u tradimentu, in un muvimentu versu a manca dinò accintuatu da a fughjita di un parsunaghju daretu à Cristu. 'Ssu parsunaghju, chì esci à mità da u quatru di u dipintu, pari tarrurizatu è abbanduneghja in a so fughjita a cudagliula di un manteddu o una cappa ch'eddu riteni un suldatu : s'agisci verusimilamenti di unu di l'apostuli, podarsi san Ghjuvanni o ancu san Marcu. U vanghjeliu siont'è Marcu evucheghja difatti " un ghjuvanottu " chì si ni fuighji in seguitu à l'arrestu lascendu una stoffa in manu à quiddi chì u voni chjappà. L'idantificazioni à san Ghjuvanni pari in ogni casu abbastanza naturali à u XVIIu seculu apposta ch'eddu hè cusì ch'è Bellori u disigna in u 1672, chì nota d'altrondi a finezza d'esecuzioni di u dipintu evuchendu l'imitazioni di a rughjina annantu à l'armatura à u prima pianu. A difficultà à discerna i tratti di u visu di i suldati, sicondu u criticu d'arti Michael Fried, rinvia à u carattaru imparsunali o ancu inumanu di i so azzioni.

Un settimu è ultimu parsunaghju inchjarisci una parti di a scena à dritta, tinendu in altu una lanterna di carta. Hè prubabili ch' eddu si tratta quà di un auturitrattu di Caravaggio, com'è Roberto Longhi fù u prima à rimarcà la. Mina Gregori stima chì 'ssu dipintu offri " una di i ripprisintazioni i più tragichi di l'artistu ". U prufissori Eberhard König indicheghja chì Caravaggio " timatizeghja " cusì u travagliu di u pittori chì risedi in l'ussirvazioni. Bench'è ùn fussi micca a sola uccasioni uferta à Caravaggio di ripprisintà si eddu stessu, hè inveci a sola volta induva l'artistu è Cristu figurani insemu in un stessu dipintu : Michael Fried ci vedi ancu eddu un risultatu altamenti drammaticu, è " cunflittuali beddu aldilà di l'urdinariu ".

Hè a sola volta in a so opara chì Caravaggio ripprisenta una lanterna. A scena biblica ùn hè eppuri micca discritta com'è duvendu tena si nicissariamenti di notti (à l'eccezzioni nutevuli di u vanghjeliu di Ghjuvanni, chì indicheghja chì i suldati chì arrestani à Ghjesù sò attrazzati di lanterni è di fiacculi) : u circadori John Varriano sughjirisci chì a parsona pò intarprità 'ssa scelta di Caravaggio par a so vulintà di tandu di truvà par u so atteddu una surghjenti di luci custanti è cuntrullevuli. In ogni casu, a lanterna ùn ghjoca paradussalamenti nisciun rollu di inchjarimentu in u dipintu, chì pari piuttostu alluminatu da una luna esterna à a scena è chì offri diffarenti punti di fucalisazioni annantu à i visi, l'armaturi o i mani. Ma u chjarori di a luna ùn basta micca à spiigà ciò chì allumineghja i visi di Cristu, di Ghjuda è di u discepulu. U fondu hè neru, o guasgi : rami è casci d'alivu si sceglini in daretu, ciò chì currispondi à u locu indicatu da i testi evangelichi. U criticu d'arti Andrew Graham-Dixon parcipisci un sensu à 'ssa lanterna chì ùn inchjarisci nudda : di manera simbolica, u pittori arreca quì un inchjarimentu chì hè simbolicu è micca litterali, chì hè a so imaginazioni chì custituisci a sputica fonti di luci. D'altri com'è Mauriziu Marini vedini quà una ripprisintazioni di u filosofu Diogene, ciò chì ni faria tandu una metafura di l'Omu in cerca di Diu. In tutti i casi, annantu à u pianu cromaticu, l'Arrestu ripiglia u principu dighjà in piazza in i dipinti di a cappedda Contarelli ma di manera più radicali dinò : Michael Fried indicheghja chì 'ssu cuntrastu estremu trà l'ombra è a luci accresci l'effettu di prisenza di i figuri.

Caravaggio scegli una cumpusizioni ristrinta annantu à i parsunaghji, accintuendu cusì l'effettu drammaticu di a scena. Frà i so pridicissori in u trattamentu di 'ssu tema, solu Lodovico Carracci avia à 'ssu puntu cuncintratu a scena. Caravage eppuri evita ogni imprissioni d'ingombru o di ciambugliu incalchendu annantu à a luci annantu à i parsunaghji di u centru è rispinghjendu in i tenebri tutta l'azzioni periferica. Graham-Dixon indicheghja ch' eddu riduci cusì tuttu l'episodiu à un cunflittu elementari trà u bè è u mali. U cuntrastu trà u voltu pallidu, diddicatu di u Cristu è quiddu di Ghjuda - bruttali, cunciatu da u Soli - ni custituisci un'illustrazioni. Ma 'ssa oppusizioni hè contraditta da l'elementi chì à l'incuntrariu cullegani, assucieghjani i parsunaghji trà eddi.

Eppuri ssa scelta di cumpusizioni ùn hè micca senza certi dibulezzi. Par Claudio Strinati par indittu, Caravaggio si situeghja à un periodu impurtanti di a so carriera, è eddu ùn parveni più à aghjunghja " a linia unitaria " chì caratterizeghja sin'à tandu a so opara rumana : i parsunaghji sò assà travagliati par sè, ma a so assuciazioni hè " à spessu astratta è poca naturali ".

Diffarenti virsioni

Virsioni d'Odessa

Un'antra virsioni di l'Arrestu, in tempi di una volta cunsidarata com'è autografa, hè cunsirvata à Odessa (museiu d'arti uccidentali è uriintali).

Un'antra virsioni di l'Arrestu, in tempi di una volta cunsidarata com'è autugrafa, hè cunsirvata à Odessa (Museiu d'arti uccidentali è uriintali). Una copia anziana di 'ssu dipintu, chì a so attribuzioni à Caravaggio hè ricusata da a maiò parti di i sperti di u pittori, hè cunsirvata à u museiu d'arti d'Odessa in Ucraina. 'Ssu dipintu hè arrubatu à a fini di lugliu, ciò chì pruvucheghja un rimusciu cunsidarevuli in u mezu di l'arti ucrainu, induva eddu hè cunsidaratu com'è un'opara d'assà altu valori. A pulizza ucraina u ritrova eppuri in Alimagna in u 2010. U museiu d'Odessa manteni, annantu à u so situ Internet, l'attribuzioni di u dipintu à Caravaggio. Parechji autori nutevuli com'è Marini pudariani accittà di cunsidarà à u più una forma di cullaburazioni trà artisti, in a quali Caravaggio avaria pussutu pinghja i figuri cintrali è affidà u restu à Prospero Orsi.

Virsioni " Sannini " di Roma

U primatu di u dipintu di Dublinu hè dinò cuntistata in 2004 da una storica di l'arti taliana, Maria Letizia Paoletti, chì stima chì una virsioni cunsirvata à Roma custituisciaria l'uriginali di Caravaggio mentri chì a virsioni di Dublinu ùn saria ch'è una copia fiamminga. U dipintu di Roma, isciutu di a cullizzioni fiurintina di l'avvucatu Ladis Sannini, apparteni ormai à un antiquariu. Roberto Longhi u rimarca da 1943 è u cunsidareghja com'è una copia di dopu à Caravaggio, ma di qualità abbastanza bona par fà lu appiccà in l'espusizioni maiò annantu à Caravaggio ch'eddu urganizeghja in Milanu in u 1951. Una di i so particularità hè ch' eddu hè più maiò ch'è a virsioni di Dublinu (o ch'è quidda d'Odessa), è ch'eddu offri una cumpusizioni più aparta : cusì, u bracciu di l'apostulu chì si ni fughji à manca ùn hè più tagliatu sopra à l'ovitu ma sopra à u polsu. I presi di pusizioni di u spertu Denis Mahon in 2004 dani à l'iniziu un certu pesu à 'ss'iputesa, ma cumplicheghjani à listessu tempu a situazioni apposta ch'eddu si dici certu chì i dui dipinti sò dinò autugrafi. Ma a pusizioni di Mahon ùn hè guasgi più suvitata dopu. L'analisi scentifichi apprunfunditi cundutti dopu à a dumanda di a ghjustizia taliana da un spertu indipindenti tendini dinò à eliminà a virsioni rumana di u corpus di Caravaggio - in particulari par via di a prisenza di giaddu antimoniu in a pittura, ciò chì hè pocu prubabili à l'ebbica di u pittori. In una frasa, u storicu di l'arti Sebastian Schütze sintetizeghja a situazioni in u so catalogu rieditatu in u 2015 : " 'Ssu dipintu hè oghji abburdatu da uni pochi di spicialisti com'è una virsioni podarsi autugrafa ". Fabio Scaletti righjunghji 'ss'analisa muscendu chì nisciun elementu dicisivu ùn parmetti d'eliminà u dipintu " exi-Sannini " di u catalogu di Caravaggio nè di dicida in u so favori, ma ch' " eddu cunveni d'aspittà chì a Storia (o a ghjustizia) suviti u so corsu ".

Parcorsu di u dipintu

Prubitarii successivi

À parta da a fini di u XVIIIu seculu, u dipintu hè attribuitu à u pittori fiammingu Gerrit van Honthorst. U parcorsu di u dipintu di Dublinu hà pussutu essa ricustituitu incù una pricisioni abbastanza bona, in particulari grazia à i scuparti di Francesca Cappelletti è Laura Tistò in l'archivii Antici-Mattei. U figliolu di Ciriaco Mattei ni ridita po' l'eredità si succedini in senu à a famiglia Mattei à u filu di i XVIIu è XVIIIu seculi ; eppuri, un invintariu di 1793 u faci appariscia incù un'attribuzioni à u Fiammingu Gerrit van Honthorst. Hè stabilitu chì in u 1802, u parlamintari è cullizziunistu d'arti scuzzesu William Hamilton Nisbet u ritrova in Italia è u compra, pinsendu dunqua ch'eddu si tratta di una copia di Caravaggio da a mani di van Honthorst. L'opara passa in vendita publica vicinu à un seculu più tardi, in u mentri di a dispersioni di a cullizzioni Hamilton Nisbet : Maria Lea-Wilson, medicu pediatra irlandesa di rinomina, ni faci l'acquisizioni in 1921 par una somma scunnisciuta - è pinsendu sempri cumprà una copia firmata di van Honthorst. Po' u Duttori Lea-Wilson l'offri à u principiu di u 1930 à un ghjesuitu, u frateddu Tumasgiu Finlay, chì avia ghjucatu par edda un rollu di cunfissori è di sustegnu psiculogicu quandu edda s'era truvata veduva ; dopu tandu, u dipintu adorna un muru di a stanza da manghjà di i Ghjesuiti à Dublinu, in carrughju di Lower Leeson Street. Hè infini in u 1990 chì i riligiosi, pinsendu à una risturazioni di l'opara, sulliciteghjani i sirvizii di Sergio Benedetti chì travaglia à a gallaria naziunali d'Irlanda.

Riscuparta è riattribuzioni

Benedetti, risturadore d'arti furmatu à Roma è ghjuntu da Italia 13 anni innanzi par travaglià in a gallaria di Dublinu, suspetta tandu po' cunferma incù pacienza l'idantità di l'autori sputicu di u dipintu. L'iputesi di l'attribuzioni à Caravaggio hè tenuta assulutamenti sicreta sopra à dicisioni di Raymond Keaveney, dirittori di u museiu di Dublinu, tantu eddu hè cuscenti ch'è quissa pudaria crià un cumbugliu cunsidarevuli in u mondu di l'arti : ancu i Ghjesuiti, eppuri prubitarii di u dipintu, sò lasciati vuluntariamenti in l'ignuranza di i suspetti di Keaveney è Benedetti.

Articuli cunnessi

• Lista di dipinti di Caravaggio
• Arrestu di Ghjesù