Guerra di 40 anni

A Guerra di 40 anni hè una spressione chì indetta u periudu di e rivolte chì anu principiatu in Corsica in u 1729, chì anu sbucciatu nant'à u guvernu di Paoli (1755-1769) è chì sì sò compie cun a cunquista di a Francia è a battaglia di Pontenovu in u 1769.

Pittura di Zampaglinu

Principiu di a guerra di 40 anni

A prima insurrezzione principia in Boziu, in un paese di Bustanicu. Una lita schjatta trà i paisani è i suldati corsi à u serviziu di Ghjenuva chì racultavanu l'impositi. A Republica di Ghjenuva vene di creà un impositu novu, chjamatu "di i dui seìni", ciò chì scuntenta assai e pupulazione, chì sò povere è chì anu difficultà dop'à e racolte chì sò state assai pessime.

In furia, a rivolta tocca i paesi è e pieve à l'ingiru di u Boziu : u Vallerustie, l'Alisgiani, l'Orezza, è dopu a Tavagna. I rivultatu piglianu d'assaltu e terre è i duminii ghjenuvesi in piaghja.

Di ferraghju 1730, sò 5000 paisani chì decidenu d'assaltà à Bastia. Per elli, hè u simbulu di u putere ghjenuvese ma dinù u simbulu di u putere ecunomicu. Allora chì l'abitanti di Terranova si chjodenu daretu à e muraglie di a citatella, i paisani attaccanu, piglianu, brusgianu u quartieru di Terravehja : e case di u carrughju di u Castagnu, di E Terrazze sò assaltati.

A canzona A Palatina (o "A Pasqualina") parla di sta rivolta.

I Ghjenuvesi devenu dumandà l'aiutu di i so amichi, l'austriachi, per calmà a rivolta. in u 1731 e truppe austriache scalanu in Bastia, sott'à l'ordine di Wachtendonck è dopu Wurtenberg chì stava in Bastia in u Palazzu Caraffa.

A prima rivolta hè calmata ma d'altre veneranu più tardi.