Give Peace a Chance

Give Peace a Chance hè una canzona antiguerra scritta da John Lennon (à nome di Lennon-McCartney), è interpritata incù Yoko Ono à Montréal, Québec, Canada. Esciutu in single di lugliu 1969 da u Plastic Ono Band annantu à Apple Records (catalogu Apple 13 in u Regnu Unitu, Apple 1809 in i Stati Uniti), hè u prima single da solu di Lennon, esciutu quand'ellu era sempre membru di i Beatles, è chì hè diventatu un innu di u muvimentu antiguerra americanu in l'anni 1970. Hà aghjuntu a 14a piazza di a classifica di u Billboard Hot 100 è a 2a piazza di a classifica di i single britannichi.

Redazzione è rigistrazione

Rigistrazione di "Give Peace a Chance" à l'albergu Rigina Elizabeth, Montréal, u 1ima ghjugnu 1969. Da manca à dritta : Rosemary Leary (visu micca visibile), Tommy Smothers (di spinu à a videucamera), John Lennon, Timothy Leary, Yoko Ono, Judy Marcioni è Paul Williams

A canzona hè stata scritta mentre a luna di mele "Bed-In" di Lennon è Ono à Montréal. Quandu un ghjurnalistu li hà chertu ciò ch'ellu pruvava à cumpiisce rimanendu in lettu, Lennon hà rispostu di modu spuntaneu "Date una scianza à a pace". L'hà ripetutu parechje volte mentre u Bed-In. Lennon hà dumandatu à u so agente di stampa, Derek Taylor, di truvà un ingenieru di u sone. U 1ima ghjugnu di u 1969, in camera 1742 di l'albergu Rigina Elizabeth à Montréal, Andria Perry, pruprietariu di un studio di rigistrazione lucale à Montréal, ghjunse è imprudò una simplicia installazione di quattru microfoni è un magnetofonu à quattru piste ch'è ellu avia purtati incù ellu.

Dicine di ghjurnalisti è parechje celebrità anu assistutu à a seanza di rigistrazione, frà i quali Timothy Leary, u rabbinu Abraham Feinberg, Joseph Schwartz, Rosemary Woodruff Leary, Petula Clark, Dick Gregory, Allen Ginsberg, Roger Scott, Murray the K è Derek Taylor. Parechji sò minziunati in e parole. Lennon sona di chitarra acustica è hè raghjuntu da Tommy Smothers di i Smothers Brothers, dinù à a chitarra acustica.

Crediti di scrittura di canzone

John Lennon di ghjugnu 1969 à Montréal, à u mumentu di a rigistrazione di Give Peace a Chance.

À u mumentu di a so esciuta iniziale in u 1969, a canzona hè stata accreditata à Lennon-McCartney.

Annantu à l'esciute ultiriore organizate da u Lennon Estate, solu Lennon hè accreditatu, vene à dì a riedizione di l'album Live in New York City in u 90, u documentariu The U.S. Vs. John Lennon in u 2006 è l'album compilazione Lennon Legend in u 1997 : The Very Best of John Lennon è a so virsione DVD sei anni dopu.

John Lennon hà sprimatu i so rigreti di esse statu "abbastanza culpevule per dà à McCartney u creditu di cuautore di u mo prima single indipindente invece di dà lu à Yoko, chì l'avia difatti scrittu incù mè ".

Sient'è l'autore Ian MacDonald, u meritu ne rivene à Lennon, chì hà ringraziatu à McCartney di avè lu aiutatu à rigistrà "The Ballad of John and Yoko" in un periudu assai cortu.

Parole

L'ultima strufetta originale di a canzona ci face riferimentu : "John è Yoko, Timmy Leary, Rosemary, Tommy Smothers, Bobby Dylan, Tommy Cooper, Derek Taylor, Norman Mailer, Allen Ginsberg è Hare Krishna". À u mumentu di l'interpritazione di Give Peace a Chance figurendu annantu à l'album Live Peace in Toronto 1969, Lennon hà dichjaratu apertamente ch'è ellu ùn s'invenia micca di tutte e parole è hà impruvisatu incù i nomi di i membri di u gruppu chì spartianu a scena incù ellu è tuttu ciò chì li venia à mente : "John è Yoko, Eric Clapton, Klaus Voormann, Penny Lane, Roosevelt, Nixon, Tommy Jones è Tommy Cooper, è qualchissia d'altru". A terza strofa cuntene un riferimentu à a masturbazione, ma Lennon hà cambiatu quessa in "masticatura" annantu à u fogliu di parole officiale. Hà ammessu dopu ch'ellu si trattava di una "schisata", ma hà vulsutu evità ogni contruversia inutule.

Uscita è risultatu

"Give Peace a Chance", sustenutu da "Remember Love" d'Ono in faccia B, hè esciutu u 4 di lugliu 1969 in u Regnu Unitu, è uni pochi di ghjorni più tardi, u 7 di lugliu 1969 in i Stati Uniti, a canzona hà aghjuntu u numeru 2 di a classifica di i singles in u Regnu Unitu, è u numeru 14 di u Billboard Hot 100 in i Stati Uniti.

'Ssa canzona hè prestu diventata l'innu di i muvimenti antiguerra è contrucultura vietnamesi è hè statu cantata da un mezu milione di manifestanti à Washington u 15 di nuvembre di u 1969, u ghjornu di u moratoriu annantu à u Vietnamu, sottu à a direzzione di Pete Seeger, chì hà intercalatu e frase cum'è "Are you listening, Nixon ?" è "Are you listening, Agnew ?" trà i cori di i manifestanti chì cantavanu "Tuttu ciò ch'è noi dimu... Hè di dà una furtuna à a pace".