Ghjinnaghju (Dumenicantone Versini)

Ghjinnaghju hè una puesia scritta da Dumenicantone Versini (1872-1950) di Marignana, dettu Maistrale. 'Ssa puesia fù publicata in a Muvra (1923).

Ghjinnaghju

Ghjinnaghiu, di li mesi, marchja in testa,

Cù lu so mantillone è capi biancu;

Dà tantu li malanni, ùn guarda mancu

S'ell'hè d'acqua o di ventu la timpesta.

Sumena, dunde passa, tramuntane

È imbianca le muntagne d'ogni locu,

In ogni ziglia face incippà focu

È cresce fiumicelli è le funtane.

Pela l'ultima foglia à la virdura

È face ch'ogni cosa s'adrumenti

È canta, cù li toni, li lamenti

À u ragnu, à la sumente è la pascura.

Pardunatu ellu sia pà lu dannu

Ch'ellu suvente face à l'agnillucci.

O quantu gioia porta à i zitillucci

Cù quella pistulella in capu d'annu !