Festa di Noantri
A Festa di Noantri ("di noi altri", à pettu à "voi altri chì campate in altri quartieri"), hè cilibrata in onore di a Madonna di u Carmine, in occasione di a so festa liturgica, da u 16 à u 30 di lugliu in u quartiere di u Trastevere à Roma.[1] Hè di sicuru una di e feste e più calurose di u populu rumanu.
Origine è cilibrazione mudificà
L'origine di a festa ricollanu à u 1535 : omu conta ch'è dopu à una timpesta, una statua di a Madonna, sculpita in u legnu di cedru, hè stata truvata à l'imbuccatura di u Tiberu da i piscadori corsi. A Madonna, chjamata per 'ssa raghjone "Madonna Fiumarola", hè dopu statu data à i Carmini (à i quali si deve u titulu di "Madonna di u Carmine") di a basilica di San Crisogonu à Trastevere (Piazza Sonnino). Hè cusì diventata a santa patrona di l'abitanti di Trastevere.
À quelli tempi, u Trastevere hè empiutu d'animazione, d'avenimenti musicali è teatrali, è e taverne in piena aria s'empienu di ghjente è di turisti. Ma a festa populare ùn hè micca cusì anziana ch'è a festa liturgica. Difatti, ricolla à l'anni 1920, promossa da u fascismu cù l'intinzione di fà recampà e feste è tradizione pupulare in Italia.
A statua si trova avale oghje in chjesa Sant'Agata di Trastevere, annantu à a piazza situata à mezu à a Via della Lungaretta (Piazza San Giovanni di Matha). Da quà, ogni annu, u sabatu dopu à u 16 di lugliu (festa liturgica di a Madonna di u Carmine), una statua di legnu policromu di u XIXu seculu, riprisintendu a Madonna di u Carmine, hè purtata in prucissione à traversu i carrughji di u quartiere sinu à a Basilica di San Crisogonu, induve, dopu à una corta arretta, volta in chjesa Sant'Agata. Ci ferma in modu sulennu esposta mentre una simana, insin'à ciò ch'è, a dumenica dopu, aghji locu a tradiziunale prucissione longu à u Tiberu. Difatti, a statua, chjinata annantu à un battellu, attraversa u fiume sinu à u ponte Garibaldi, in ramentu di a so scuperta à l'imbuccatura di u Tiberu. Da quà, colla dopu in chjesa di Santa Maria in Trastevere, induv'ella ferma sinu à u lindumane matina, data di a fine di e festività. À u filu di u tempu, a festa hè stata trasfurmata per risponde à e dumande di i turisti, pirdendu cusì u so caratteru populare, ma cunsirvendu u so forte sintimentu riligiosu.
Note mudificà
- ↑ 'Ss'articulu pruvene in parte da l'articulu currispundente di a wikipedia in talianu.
Bibliugrafia mudificà
- Sergio Gaspari, La Madonna di Noantri e La Festa del Carmine, in : A Domenica, 11 di lugliu 2010, Edizioni Periodici San Paolo (in talianu).
- Alfredo Cattabiani, Lunario, 1994, Mondadori, Milanu (in talianu).