Farrandu Ettori

Farrandu Ettori hè statu un storicu di a Corsica, littaratu è linguistu, natu in Bastia l'8 marzu 1919 è mortu in Turri di Portivechju u 1a ghjugnu 2001. Prufissori emeritu di l'Università di Pruvenza Aix-Marseille I, prufissori di Lettari di u liceiu di Bastia, dirittori di a rivista Studii corsi, spicialistu di Pasquali Paoli è di a lingua corsa, fù in u sittanta unu di i primi è principali inspiradori di a rifundazioni di l'Università di Corsica.

Quenza, u paesi nativu di Farrandu Ettori

Biugrafia

Isciutu d'un'anziana famidda urighjinaria di Quenza, Farrandu Ettori feci i so studii sicundarii à u liceiu di Bastia, dundi u so babbu era prufissori, eppo à u Liceiu Louis-le-Grand di Parighji. Dopu à a Siconda Guerra mundiali è l'uttinimentu di a so aggrigazioni, insignò à u so turnu à u liceiu di Bastia è feci parti di quiddi chì ani cuntribuitu à a rinascita di a Sucità di i Scenzi Storichi è Naturali di a Corsica fundata da u canonicu Letteron. Publicò in l'annati 1950 monda travaddi in a rivista di a sucità.

Numinatu prufissori à l'università di Pruvenza in u 1965, presi dui anni dopu a succissioni di Paulu Arrighi à a dirizzioni di u Centru di studii corsi eppo a dirizzioni di a rivista Studii corsi, ch'iddu cunsirvò duranti una dicina d'annati.

Da u 1973 à u 1976, fù iddu à priseda l'università d'istati di Corti è participò dirittamenti à a rinascita di l'università, chì ùn era ancora ch'è à u statu di prugettu.

In u sittanta, militò dinò attivamenti par a difesa è u ricunniscimentu di a lingua corsa, è in particulari à u fini ch'è a leghji annantu à l'insignamentu di i lingui rigiunali fussi applicata à a Corsica. In 'ssu duminiu publicò in particulari unu travaddu annantu à L'insignamentu di a lingua corsa (1975) è parichji articuli annantu à u studiu di u vòciaru è di a canzona pupulari, eppo in u 1985 una Antulugia di i sprissioni corsi.

Frà i cuntributi è ricerchi arricati da Farrandu Ettori, quiddi purtendu annantu à a cunniscenza di a Corsica à u Seculu di i Luci è Pasquali Paoli sò di i più nutevuli, frà i quali a so dutturizia publicata in u 1976 annantu à a custituzioni ridatta da Jean-Jacques Rousseau o i so cuntributi à u Mimuriali di i Corsi. Li si devi inoltri acquisti maghjori in u studiu è a cunniscenza di l'idantità, di a cultura è di a sucità tradiziunali isulani, è una riflissioni erudita annantu à a Nazioni corsa è a lighjittimità di u Statu francesu in l'isula.

A so ultima opara, A Casa di a Rocca, narrendu a storia d'una ceppa signuriali à u Medievu è uffrindu par via di quissa una visioni pulitica di a Corsica medievali è una riflissioni annantu à i fundamenti di l'idantità isulana, ricivì u Premiu di u Libru corsu in u 1999.

Opari

Jean-Jacques Rousseau, autori di u Prugettu di Custituzioni par a Corsica, chì fù u tema di a dutturizia di Farrandu Ettori

• Pasquali Paoli mudeddu di u ghjovana Bonaparte, in Annali storichi di a Rivuluzioni francesa, 203 (marzu 1971), p. 45-55.
• A furmazioni intillettuali di Pasquali Paoli (1725-1755), in Annali storichi di a Rivuluzioni francesa, 218 (uttrovi-dicembri 1974), p. 483-507.
• L'insignamentu di a lingua corsa", in Lingua francesa, frivaghju 1975, p. 104-111.
• Jean-Jacques Rousseau lighjislatori di i Corsi, dutturizia, 1976.
• Antulugia di i sprissioni corsi, edizioni Ribbi, Marseglia, 1984.
• Pasquali Paoli, illustratu da Eric Peyrol, edizioni Arti è culori, Monacu, 1990.
• Da i nomi di battezimu à i nomi di famiddi : antrupunimia è sucità in a cumunità di Quenza à i seculi XVII è XVIII, in Studii corsi, numaru 33, 1989.
• A Casa d'A Rocca, una ceppa signuriali in Corsica à u Medievu, ed. Alain Piazzola, Aiacciu, 1998.
• À l'urighjini di u Statu francesu in Corsica, in L'avvena instituziunali di a Corsica : Atti di u culloquiu tinutu u 21 frivaghju 2000 à a casa di u Barreau di Parighji, ed. La Marge, 2000, p. 59-72.
• Farrandu Ettori, Avali, numaru 12 spiciali (cunteni u test intitulatu Populu, naziunalità è nazioni: par una rivalutazioni di a Storia di Corsica, traduttu di u corsu da Paulu Dalmas-Alfonsi), Nucariu : Cismonte è Pumonti edizione, 2006.

Bibliugrafia

• Farrandu Ettori à u sirviziu di u rinnovu culturali, in Umaghji à Farrandu Ettori, vulumu 1, Studii corsi, numari 18-19.
• Necrulugia: Farrandu Ettori (1919-2001), da F. Beretti, in Bullitinu di a Sucità di i scenzi storichi è naturali di a Corsica, numari 698 à 701, 2002, p.|369-375.
• Una vita à u sirviziu di a Corsica: Umaghju à u Prufissori Farrandu Ettori, da Lina Filippi, in U Currieri di u Chjerchju Vincenzu di Moro-Giafferri, numaru 8, luddu 2001.
• Corse-Matin di a dumenica 3 ghjugnu 2001, necrulugia, da D. Landron, p.5.

Da veda dinò

• Quenza