E galline di Zia Mega

E galline di zia Mega hè una opara di teatru creata da Antone Bonifacio. Hè stata publicatu in L'Annu corsu (1927).

E galline di zia MegaMudificà

Persone : Zia Mega, una vechja di u paese. Mariola, una giuvanotta, so' vicina. (A scena si passa in un paisolu di Capicorsu)

ZIA MEGA (sola, filendu a so' rocca o fendu a calzetta)
O tinta è ammantillata ! Se a me' cresta d'oru è le me' galline inzuccarate ùn sò ancu quì, hè propriu un brutt' affare: aghju paura ch'ùn abbianu avutu a sorte di a doccia d'Agnulella: i ladri assassini a s'hanu chjappa s'etima scorsa cun tutt'i so' piulini... (Suspira) U sole ghjunghje à meza Custera. À mumenti hè notte è nunda vedu. Nunda ! Una cosa cusì strana ùn m'hè mai stalbata : se triganu anc'un po' si pò puru accende i lampioni è cantà u requie meterna...
MARIOLA (affacchendu si à la finestra)
Cos' avete, o zia Mè ? Ratachjate quant'e un campu di lupini. Ùn si sente ch'à voi in tutt' u cuntornu...
ZIA MEGA
Sì, alliscia ti puru, diceva Petr' Antone à Marinciola ch' aspittava u so' namuratu mentr' ellu si n'era fughjtu cù a figliola di Paglietta ; alliscia ti puru ! È cusì dic'eiu, o Mariò : possu puru alliscià mi : ùn vecu junghje nè gallu nè galline...
MARIOLA
Sarà stalbatu anc' à vo' cume à Surnacone di u Purtichju: s'hanu fattu una bella paghjulata di maccaroni tirati sù, cù e so' quattru pullezze, è l'hanu rimandata u gallu ch'era più asciuttu ch'è un stoccafissu!
ZIA MEGA
Vai puru ch' ùn mi rimandaranu micca u meiu. U me' Cristone ! Era grassu è tondu chì pareva un murone. Ch'ellu li sia toscu à tutti o ch'elli crepinu d'indigestione !... (Chjama) Tughe ! tughe le meie ! tughe ! pibine, pibine ? Altru ch'è pibine ! Stavolta mi l'hanu pibate daveru...
MARIOLA
Chì donna, Diu libari ! Si face u segnu di a croce prima di vede u diavule. Pazienza, o zia Mè ! Ùn n'hè ancu for' d'ora, diamine !
ZIA MEGA
Pazienza un cornu, o scimpiatò ! E me' galline care, u me' gallu aduratu ! Ma duve saranu corsi ? Mi facenu perde i lumi, ch'elli sprufondinu ! Senti, me' cinì, corri à vede un po' à li sundari, daretu à la casa di Misginu. Ind'un saltu ci si'. Ah ! s'è ùn'avessi sta gambaccia gonfia, eiu sì...
MARlOLA
Ùn ci vogliu andà ! Un la vi vogliu dà vinta ! Chì donna, cari mei ! Lasciate calà u sole, prima...
ZIA MEGA
Hai paura di sudà è di strughje 'ssa cicciaccia !... Vinarai à dumandà mi l'ove : mancu pe u maranghinu l'unu ùn ne avarai. Ma cosa dicu ? E faraghju eiu avà l'ove ! L'aghju detta ch'aghju da stimmì... (Chjama) Tughe, tughe le meie ! Pibine, Pibine !! O tinta è scura ! O chì serata ! O chì nuttata sarà la meia ! Vergine santissima, fate ch'eiu sia morta à dumatina : cusì tuttu sarà finitu, ancu per me (pianghje) !
MARIOLA
E pianghje 'ssa scema! Què ghjè bella! Si pianghje pe e persone è micca pe e bestie, o zia Mè ! U Signore puderia castigà vi... Allegri, o figlioli ! Mirà chì vene a gallina bianca...
ZIA MEGA
Cumenciu à respirà ! Tuga ! tuga ! Ma eiu ùn vecu galline bianche ! Chì li venga un accidente à elle è à te cun elle, o bugiardò ! Ti ridi ancu di me, chì tù sia ceca...
MARIOLA
Duvevate abizzà le megliu, allora...
ZIA MEGA
Ma sintite 'ssa sfacciata ! Si diciaria ch'ùn li do à manghjàne. Chì tù possa ristà custine sticchita cume e me galline chì vene in paru...
MARIOLA
Ma sintite 'ssa linguaccia cosa ella dice ? Ùn vi siccarà mai...
ZIA MEGA
O e me' pullezze cusì belle ! E me' gioie ! E me spiranze !
MARIOLA
Mirà le chì ghjunghjenu in veru. Avà sarete cuntenta.
ZIA MEGA
Ah ! stavolta e vegu anch' eiu. Sia benedettu u Signore è a Madonna. Ma videmu s'è ci sò tutte : Biancona, chì mi face l'ove tamant' e meloni; Pernicia, chì ne face unu tutti i ghjorni ! Cinnerina, regina di e cioccie ! Avà affacca ancu Silvestrina : l'anima meia chì mi corre appressu cume un catellu è mi salta addossu cume un gattinu. Prestu, o Silvestri ! A videte cum' ella corre : le passa à tutte ! 5, 6, 7, 8, 9 : ci sò tutte. Ma u gallu, 0 Mariò, u vedi u me' gallu ? Eiu vogliu u me' gallu ! E galline pocu m'impremenu : chì e si piglimi puru... Corri, o Mariò, cara ! Saria bellu u me' pullaghju, senza Cristone ! Hè l'onore di u vicinatu, l'amore di tutte e galline di u Granaghjolu !...
MARIOLA
Calmate vi un po', O zia Mè ! À mumenti ùn n'avete più fiatu in canna. Eccu lu ch' affacca, u vostr' impiastru !...
ZIA MEGA
Impiastru u me' gallu ! impiastru tù, o nasu à spegni mocculi ! U me' Cristone un impiastru ! Ch'ella ùn ti fussi mai scappata 'ssa parullaccia ! Ùn la ti perdunaraghju mancu in puntu di morte ! Avà chi u vegu u me' core è sullivatu ! Si' bella cuntenta, a matina, quandu ti sveglia in musica ! Piccatu ! Guarda lu bè, o scimpiataccia... Vinite qui, a me' cresta indurata ! u me' fioccu inargintatu ! Capitanu di e Missagerie ! Conte Baciocchi ! Joffre in persona ! Mariola vi chjama un impiastru : un impiastrona è ella ! A so chì tutti so ghjalosi di u me' gallu e di me' galline... Ma pudete tutti cripà di rabbia ! A me, di fame ùn mi ne more. Ci hè Saccavicchjula ch'ùn ne pò mandà à fine manc' una, è per iscusa dice chì ghjè a bellula chì e si manghja. Sì, a bellula... (Mentre si sfoga cusì, eccu ti una petra scaturita d'un so duve ch'agguanta u gallu chì scappa spavitu). Avà cosa ci hè ? Accidenti ! Pustemma ind'e mane à ch'è statu ! O lu me' gallu ! U mi volenu tumbà. Dev'esse u figliolu di Picozzu ch'hà tiratu 'ssa pancula. Ùn hè a prima volta, 'ssu vituperiu ! 'ssu muccigone 1 Faria megliu u babbu à mandà lu à navigà ! S'è l'acchjappu vai puru chì ne facciu un ghjumitulu. Sì,vogliu andà in galera, una volta. (A Mariola chì ride), Oh ! chì tù sia scura, o Mario ! Hai ancu u curagiu di ride; si' propiu senza core è senza fegatu...
MARIOLA
Ma ùn videte ch'ùn' hà nunda, u vostru Joffre ! Mi pare ancu più ingarlichjitu di prima ! Tinè, avà ghjunghje anc' un' altra gallina. Cum'hè bella !
ZIA MEGA
Oh ! nò. Quessa ùn hè roba meia. Ghjè Magranchjna di a Grinfia chì a face more di fame. Eju, e me' galline, e cunnoscu à centu miglie. (Acchjappa è accarezza u gallu). U me' gallucciu d'oru ! Ringraziu u Signore chì mi l'ha presirvatu... Cume avaria fattu eiu senza voi ? Cosa sarianu divintate tutt'e vostre spose ? Saria statu bellu u paese, senza u vostru cuccurucù chì si sente da a Giraglia !..
MARIOLÀ
O zia Mè ! Mirà chi vene anc' u vostru gattu...
ZIA MEGA
Sì, vene ancu Spahissu ! Tutte le me' spiranze ! Tutti i me' amori ! Ma guardate cum'hè bellu ancu quessu ! Alò, prestu, tutti in casa ch'hè ora di dorme. È un' altra volta, 'ogn'esse più bravi ! Inquantu à u figliolu di Picozzu, se l'agguantu ghjuru ch'ha da pagà mi la !

LigamiMudificà

Da vede dinùMudificà