U Chirghizistanu, in forma longa a Ripublica chirghiza (in chirghizu Кыргызстан), hè un paese d'Asia cintrale.[1] Estremamente muntagnosa, pupulata à l'origine da pupulazione nomade, 'ss'anziana ripublica di l'URSS hà ottenutu a so indipendenza à u mumentu di l'affundamentu di quest'ultima in u 1991. I so abitanti si chjamanu i chirghizi. E duie lingue officiale sò u chirghizu è u russiu. Biškek hè a capitale è a cità a più pupulata di u paese.

Geugrafia mudificà

Fruntiere è territoriu mudificà

U Chirghizistanu pussede 3878 km di fruntiere, scumpartute cusì :

Situazione mudificà

U Chirghizistanu hè un paese d'Asia cintrale, inquatratu da u Cazacchistanu à u nordu, a China à livante è à u sudu, u Tagicchistanu à u mezupunente è l'Uzbecchistanu à punente. Di una superficia di 198.500 km quatrati, u paese hè inchjuvatu in tuttu è ùn pussede micca accessu à u mare.

Tupugrafia mudificà

 
Vista da satellitu di u Chirghizistanu

U paese hè guasi à l'intuttu muntosu. 'Sse zone muntose dividenu u paese in dui, u nordestu è u Mezupunente. 'Sse duie parte ùn cumunicheghjanu ch'è da foce situate à più di 2700 metri d'altitudine. E principale cità di u Chirghizistanu si situeghjanu in e zone e più basse di u paese. À u nordu, a capitale Bichkek si trova à 800 metri d'altitudine, assai vicinu à a fruntiera incù u Cazacchistanu. Hè in 'ssa rigione nordu di u paese ch'elli sò cuncesse parechje base militaresche internaziunale, per u più aerie, à a Russia (cunsirvate dopu chì u Chirghizistanu fubbe diventatu indipindente) è à i Stati Uniti.

 
E montagne Alatau

À u nordestu, u lavu Yssyk Koul forma un picculu mare internu di 6332 km quatrati à 1.620 metri d'altitudine. Prufondu di 702 metri, u lavu hè appena salitu è ùn cotra micca d'inguernu. U so nome, Yssik Koul, significheghja d'altronde in chirghizu lavu caldu, è hè in parte alimentatu da surghjente calde. À u sudestu, a catena di i Tian Shan marca a fruntiera incù a China è culmineghja à 7.439 metri incù u Jengish Chokusu (chì significheghja indipendenza in lingua chirghiza), chì hè u culmine di u paese.

À punente è à u mezupunente di u paese, a valle di Ferghana (cumuna à u Chirghizistanu, à l'Uzbecchistanu è à u Tagicchistanu) hè pigliata in tinaglia da e catene di u Fergana (à u nordestu di a valle) è di u Pamir Alay (o monti Alai, à u sudu). A valle hè in particulare u ricettaculu di a putente vadina Naryn, chì attraversa a tutalità di u paese dapoi l'altezze di i Tian Shan à u nordestu di u paese. U sudu (cuttighjatu da u Pamir Alay) di a valle di u Fergana custituisce l'altru fuculaghju di pupulamentu. Omu ci trova e cità di Och è di Djalalabad, è ancu u puntu u più bassu di u Chirghizistanu, a valle di u Kara-Darya (a seconda surghjente o un affluente di u Syr-Daria), à 132 metri d'altitudine. In 'ssa rigione, u paese circonda ancu dui incastri di l'Uzbecchistanu è una di u Tagicchistanu, culligati à 'ssi paesi da dritti di passaghju annantu à une poche di vie di trasportu internaziunalizate à via di a valle principale à u nordu. A catena di u Pamir Alay, chì supraneghja a rigione, culmineghja à u pinzalone Lenin à 7134 metri è prulonga a fruntiera sudu di u paese incù u Tagicchistanu, insin'à quella incù a China.

Clima mudificà

 
I monti di Tianshan

U clima di 'ssu paese hè cuntinentale è varieghja sient'è e rigione. U clima di a valle di u Fergana à u sudestu hè subtrupicale è caldu caldu d'istate, incù timperature aghjunghjendu 40 gradi °C. À u Nordu, in e zone di bassa muntagna, u clima hè timperatu. In a zona di u Tian Shan, u clima varieghja da cuntinentale à pulariu sient'è l'altitudine. In e zone e più frete, e timperature ponu firmà negative mentre 40 ghjorni d'inguernu è certe zone desertiche cunnoscenu cadute di neve di cuntinuu mentre 'ssa staghjone. In e zone di minima altitudine, e timperature varieghjanu di 6 gradi °C di ghjinnaghju à 24 °C di lugliu. D'istatina, e ghjurnate sò di solitu calde aghjunghjendu faciule i 30 gradi °C. Invece, à l'annuttà, e timperature cadenu qualchì volta insin'à 10 gradi °C. U tempu pò cambià assai prestu.

Storia mudificà

 
Petruglifi di muntoni lucali, in Sary Kamysh

A storia anziana di u Chirghizistanu hè cumplessa, chì sfarenti populi di culture assai differente ci anu campatu à u filu di u tempu. A ghjunta di i Chirghizi ci hè relativamente ricente, à u XVu seculu. L'etnogenesi chirghiza ùn hè micca ligata à 'ssu territoriu, ma da studià in relazione incù i Kirghizi diu Ienissei (539 à 1219, in Siberia), frà altru, ma ancu incù i populi turchi Cazacchi è Uzbecchi, è ancu incù i Monguli calmucchi (o Oirati). A rigione currispondendu à u Chirghizistanu hè pupulata da i Chirghizi à parte da u XVu seculu è u XVIu seculu. 'Ssu populu nomade turcicu evoluendu à l'origine, 2000 anni fà, in u nordestu di a Mongulia è chì si seria prima cullucatu ver'di u sudu di a Siberia trà u seculu VI è u seculu VIII.

In 840, scunfighjenu u Khaganat uiguru, cintratu annantu à l'attuale Mongulia, obblighendu l'Uiguri à fughje più à u Sudu, à u Gansu è in l'attuale Xinjiang in China. I Chirghizi migranu dopu ver'di a rigione di Touva in l'attuale Russia insin'à à u XIIIu seculu, periodu di a criazione di l'Imperu mongulu fundatu da Gengis Khan, chì ingloba prestu i populi turchi. I Chirghizi di l'Inessei ci sò intigrati in u 1219. L'islamu diventa a riligione principale di a rigione ver'di u XIIIu seculu. A a maiò parte di i Cchirghizi sò musulmani sunniti di a scola anafite. Si stallanu in a rigione furmendu l'attuale Chirghizistanu à u XVu seculu.

Khanat di Kokand (1709 - 1876) mudificà

À u principiu di u XIXu seculu, u sudu di u territoriu casca sottu à u cuntrollu di u khanat di Kokand (1710-1876 o 1709-1883, uzbeccu).

Influenza russia (1870 - 1990) mudificà

A parte meridiunale di u territoriu chirghizu hè furmalmente incorpurata à l'Imperu russiu in u 1876, in u corsu di u Grande Ghjocu (rivalità culoniale anglorussia). A reprissione di parechje rivolte porta uni belli pochi d'abitanti à emigrà ver'di l'Afganistanu o a China. In u 1918, un sovietu hè fundatu in a rigione è l'oblast autonomu kara-kirghiz hè criatu in u 1924 in senu à l'URSS. In u 1926, diventa a Ripublica sucialista suvietica autonoma di Chirghizia. In 1936, a Ripublica sucialista suvietica chirghiza hè intigrata cum'è membru à parte intiera di l'URSS. Mentre i scunvulgimenti pulitichi successi à parte si da a fine di l'anni 1980 in Unione suvietica, elezzione libere sò organizate in u Chirghizistanu in u 1991 chì vedenu a vittoria di Askar Akaïev à u postu di presidente d'uttrove di listessu annu. U paese diventa a Ripublica di u Chirghizistanu di dicembre 1991, mentre ch'è Frounzè, a capitale numinata in onore di u dirighjente suvieticu Mikhaïl Frounzè, ripiglia u so nome presuvieticu, Bichkek, di ferraghju 1991.

Indipendenza (1991) mudificà

Dopu à u fallimentu di u colpu di Statu à Mosca chì marca a fine di l'URSS, u Chirghizistanu si pronuncia incù un votu à favore di l'indipendenza rispettu à l'URSS u 31 aostu di u 1991. U paese aderisce à a Cumunità di i Stati indipindenti à a fine di listessu annu. Di marzu 2002, rivugli scoppianu in u distrittu di Aksy à u mumentu di manifestazione dumandendu a liberazione di unu oppunente puliticu. Pocu dopu, u presidente Akaiev accetta a demissione di Bakiev di e so funzione è u rimpiazza da Nikolaï Tanaïev. U presidente Askar Akaiev lancia dopu una riforma custituziunale, a a quale sò invitate l'oppusizione è a sucità civile. Si cunchjude di ferraghju di u 2003 da un referendu, verusimilamente toccu d'irregularità. L'amendamenti à a Custituzione trasformanu, frà altru, u Parlamentu bicamerale in un Parlamentu monocamerale di 75 sedii à parte si di l'elezzione di ferraghju di u 2005.

2005 : Rivoluzione di i tulipani mudificà

In u corsu di l'anni seguente, u putere, sempre ditenutu da Askar Akaïev, diventa di di più autoritariu. L'elezzione legislative di u 27 ferraghju è di u 13 marzu 2005 sò dinunciate cum'è frudulente, particularmente da l'ossirvatori di l'Organisazione per a sicurezza è a cuupirazione in Europa (OSCE). I rivugli principianu ver'di a fine marzu chì si trasformanu prestu in u sudu di u paese in manifestazione chjamendu à a demissione di u guvernu in piazza. U 24 di marzu, 15000 manifestanti partitanti di l'oppusizione vinuti da u sudu di u paese s'opponenu à a pulizza in Bichkek è piglianu d'assaltu u casamentu aggrundendu a presidenza dopu à vuciate fendu statu di a fughjera di u presidente Akaiev fora di paese. Hè a rivoluzione di i Tulipani. Dopu à a rivoluzione di i Tulipani chì suvita 'ss'elezzione, u guvernu provvisoriu prumette di sviluppà nuvelle strutture pulitiche è d'arrigulà certi prublemi custituziunali. A demissione furzata di l'anzianu presidente Askar Akaiev hè accittata da u Parlamentu chirghizu l'11 aprile di u 2005. I capi di l'oppusizione mettenu in piazza un guvernu provvisoriu è prumettenu d'organizà prestu nove elezzione cù u fine di pretende à una ligittimità definitiva. E lotte in senu à l'oppusizione sò arrigulate prestu, è Kourmanbek Bakiev piglia i posti di presidente è di Prima ministru.

2010 : Rivoluzione chirghiza mudificà

U 7 aprile 2010, una viulente manifestazione di l'opponenti à u rigimu di u presidente Bakiev degenereghja. Omu cunta 75 morte è 500 feriti in a capitale, Bichkek. In a sirata, centinare d'opponenti assedianu u Parlamentu situatu in a vicinanza di a residenza presidenziale. U Prima ministru, Daniyar Üsenov, dichjara u statu d'urgenza è un coprifocu hè instauratu. Trè capi di l'oppusizione sò interpellati è inculpati per crimini gravi, po unu di elli, Omourbek Tekebaïev, hè liberatu dopu in a ghjurnata. Sempre in a sirata, u Prima ministru, Daniyar Üsenov, avendu rimessu una lettera di demissione, dopu à neguziati incù unu di i capi di l'oppusizione, Temir Sarïev, l'annuncia à a radiu chirghiza Azattyk. À listessu tempu, l'oppusizione forma u so propiu guvernu, incù à a so testa l'exi ministru di l'Affari straniere, Roza Otounbaïeva. I Stati Uniti si inchietanu di l'instabilità di u paese, chì disponenu di una basa militaresca aeria chì li serve di ponte per fà transità i so omini è u so materiale ver'di l'Afganistanu. In modu parallelu, a Russia prupone u so aiutu à u guvernu provvisoriu. U 16 d'aprile 2010, Kourmanbek Bakiev, u presidente cadutu, ghjà partutu in esiliu à u Cazacchistanu, demissiuneghja officialmente in una lettera per via di telecopia addirizzata à i nuvelli dirighjenti di u paese. Bakiev essendu in esiliu, Roza Otounbaïeva hè incaricata di dirighje u paese in modu provvisoriu, è di scrive una nuvella Custituzione parlamintare.

Dapoi a rivoluzione mudificà

Dopu à a so elezzione d'uttrove 2011 è trà u 1a dicembre 2011 è insin'à à u 24 di nuvembre 2017, Almazbek Atambaev hè presidente. Hè u prima presidente à terminà u so mandatu. Dopu à a so elezzione d'uttrove 2017, Sooronbay Jeenbekov hè u presidente di u Chirghizistanu. U 10 di ghjinnaghju 2021, Sadyr Japarov hè elettu presidente di u Chirghizistanu è succede à Sooronbay Jeenbekov.

Econumia mudificà

U Chirghizistanu ferma un paese abbastanza poveru, chì a so econumia hè per u più girata ver'di l'agricultura. Prima di a caduta di l'URSS in u 1991, 98% di l'espurtazione di u Chirghizistanu eranu destinate à l'Unione suvietica. L'affundamentu di quest'ultima hà cunsiderevulmente ralentitu a produzzione di u paese à u principiu di l'anni 1990. Riforme impurtante fubbenu intraprese chì anu di certu permessu di migliurà a pristazione ecunomica di u paese à u corsu di l'ultime anni (u Chirghizistanu fubbe a prima ripublica di l'anzianu bloccu suvieticu à esse ammessa à l'Organisazione mundiale di u cummerciu di dicembre 1998), ma i so rivinuti ùn sò sempre micca custanti è a puvertà ferma assai prisente.

 
A piantazione di culture in u Chirghizistanu necessiteghja di solitu un'irrigazione.

L'agricultura hè unu di i principali sittore d'attività di u paese, riprisintendu 12,1% à u produttu internu rozu è furniscendu impieghi à circa 21% di a pupulazione attiva. U Chirghizistanu hè muntosu è cunvene à l'allevu di u bestiame, a principale attività agricula. I pasciali coprenu à l'incirca a mità di a superficia di u Chirghizistanu, vene à dì 9 milioni d'ettari è l'allevu estinsivu ghjoca un rollu magiore in l'econumia, a sucità è a cultura di u paese. E produzzione duminante inchjudenu u granu, u zuccheru di barbabietula, u cutone, u tabaccu, i legumi, i frutti è e noce. In una minima misura, a lana, a carne è u latticime.

U Chirghizistanu sporta per u più metalli non ferrosi è minerali, produtti lavurati in lana è agriculi, energia elettrica è une poche di altre robe. A prima fonte di valute hè a produzzione d'oru di a minera chirghizocanadiana di Kumtor, chì a so attività riprisenta à l'incirca 10% di u PIB. E so impurtazione cumprendenu u pitroliu, u gasu naturale, i metalli ferrosi, i produtti chimichi, a maiò parte di i so arnesi è macchine, u legnu, a carta, un pocu di produtti alimintari è materiali di custruzzione. I so partenarii cummerciali principali sò a China, a Russia, u Cazacchistanu, i Stati Uniti, l'Uzbecchistanu è l'Alimagna.

U PIB per abitante di u Chirghizistanu s'inalza à 1146 dullari in u 2020, sient'è l'estimi di u FMI. In u 2020, u Chirghizistanu arrigistra una calata di u so produttu internu rozu di 8,6% duvuta à a situazione sanitaria di u paese caghjunata da a pandemia di Covid-19, ma ancu da u fattu di i rivugli pulitichi chì anu affittatu u paese d'uttrove 2020. A puvertà ferma sparta in e rigione rurale è muntose, induve 22% di e famiglie sò in situazione d'insicurezza alimintare in u 2018. Eppuru, e riforme ecunomiche purtate dopu à l'indipendenza anu avutu per effettu glubale di fà rinculà a puvertà, tucchendu 52% di a pupulazione chirghiza in u 2000 contru à 20% in u 2019. In u 2022, u Chirghizistanu hè classificatu in 94ima pusizione per l'indiziu mundiale di l'innuvazione.

Trasportu mudificà

L'aeruportu internaziunale di Manas, servendu a capitale Biškek, è ancu l'aeruportu di Och, cullega u paese per via di leghe aerie à a China da a cità di Urumqi, à l'Uzbecchistanu da Tachkent è à u Cazacchistanu da Almaty. I dui aeruporti culleganu ancu u Chirghizistanu à a Russia da e cità di Iekaterinburgu, di Krasnoiarsk è di Novossibirsk 14. U traspurtadore aeriu naziunale Kyrgyzstan Airlines era a cumpagnia aeria naziunale di u Chirghizistanu, incù u so sediu suciale annantu à i terreni di l'aeruportu internaziunale di Manas à Biškek. Sfruttava buli internaziunali è naziunali rigulari, è ancu buli di tipu charter. A so basa principale era l'aeruportu internaziunale di Manas, incù un hub à l'aeruportu di Och. Hà affundatu in u 2005. Ùn esiste ch'è una linia di camminu di ferru à u Chirghizistanu, da a capitale Biškek. 'Ssa linia permette à i viaghjadori di rende si sia à u Cazacchistanu, sia in a cumuna chirghiza di Balyktchi, vicinu à u lavu Issyk-Koul.

Pulitica mudificà

 
Bastimentu di u Cunsigliu supremu in Biškek, sede u Parlamentu

A Custituzione di u 1993 definisce u statutu puliticu di u paese cum'è una ripublica demucratica. U putere esecutivu hè cumpostu da un presidente è da un Prima ministru. U putere legislativu hè bicamerale. U putere ghjudiziariu hè cumpostu da una Corte suprema, da una Corte custituziunale, da corte lucale è da un procuratore generale. Firmata u 9 nuvembre 2006 da u presidente Bakiev, una nuvella custituzione instaureghja una ripublica parlamintare. U Parlamentu, cumpostu da 90 sedii, puderà appruvà u guvernu, chì u so Prima ministru hè numinatu da u Partitu vincidore di l'elezzione, incù l'accordu di u presidente. D'aprile di u 2010, u presidente Kurmanbek Bakiev hè cacciatu fora da un muvimentu di cuntistazione populare, pigliendu radica in a crescita di i prezzi di l'energia è in a curruzzione endemica in crescita in u paese. À u mumentu di 'sse cuntistazione, i cunfronti trà e forze di l'ordine è i manifestanti facenu 84 morte è migliaie di ferite. Di ghjugnu 2010, Och, a siconda cità di u paese, diventa u teatru di viulenze dirette à l'incontru di a cumunità uzbecca. Partendu di una simplicia altercazione trà uni pochi di individui, 'sse viulenze si trasformanu prestu in cunflittu interetnicu, fendu circa 2000 morte è pruvuchendu a partenza di u paese di 300000 uzbecchi. U 27 ghjugnu di u 2010, un referendu hè organizatu da i puteri publichi chirghizi in risposta à 'sse viulenze. A pupulazione hè chjamata à piglià pusizione in favore o micca di una riforma custituziunale visendu à riduce i puteri di u presidente à prò di u parlamentu. A nova custituzione hè aduttata seguita à u scrutinu. U Chirghizistanu face parte di l'Organisazione di cuupirazione di Shanghai (OCS), chì ne hè in u 2001 unu di i membri fundatori.

Demugrafia mudificà

 
Una famiglia campendu in una iurta

In u 2016, a pupulazione di u Chirghizistanu era stimata à 5727553 abitanti. Listessu annu, 30,1% avianu menu di 15 anni è 5,13% più di 65 anni. U paese hè rurale à 64,3%, per una densità di pupulazione abbastanza debule di 29 abitanti per km quatratu. A capitale, Biškek, conta officialmente 589000 abitanti, à i quali ci vole à aghjunghje numerosi staghjuneschi, è ancu l'occupanti illegali di terreni micca riperturiati in e statistiche. A spiranza di vita hè in u 2016 di 70,7 anni, incù una spiranza di vita di 75 anni per e donne è di 66 anni per l'omini. U tassulu di natalità di 22,6 ferma altu, è u tassulu di murtalità di 6,6 hè debule, incù un saldu migratoriu di - 30000 persone. U Chirghizistanu hà un tassulu d'alfabetisazione di 97% in u 2001. 65% di a pupulazione hè d'origine chirghiza, gruppu etnicu turcicu prisintendu influenze mongule è essendu sturicamente custituitu da pastori mezi nomadi, chì sò divisi in quaranta clani. A più grande minuranza hè quella di l'Uzbecchi (14,5% di a pupulazione), per u più stallati in u Sudu, suvitati da e persone d'origine russia (9,0% per u più in u Nordu, custantemente in calata da u fattu di a so emigrazione), dungana (1,2), uigura (1,1), tagicca (1,1), mescheta (0,9), cazacca (0,7), ucraniana (0,5, in calata) è cureana (0,3). Esistenu ancu piccule cumunità d'origine tedesca, ma a maiò parte sò partute in l'anni 1990. Vicinu à 75% di a pupulazione hè cumposta da musulmani sunniti (islamu), incù 20% di cristiani ortudossi è uni pochi di migliaie di cattolichi.

Lingue mudificà

U Chirghizistanu hè una di e trè exi Republiche sucialiste suvietiche, incù u Cazacchistanu è a Bielorussia, à avè cunsirvatu u russiu cum'è lingua officiale. U paese hà, in più di quessa, aghjuntu a lingua chirghiza pocu dopu l'indipendenza di sittembre 1991. Quella appartene à u gruppu di e lingue turcice. In 1924, un alfabetu basatu annantu à l'alfabetu arabu fubbe introduttu, rimpiazzatu da l'alfabetu latinu in u 1928. In u 1941, l'alfabetu cirillicu fubbe definitivamente aduttatu. Siont'è un censimentu di u 2009, u chirghizu si piazza in testa di e lingue parlate incù 71% di locutori nativi, l'uzbeccu in siconda pusizione incù 15%. Malgradu u so statutu di lingua officiale u russiu ùn occupa ch'è a terza piazza incù 9% di locutori, i 5% rimanenti essendu spartuti trà altre lingue. Eppuru, sient'è listessu censimentu, a lingua russia hè ammaistrata da 40% di a pupulazione per via di u fattu ch'ella custituisca dinù a lingua di l'affari è di a pulitica. Omu custatta però una tindenza à una ghjunta di a lingua chirghiza annantu à a piazza publica. À longu cunsiderata cum'è una lingua di casa, a lingua chirghiza apparisce in a vita pulitica è in particulare assai deliberazione parlamintare sò fatte in 'ssa lingua. L'inglese hè una lingua prisente dapoi u 1992, è insignata soprattuttu à l'università. 'Ssa lingua hè eppuru pocu sparta, u paese essendu situatu in senu à l'Asia cintrale, è attira à l'internaziunale soprattuttu turisti fortunati.

Riligione mudificà

 
Una moschea in custruzzione in u Chirghizistanu

A riligione principale hè l'islamu sunnitu, di a scola anafite. Ma a pratica riligiosa musulmana hè marcata ancu da l'influenze di u sciamanesimu, esistendu prima di 'islamu, è di u sufismu, chì e so missiunarii anu ghjucatu un grande rollu in l'islamisazione di a rigione. A pratica riligiosa hè debule, per via di u passatu cumunistu di a ripublica, ma soprattuttu per via di l'apportu di pratiche animistiche è sciamaniche, è di l'animu di gruppu, tribale è patriarcale, induve a figura di un patriarca (u decanu di a famiglia) hè rispittata. L'estremismu riligiosu hè assai scarsu, è l'idee laiche, arricate à u tempu di u cumunismu, sò assai sparte. S'è i cristiani ortudossi si ritrovanu soprattuttu ind'è i russii è altri slavi, a pratica riligiosa hè rara. U prutistantismu hè ricente, è nanzu à l'indipendenza di u paese, cuncirnava soprattuttu i tedeschi di a Volga, depurtati, induve omu ritruvava ancu una minuranza cattolica.

Note mudificà

  1. 'Ss'articulu pruvene in parte da a wikipedia in francese.