Casa Barbaggi-Rivarola

A Casa Barbaggi-Rivarola hè una di e case storiche di Bastia chì si trova in u quartieru di Terravechja. Si trova à u numeru 7 di u carrughju Carbuccia.

Facciata di a Casa Barbaggi-Rivarola

Storia

Hè stata custruita à u seculu 18 da Giuseppe Barbaggi, un riccu cummerciante. S'hè maritatu in prime nozze cun Elena Zerbi è dopu cun Dionisia Paoli (in u 1761), nipote di Paquale Paoli, è diventa cusì apparentatu à a famiglia Paoli. Giuseppe Barbaggi era un omu di lettere è facia parte di parechji circuli leterarii cum'è l'Accademia dei Vagabondi. Hè statu numinatu da Pasquale Paoli cum'è direttore di a muneta è hè in a so casa di Muratu ch'ella hè stata stallata "a zecca" (a fabrica di a muneta).

James Boswell hè statu ricevutu in sta casa in u 1765. In i so scritti conta ch'ellu hè statu impressiunatu da a manera di riceve di Giuseppe Barbaggi.

Hè in sta casa chì Pasquale Paoli stava quand'ellu venia in Bastia. Ne prufittava tandu per andà à vede A Mònaca Rivarola, chì era a madre superiore di u cunventu Sant'Orsula. Era cunnisciuta per esse patriotta, amica è agente di Pasquale Paoli. Andava à vedela à u cunventu di l'Ursuline, induve era sora superiore, passendu pè i giardini di a Casa Barbaggi Rivarola è chì cummunicavanu cù u cunventu.

A lastra cummemurativa

Dop'à a cunquista di a Francia, Giuseppe Barbaggi hè statu cundannatu à l'esiliu è a casa hè stata pigliata. Hè diventata pruprietà di u rè di Francia è in u 1770 l'amministrazione ci stallava i grandi funziunarii.

Quandu a Corsica hè diventata inglese, a casa hè stata resa à a famiglia Barbaggi. Paoli ci hè statu un'ultima volta in u 1795.

A casa turnò à a figliola di Giuseppe, Anna Porzia, maritata cun Antonio Rivarola, fratellu di a Mònaca. Antonio Rivarola era u rapresentante officiale di Paoli in Italia. U so figliolu Domenico Rivarola, natu in Bastia in u 1774, era offizieru di marina à u serviziu di u Rè di Piemonte-Sardegna. Più tardi fù deputatu di a Corsica. Hè ellu chì fece u purtò cù u stemmadi a famiglia Rivarola.

U stemma di a famiglia Rivarola sopr'à u purtò

Da vede dinù

A Mònaca Rivarola