Calcutta

Calcutta, ufficialamenti Kolkata (da u bingalesu কলকাতা Kolkata), hè una cità di l'India di 4.580.544 abitanti, capilocu di u distrittu di Calcutta, in u statu fidaratu di u Bengala Uccidintali di u quali hè capitali. Cunsidarendu u numaru di abitanti a cità rientra in a classa I (più di 100.000 abitanti)^[1].

Giugrafia fisica

A cità hè situata a 22° 34' 22 N è 88° 21' 50 è hà un'altitudina di 12 metri^[2]. Calcutta hè situata annantu à u fiumu Hughli (un ramu di u Gange) a circa 60 km da u cunfini incù u Bangladesh.

Storia

A cattedrali San' Paulu

Fù capitali di l'India Britannica finu à u 1912. U nomu di a cità hè statu ufficialamenti cambiatu in Kolkata (in bingalesu: কলকাতা) di ghjinnaghju 2001. Nonustanti u novu nomu sii funeticamenti più vicinu à a prununcia bingalesa, molti parsoni è urganisazioni chjamani sempri a cità incù u nomu di Calcutta. In Hindi a cità hè chjamata Kalkatta.

Demugrafia

À u censimentu di u 2001 a pupulazioni di Calcutta assummava à 4.580.544 parsoni, frà i quali 2.506.029 masci è 2.074.515 femini. I criaturi di ità infiriori o uguali à i sei anni assummavani à 364.355, di i quali 189.486 masci è 174.869 femini. Infini, quiddi chì erani in gradu di sapè alminu leghja è scriva erani 3.428.309, di i quali 1.947.621 masci è 1.480.688 femini.^[3]

Sicondu u censimentu di u 2001 l'agglumeratu urbanu di Calcutta ammuntava à 13.216.545 parsoni è cumprendi numarosi municipalità, paesi, arii urbani ed hè u terzu in India dopu à Bombay è Delhi. Si stendi annantu à i distritti di Calcutta, 24 Pargana Nordu, 24 Pargana Sudu, Howrah, Hooghly è Nadia. A crescita dimugrafica di a cità hè stata, in l'ultimi anni, abbastanza bassa.

Loca d'intaressu

Victoria Memorial

U Victoria Memorial

U Victoria Memorial, ufficialamenti Victoria Memorial Hall, hè un edifiziu custruitu in mimoria di Vittoria, Righjina di u Regnu Unitu è Imperatrici di l'India, custruitu probbiu in Calcutta, chì à quiddu tempu era a capitali di l'India britannica.

Squadri di ballò

In Calcutta hè stata fundata in u 1889 a prima squadra di ballò di tutta l'Asia, u Mohun Bagan, sempri oghji trà i clubi maiori di u paesi. L'altra squadra di a cità hè l'East Bengal Football Club, vincidori di molti campiunati, di prubità di u miliardariu Vijay Mallya.