Burchini

U burchini (o burkini) hè un tipu di custumu da bagnu feminile, chì copre interiamente u corpu, esclusi a faccia, e mane è i pedi.

Donna in burchini

Generalmente, hè cumpostu da dui pezzi: una tunica di media lunghezza incù una cuffia-hijab intigrata è i pantaloni da mette sottu à a tunica.

Etimulugia

A parola "burchini" hè una parola macedonia chì unisce i termini burqa è bikini, ed hè una marca rigistrata. Eppuru, u burchini ùn copre u voltu cum'è in u burqa, ma hè più simile à u hijab.

Storia

In u 1993 appariscenu i primi custumi da bagnu feminili produtti da l'impresa turca Hàşema. In Egittu, i primi custumi da bagnu islamichi fubbenu produtti è commercializzati à parte da l'annu 2000 incù u nome di "custumu da bagnu sharia" è "hijab da notu": si trattava d'un custumu da bagnu à collu altu, incù e maniche è una piccula gonna da mette sopra i pantaloni longhi.

In u 2004 a stilista australiana di mamma libanese Aheda Zanetti, proprietaria di l'impresa Ahiida, perfiziuneghja u design di u custumu da bagnu (à l'iniziu chjamatu "hijood"), chì hè brivettatu à parte da u 2007 incù u nome rigistratu "Burchini", imprudendu materiale sinteticu lebbiu simile à i custumi nurmli da bagnu. U burchini fù aduttatu dopu da u guvernu australianu cum'è unu di i mudelli di divisa per u persunale feminile musulmanu impignatu in u salvamentu annantu à e spiaghje. In u 2016 Aheda Zanetti sustene d'avè vindutu guasi 500000 pezzi in dodici anni, incù vendite in custante aumentu.

Da u 2006 in i Stati Uniti 'ssu tipu di custumi sò cunnisciuti cum'è "splashgear". Altre dinuminazione sò "veilkini" è "MyCozzie".

Descrizzione

U burchini, specificamente disignatu per e donne di riligione musulmana, copre tuttu u corpu, fora di u visu, di e mane è di i pedi, sicondu i pretesi pricetti di l'islamismu. Parechji virsione ponu avè maniche è pantaloni corti (à duie terzi), è senza cuffia. Hè produttu incù materiale sinteticu lebbiu è elasticizatu, simile à i custumi nurmali da bagnu, à u fine di permette di nutà è d'asciuvà si prestu.

U burchini hè statu discrittu cum'è a soluzione perfetta per e donne musulmane chì volenu avè a pussibilità di nutà, senza a necessità di spuglià si è svilà u so corpu. L'aspettu hè simile à quellu d'una muta subacquea dutata di cuffia intigrata, ma sustanzialmente più flessibile è micca fatta di neoprene. Inoltre hè moltu simile à u custumu usatu da i surfisti d'inguernu o in l'acque frete oceaniche è à u custumu da bagnu integrale da cumpetizione imprudatu in e ghjustre natatorie finu à u 2009.

U burchini hè imprudatu ancu da donne ebreie ortudosse, induiste è cristiane mormone.

Contruversie

L'usu di u burchini hè calchì volta pruibitu in e piscine è altri lochi publichi per presunti mutivi igienichi. Eppuru, u burchini hè un custumu da bagnu rializatu incù u stessu materiale sinteticu ch'è i custumi nurmali da bagnu è, s'ellu hè currittamente purtatu, ùn comporta micca prublemi igienichi differenti rispettu à un custumu nurmale. Frà altru, u tissutu chì copre a testa funge da cuffia da notu, chì tene i capelli. Inoltre, cuprendu guasi interiamente u corpu, u burchini pò cuntribuisce à a privenzione di u melanoma cutaneu.

D'estate di u 2009 parechji merri di l'Italia sittentriunale espunenti di a Lega Nordu anu emessu una seria d'ordinanze lucale per pruibisce l'usu di stu custumu in e piscine cumunale, non solu per mutivi igienichi ma ancu per "mantene a publica decenza è sirenità di l'altri bagnanti, specialmente di i criaturi". In parechji casi, eppuru, e sanzione sò state successivamente annullate da l'auturità ghjudiziaria.

D'estate di u 2016 parechji cumune francese di a Costa d'Azurru anu pruibitu l'usu di u burchini annantu à e spiaghje per presunti mutivi d'ordine pubblicu.