Boziu

U Boziu hè una regione di Corsica, situata à l'estremu sudupunente di a Castagniccia, vicinu vicinu à Corti. U so capilocu storicu hè Sant'Andria di Boziu.

Geugrafia

U Boziu currisponde à u territoriu di l'anziana pieve di Boziu. Si cumpone di i territorii di e cumune di :

• U Castellà
• Sermanu
• Bustanicu
• Alandu
• Favalellu
• U Alzi
• A Mazzola
• Sant'Andria di Boziu.

Culmina à u Pianu Maiò (1 581 m).

I so abitanti sò i Buzinchi.

Particularità

Piccula regione di u centru muntosu di a Corsica, u Boziu hè duramente culpitu da a disertificazione di l'internu di l'isula. U Boziu hà a particularità d'avè mantenutu di manera particularmente viva a tradizione di u cantu polifonicu : paghjella, terzettu è messa cantata. Hè dinù una terra di tradizione di sunadori di viulinu. Un festivale di musiche tradiziunale da ballà hà avutu locu cusì mentre parechji anni in paese di Sermanu in omagiu à 'ssi sunadori di viulinu oghje spariti.

Patrimoniu

• Cattidrale Sant'Andria di Boziu in Sant'Andria di Boziu
• Cunventu San Francescu di Boziu in Alandu
• Chjesa rumanica di Santa Maria Assunta di Favalellu, incù l'affreschi di u seculu XV
• Cappella rumanica di San Niculaiu à Sermanu, incù l'affreschi di u seculu XV
• Cappella Sant'Alesiu annantu à l'alture di Sermanu à u pede di u Monte Pianuforte Magiore
• Case antiche cunsirvate in ottima manera in Bustanicu

Da vede dinù

Articulu cunnessu

• Pieve di Boziu