Adrone

In fisica di e particule, un adrone (grecu ἁδρός, chì significheghja robustu, zeppu) hè una particula subatomica cumposita custituita da dui quark o più mantenuti inseme da l'interazzione forte. Sò analoghi à e molecule chì sò mantenute inseme da a forza elettrica. A maiò parte di a massa di a materia ordinaria pruvene da dui adroni : u prutone è u neutrone. A maiò parte di a massa di i prutoni è di i neutroni hè à u so tornu duvuta à l'energia di lega di i quark chì i cumponenu, per causa di a forza forte. L'adroni sò classificati in duie grande famiglie : i barioni, custituiti da un numeru disparu di quark (di solitu trè quark) è i mesoni, custituiti da un numeru paru di quark (di solitu dui quark : un quark è un antiquark). I prutoni è i neutroni (chì custituiscenu a maiuranza di a massa di un atomu) sò esempii di barioni. I pedini sò un esempiu di mesone. Adroni esotichi, cuntinendu più di trè quark di valenza, sò stati scuperti sti pochi anni. Un statu di tetraquark (un mesone esoticu), numinatu Z(4430)⁻, hè stata scupertu in u 2007 da a cullaburazione Bella è cunfirmatu cum'è una risunanza in u 2014 da a cullaburazione LHCb. Dui stati di pentaquark (barioni esotichi), numinati P⁺
_c(4380) è P⁺
_c(4450), sò stati scuperti in u 2015 da a cullaburazione LHCb. Esistenu parechji altri candidati adroni esotichi è altre cumbinazione di quark di culore è di singulettu chì ponu ancu esiste. Guasi tutti l'adroni è antiadroni liberi (vale à dì isulati è micca ligati à un nucleu atomicu) sò cunsiderati cum'è instabili è finiscenu per disintegrà si in altre particule. A sola eccezzione pussibile cunnisciuta hè quella di i prutoni liberi, chì parenu esse stabili o, almenu, chì mettenu un tempu lunghissimu à disintegrà si (di circa 10³⁴⁺ anni). À titulu di cumparazione, i neutroni liberi sò a particula instabile à a durata di vita a più longa è si disintegranu incù una mezavita di circa 879 seconde. In modu sperimentale, a fisica adronica hè studiata fendu entre in inticciu adroni, per indettu prutoni, trà di elli o incù i nuclei d'elementi densi è grevi, cum'è u piombu o l'oru, è individuendu i pisticciuli in e piosse di particule produtte. Un prucessu simile si produce in ambiente naturale, in l'estrema alta atmusfera, induve i muoni è i mesoni tali i pedini sò produtti da l'inticci di i raghji cosmichi incù e particule di gasu rareficatu in l'alta atmusfera.